Февраль 14-15 лунъясö Сыктывкарын чукöртчылас «Коми войтырлöн» XII съезд. 2016 вося декабрсянь öтмунöмлöн исполкомöн веськöдлысьлысь удж вöчö Алексей Габов. Съезд водзын сiйö аддзысьлiс «Коми му» газетса корреспонденткöд да висьталiс нёль воöн медтöдчана вöчöмторъяс йылысь.
–Сэки миян медводдза могнас лои, медым XI съездлысь помшуöмсö босьтiсны асланыс уджö республикаса правительство да министерствояс. Алексей Конюховкöд быд ведомствоö ветлiм, сёрнитiм, гöгöрвоöдiм. Мукöд регионö, кöнi комиыс öтчукöрöн олö, коми кыв велöдысьясöс дасьтöм кындзи резолюцияысь став шуöмсö вöлi пыртöма правительстволöн индöдö. Кызвынсö, 90 прöчент гöгöр, пöртöма нин олöмö. Мукöдсö збыльмöдам на.
Изьва районса Щельяюрын босьтчылiсны кыпöдны мусир коляс переработайтан комбинат. 2017 воö исполкомö шыöдчисны Олег Терентьев да «Изьватас» котырысь Николай Рочев, йöзыс пö талы паныд сувтiсны да, öлöдны колö «Лукойлсаöс» стрöитчöмсьыс. А компанияыс уна сьöм нин видзöма вöлi проектас да, дугöдны сiйöс вöлi сьöкыд. И век жö ковмис налы öвсьыны.
«Изьватаскöд» ми топыд йитöдын уджалiм. Воддза съезд бöрас недыр мысти öтувтiсны промышленносьт да мупытшса озырлунöн вöдитчан, вöр-ва видзан министерствояс, А налöн могъясыс торъялöны, промышленносьт сöвмöдiгад экология вылö оз ёна видзöдны, а мöд министерствоыслы, мöдарö, видзны колö вöр-васö. Николай Рочевкöд öтлаын аддзысьлiм да сёрнитiм Коми Республикаса юралысь Сергей Гапликовкöд. Та бöрын выльысь гöгöрбок ставсö артыштiсны да бöр торйöдiсны министерствояссö.
Сэки жö артмылiс сiдз, мый правительствоын комиöн сёрнитысь ни öти министр эз ло. Бара жö «изьватассакöд» шыöдчим юралысь дорö, корим, мед национальнöй политика министерствоöн веськöдлiс коми морт. Миянöс кылiсны да министрнас индiсны Галина Габушеваöс.
Ассьыс пай «Коми войтыр» пуктö и коми кывъя диктант, «Лямпиада» фестиваль, «Райда» конкурс, коми КВН нуöдöмö. Сыктывкарса коми культура шöринкöд кыкысь нин котыртлiм том войтырлы этнодискотека. Исполкомö пырысь Афанасий Габов ёна зiлис Ыджыдвидз сиктын детсад кыпöдöм вöсна. Челядь видзанiнсö сэнi неважöн вöлi восьтöма.
–А кутшöм юалöмъяс кыпöдлiнныд исполкомлöн чукöртчылiгъясö?
–Öнi ми чукöртчывлам ог сöмын юркарын, но и районъясын. Ыбса финн-йöгра этнопаркö корлiм йöзöс, кодъяс кöсйöны пырöдчыны гранта конкурсъясö. Висьталiм налы, кыдзи колö уджтассö дасьтыны, дорйыны сiйöс, а збыльмöдöм бöрас кывкöртöд вöчны. Та бöрын школаясын, библиотекаясын уджалысьяс да мукöд войтыр босьтчисны гранта проектъяссö гижны, збыльмöдны найöс. Со Луздор районысь Галина Попова этнокультураын тöдöмлун содтöм кузя уджтас пöртiс олöмö. Кар-районса представительствоясын зiльысьясöс велöдiм тшöтш лöсьöдны да нуöдны öтуввезйын ассьыныс лист бок.
