Таво тырӧ 100 во, кыдзи республикаса юркарын да районъясын нывбабаяс ӧтувтчисны асланыс котырӧ.
Ме уна во нин туяла аньяслӧн котырлысь историясӧ. Листалі важ газет-журналъяс, аддзысьлі уна йӧзкӧд, кодъяс казьтылісны Комиын медводдза водзмӧстчысь аньяс йылысь, петкӧдлісны налысь фотокарточкаяс да важ документъяс. Быд татшӧм паныдасьлӧм сетіс меным позянлун ун-джык тӧдмавны, мыйсянь пансис да кыдзи сӧвмис миян республикаын коми аньяскӧд уджыс. Меным тайӧ интереснӧ, ачым ӧд ветымын сайӧ во нин пырӧдча тайӧ кывкутана уджас.
1920-ӧд воясын Усть-Сысольскса партия Укомын вӧлі нывбабаяскӧд удж нуӧдан юкӧн, кодлӧн юрнуӧдӧм улын заводитчис районъясын уджыс.
«Зырянская жизнь» газетын 1920 вося ноябрь 7 лунӧ вӧлі йӧзӧдӧма шыӧдчӧм, мый колӧ нуӧдны уездса нывбабаяслысь пленум да та могысь мӧдӧдны районъясӧ женорганизаторъясӧс, медым котыртны нывбабаяскӧд уджсӧ сиктъясын. Кӧсъя казьтыштны на пиысь кык коми аньӧс. Тайӧ Александра Николаевна Попова (верӧс сертиыс Шевелёва) да Анна Николаевна Коюшева (Изъюрова).
Александра Николаевна Попова чужлӧма 1909 воын Пезмӧгын гӧль семьяын, но бать-мамыс сійӧс велӧдӧмаӧсь. Помалӧма 7 класс, а сы бӧрын Коми обласьтса советско-партийнӧй школа. 1928 воын пырӧма комсомолӧ, 1931-ӧдын — партияӧ. 1932 вося характеристикаас пасйӧма: «Социальное положение — крестьянка-беднячка, в настоящее время — беднячка-колхозница. Целесообразно использовать на газетной или политпросвет работе».
Александра Николаевна вӧлӧма Луздор районын нывбабаяслӧн отделӧн медводдза веськӧдлысьӧн.
Анна Николаевна Коюшева чужлӧма 1905 воын Кӧрткерӧсын, крепыд крестьяналӧн семьяын. Помалӧма сэні жӧ 7 класс, а сы бӧрын уджысь эновтчытӧг — педучилище. Уна во зільӧма Позтыкерӧсса школаын, вӧлӧма медводдза велӧдысьяс лыдын.
Водзмӧстчысь аньӧс бӧрйылӧмаӧсь женорганизаторӧн (сиктса аньяскӧд удж нуӧдысьӧн). 1929 воын корлӧмаӧсь юркарӧ сӧвещание вылӧ кыдз делегатӧс.
Кутшӧм удж найӧ нуӧдӧмаӧсь? Медшӧр могӧн вӧлӧма сетны нывбабаяслы грамота, медым сэсся вермисны уджавны сӧветскӧй учреждениеясын. Колӧ вӧлі дасьтыны, велӧдны, быдтыны специалистъясӧс. Унатор вӧчӧмаӧсь посни челядьлы детсад да ясли восьталӧм могысь. Гырысьджык арлыда челядьлы котыртавлӧмаӧсь изба-читальняясын уна сикас чукӧртчылӧм-аддзысьлӧм. Велӧдчӧм том аньясӧс мӧдӧдлӧмаӧсь сетны йӧзлы грамота (нуӧдны ликбез). Колӧ вӧлі пыртны сикт-грездса олӧмӧ сӧветскӧй культура.
Тайӧ да уна мукӧд водзмӧстчысь ань пуктӧмаӧсь подув нывбабаяслӧн котыръяслы (женсӧветъяслы).
Александра Николаевнаӧс да Анна Николаевнаӧс унаысь бӧрйылӧмаӧсь женсӧветъяслӧн президиумӧ. Найӧ пыр вӧлӧмаӧсь водзмӧстчысьяс лыдын.
Тайӧ аньяс йывсьыс ме тӧдмалі налӧн нывъяссянь: Альбина Семёновна Кудряшовасянь (Шевелёвасянь) да Римма Степановна Касинецсянь (Изъюровасянь). Найӧ мамъясныс моз жӧ пыр уджалӧны йӧзкӧд, зільӧны туйдны найӧс бурӧ. Кыкнанныс вӧвлӧм велӧдысьяс.
Альбина Семёновна дасысь унджык во веськӧдлӧ юркарса ветеранъяслӧн котырын гражданско-патриотическӧй комиссияӧн, коді нуӧдӧ челядь да том йӧз пӧвстын ыджыд удж.
Римма Степановна сьӧлӧмсяньыс туялӧ аслас рӧдвужыслысь историясӧ. Кӧрткерӧсса кузнеч Митрей рӧ-дысь вӧлӧма сылӧн мамыс — Анна Николаевна, коді видзӧма став важ документсӧ да сэсся сетӧма Римма Степановналы. Татшӧм архивнас тӧдмасьны зэв интереснӧ.
Кӧсъя висьтавны ыджыд аттьӧ Альбина Семёновналы да Римма Степановналы, кодъяс содтісны нывбабаяс котырлӧн историяӧ нӧшта ӧти лист бок.
Тамара КУРМАНОВА,
Коми Республикаса аньяслӧн котырысь ветеран.