Керка джаджйын – кыӧм кӧр

Усинск районса Усвавомлы таво тырӧ 255 во. Гӧгрӧс пассӧ кутам нимӧдны гожӧмнас. А сыкӧд йитӧдын культура керкаын шуим котыртлыны сиктса аслыспӧлӧс йӧзкӧд аддзысьлӧмъяс. Медводдза татшӧм аддзысьлӧмыс вӧлі кольӧм вежонӧ – Анна Семёновна Канева тӧдмӧдіс гӧсьтъясӧс аслас кӧр коллекцияӧн.

Ань зільӧ кывкутана удж вылын – веськӧдлӧ Усинск карса администрацияын юкӧнӧн. А сьӧлӧм-ловсӧ бурмӧдӧ тшӧтш и кӧр чукӧртӧмӧн. Анна Семёновналӧн висьталӧм серти, пансьӧма ставыс 10 во сайын, кор сылы козьналӧмаӧсь турун-увторъясысь вӧчӧм пемӧсӧс. Тайӧ кадӧн кутшӧм сӧмын чача-вӧчӧмтор абу чукӧрмӧма: куысь вурӧм, кыӧм, пуысь да кӧртысь вӧчӧм, тасьтіӧ серпасалӧм…

Аддзысьлӧм вылӧ воысьяслӧн петкӧдланторсӧ видзӧдалігкості культура керкаын уджалысьяс висьталісны кӧр видзысьяслӧн олӧмын да Айму вӧсна Ыджыд тышын тайӧ пемӧсъясыслӧн тӧдчанлун йылысь.

А рыт помын чумработницаяс Надежда Дмитриевна да Валентина Владимировна Филипповаяс номсӧдлісны ставнысӧ тундраса ю-тыысь дона чериӧн да пӧкйӧн.

Нина Чупрова.

Керка джаджйын – кыӧм кӧр

«Коми му» газетысь, кодӧс позьӧ судзӧдны пошта пыр, позьӧ ньӧбны «Ордым» лавкаын. Медым лыддьыны электроннӧй версия, личкӧй татчӧ. Эмӧсь кӧ юалӧмӧяс, гижӧй komi-kerka@ya.ru.

Пролистать наверх