Октябрь 18 лунӧ Коми Рес-публикаса юралысь бердын искусствояс гимназияын витӧдысь нин нуӧдісны том йӧзлӧн выль коми сьыланкывъяслысь «Койташ» фестиваль. Котыртліс гажсӧ Сык-тывкарса коми культура шӧрин.
Тавося «Койташыс» торъяліс воддзаяссьыс. Шуам, гаж котыртысьяс медводдзаысь на урчитісны вит нимпас. Жюриӧ пырысьяс — «Югӧр» студияысь звукорежиссёр Игорь Желобнев, «BEAT MAKERS» котырӧн веськӧдлысь Евгений Лисовский, «Ручеёк» сьылан котырӧн веськӧдлысь Александра Шляхтова да Россияса гижысь котырӧ пырысь Ольга Баженова — эз сӧмын донъявны сьылысьясӧс, но и висьталісны, кыдзи позьӧ енбинысӧ водзӧ бурмӧдны-сӧвмӧдны.
«Койташыс» муніс «Оскар» ногӧн. Сыктывкарса «Мода театрысь» мича нывъяс петкӧдісны донъялысьяслы конверт, кытчӧ вӧлі гижӧма сійӧ либӧ мӧд нимпасын вермысьсӧ.
И сідз, юркарса «Томлун» котыр вермис «Выльмӧдӧм коми йӧзкостса сьыланкыв» нимпасын, Сыктывкарысь Анна Ульянова да Артемий Барсуков — «Эстрадаса медбур сьыланкывйын». «Медбур коми бард» ним шедӧдіс Кулӧмдін районса Помӧсдінысь Дмитрий Филиппов. Финн кыв вылын «Rakkauden haudalla» сьыланкыв лои медбур каверӧн, сійӧс сьыліс Евгения Удалова. Но а видзӧдысьяслы сьӧлӧм выланыс воӧма Кулӧмдін районса Дон сиктысь Артур Гарновлӧн сьылӧмыс, кодлы «ВКонтактеын» вичмӧма медся уна сідз шусяна лайк.
—«Койташын» вӧліны и выль ногӧн юргысь йӧзкостса сьыланкывъяс, и кавер-вуджӧдӧмъяс. Позис кывзыны и саксофон, и электрогитара. Но миян могным ёна ыджыдджык — нимӧдны коми кывсӧ выль сьыланкывъяс пыр. Шуам, «Койташ» бӧрын унаӧн йӧзӧдісны выль сьыланъяссӧ ӧтуввезйын. Сідзкӧ, том йӧз найӧс збыльысь кывзӧны. Нӧшта эм мӧвп дасьтыны «Койташса» сьыланкывъясӧн диск. Бӧръяысьсӧ татшӧмыс петавліс 2012 воын. А эз кӧ мойви «койташасьны» миянкӧд, позяс видзӧдны фестивальсӧ телевизор пыр октябрь 28 лунӧ «Юрганлӧн» «Миян йӧз» уджтасын либӧ ноябрь 6 лунӧ «Коми горлӧн» «Ас му вылын» уджтасын, — пасйис Сыктывкарса коми культура шӧринӧн веськӧдлысь Наталья Шахова.
Снимокъясыс Сыктывкарса коми культура шӧринлӧн.