«Кöрт Айка» фестиваль дырйи исполкомса чукöртчылiсны Кöрткерöсын. Сэки сёрнитiм кар-районын коми йöзлöн конференцияяс кежлö дасьтысьöм йылысь.
Искусство гимназиялысь уджаланногсö кöсйöны вöлi вежны. Исполкомöн ветлiм и сэтчö, миянлы öд абу веськодь, кутшöмöн лоас гимназияыс, кöнi велöдчöны республика пасьталаысь ныв-зон.
Чукöртчылiм и Госсöветын депутатъяскöд да министерствосаяскöд öтвылысь. Видлалiм, кыдзи мунö съездлысь резолюция збыльмöдан уджыс. Таöдз юасим министерствояслысь, да миянлы воисны ылöсас гижöм кабалаяс, кадыс пö помшуöмсö збыльмöдны эм на. Тайö, дерт, шензьöдiс миянöс. Шыöдчим юралысьлöн администрацияö. Сэнi видзöдлiсны министерствоясысь воöм вочакывъяссö да шуисны, колö пö öддзöдны уджсö. И Госсöветын исполкомлöн чукöртчылöм бöрын збыльысь öддзис. Ми öтлаын уджалам власьт тэчаскöд, мед став шуöмсö вöлi вöчöма.
Исполкомсалöн быдöнлöн аслас видзöдлас, но ми öтувтчим, кор коми кывнымöс челядьлöн да налöн бать-мамлöн кöсйöм серти велöдöны шуисны. Та йылысь ёсь сёрни кыпавлiс став кар-районас коми йöзлöн чукöртчылiгъясö. Корим республикаса юралысьлысь киритны тшöктöмсö да кутшöмкö кадколаст водзö на велöдiсны важ мозыс.
Тайö юалöм кузя нёль комиссия уджалiс: Госсöветын, национальнöй политика, йöзöс велöдан да культура министерствоясын.
Сёрниыс чорыд вöлi, öд öтарсянь кö, эм странаса президентлöн вужвойтыръяслысь кывсö ас кöсйöм серти велöдöм йылысь индöд, а мöдарсянь кö – республикаса олапанпасын урчитöма быть велöдны коми кыв. Колiс аддзыны сэтшöм петан туй, медым индöдыс эз торкав оланпассö. Öтув пырöдчим тайö уджас, быдöнöс кывзiм. Сöмын федеральнöй закон вежöм бöрын и миян республикаын мам-бать кутiсны бöрйыны, кыдзи велöдны ныв-пиыслы коми кывсö.
Ми унаысь аддзысьлiм бать-мамкöд, школаясын уджалысьяскöд, сёрнитiм накöд вужвойтырлысь кыв велöдöмлöн коланлун йылысь. Кöнъясынкö бать-мамыс кылiсны-гöгöрвоисны миянöс, кöнъясынкö – эз.
Öкмысöд класс помалысьяслы коми кывйысь экзаменсö «5» вылö сдайтöмысь быдвося премия урчитiм. 2019 воас татшöмыс вöлi комын квайт морт, быдöнлы 1 сюрс шайтöн сетiм. Абу уна быттьö, но и тайö ышöдö велöдны чужан кывсö.
Унаöн элясьöны, «Коми войтыр» пö öтдортчис Шиесын шыблас видзанiн вöчöм дугöдан уджысь. Збыльысьсö абу сiдз. Некымынлаö нин шыöдчылiм та кузя. Госсöветса депутатъясöс корим вынсьöдны оланпас, мед республикаö эз позь вайны мукöд регионысь лöп-ёгсö.
Шыöдчöмъяс ыстылiм и Дмитрий Медведевлы, сэки странаса правительствоöн веськöдлысьлы, да вöр-ва видзан Россияса министерствоö, корим гöгöрвоöдны, колö-ö Шиесас полигонсö вöчны, сэнi шыблассö переработайтны кöсйöны либö чукöртны сöмын. Ми тöждысям асланым вöр-ва вöсна, а шыблассö татчö вайöмыс ыджыд лёк вöчас экологиялы. Вочавидзисны, полигон вöчтöдз пö медвойдöр колö йöзыслысь юасьны, налысь видзöдлассö тöдмавны, öти кывйö воöдчыны. Та йылысь ме кута жö сёрнитны съезд дырйи. сöгласие колö. общественнöй согласие.
Шиес дорйысьяс жö петкöдöны йöзöс ывлаö да пыр жö политикаысь мöдöны ворсöдчыны, миян странаын пö ставыс лёк, чöвтам Путинöс, Комилы пö колö торйöдчыны Россияысь. Ми жö ассьыным видзöдласнымöс веськыда висьталам: Шиесын полигоныс оз ков.
–Бöръя кадас исполком кар-районын водзмöстчысьяскöд видеоконференцияяс кутiс нуöдны. Мыйла найö колöны?
–Та йылысь республикаса юралыськöд вöлi сёрнитчöма. Чина йöз коми войтыркöд сöмын быдвося чукöртчылöмъяс дырйи аддзысьлöны, а видеоконференцияыс сетö позянлун «Коми войтырын» зiльысьяслы и на костын кыпöдны министерствояс водзын ёсь юалöмъяс, видзöдлыны, мый нин вöчöма да мый колö на вöчны. Татшöм аддзысьлöмыс, кытчö öтмунöмса кындзи волöны и муниципалитетъясса администрацияясын уджалысьяс, вöлi нин дзоньвидзалун видзан, видз-му овмöс, мупытшкöсса озырлунöн вöдитчан да вöр-ва видзан, йöзöс велöдан министерствоясын зiльысьяскöд.
–Кывсьö, исполкомысь кындзи «Коми войтыр» öтмунöмын тшöтш лоас сiдз шусяна старейшинаяслöн сöвет. Кутшöм могöн сiйöс котыртöны?
–Воддза съезд дырйи на, 2016 воö, вöлi шуöма татшöм сöветсö лöсьöдны. Пырасны сэтчö ыджыд опыта йöз, кодъяс уна во зiльöны «Коми войтырын». Быд кар-районысь представительство вöзъяс сэтчö öти мортöс, а исполком сэсся вынсьöдас найöс. Колö тöдчöдны, мый сöветыс оз мöд уджавны исполком пыдди, сiйö лоас сöвещательнöй тэчасöн.
–Алексей Иванович, тiян чайтöм серти, кутшöм медтöдчана могъяс йылысь сёрни кыпöдасны «Коми войтырлöн» съездса делегатъяс?
–Став карыслы да районыслы инмö «Ухтажилфондлöн» уджыс. Быдöнöс öнi тайö майшöдлö. И, дерт, экология йылысь сёрниыс ёся кыптылас. Медицина юкöнын мытшöдыс уна жö, оз тырмы специалистыс, лекарство. Кöть эськö бöръя кадас лекарствонас бурджыка кутiсны могмöдны.
Таво сикт-посёлокъясö кöин-ошъяс тшöкыда петавлöны. Такöд тшöтш мыйкö колö вöчны, гашкö, оланпас вынсьöдны, мед шöйтысь кöин-ошкöс лыйны эз ков лицензия.
Колö и коми кывъя электроннöй небöгъяс лöсьöдны, мед быдöн вермис наöн вöдитчыны.
Ёсь сёрни лоас и исполкомöн веськöдлысьöс да президиумö пырысьясöс бöрйигöн. Öтмунöмöн мед эськö юрнуöдiсны войтыр, кодъяс аддзöны мытшöд венан нырвизьяс, вöзйöны петан туйяс. «Коми войтыр» век уджалiс и кутас уджавны республикаса власьт тэчаскöд öтвыв, медым миян Коми муным и водзö сöвмис да уна сикас кывйöн сёрнитысь войтыр олiсны öтсöгласöн.
Сёрнитiс Павел Симпелев.