Сыктывкарын октябрь 12-15 лунъясӧ нуӧдӧны Александр Александрович Католиковлӧн 85 вося юбилейлы сиӧм лыддьысьӧмъяс.
СССР-са народнӧй учитель чужлӧма 1941 вося октябрь 13 лунӧ. Бать-мам дӧзьӧртӧг кольӧм челядьӧс сійӧ быдтіс-велӧдіс удж дорӧ сибӧдӧмӧн. И педагоглӧн татшӧм ногӧн зільӧмыс збыльысь вайис ыджыд водзӧс – ныв-зон лоисны кывкутысь, удж радейтысь йӧзӧн.
–Католиковлы сиӧм лыддьысьӧмъяс дырйи ми зілям гӧгӧрвоны, кыдзи нималана педагоглӧн велӧданногнас вӧдитчыны ӧнія кадӧ, кор миян олӧмын зэв тӧдчанаӧн лоӧны лыдпаса технологияяс, кыдзи пыртны сылысь мӧвпъяссӧ челядькӧд, том йӧзкӧд уджӧ, – висьталіс Коми Республикаса йӧзӧс велӧдан да наука министерствоӧн веськӧдлысь Олег Холопов.
Лыддьысьӧмъясыс пансисны октябрь 12 лунӧ велӧданног сӧвмӧдан институтын. Сэні тӧдӧмлунсӧ содтісны найӧ, кодъяс отсалӧны бать-мамтӧг кольӧм челядьлы выль семья аддзыны.
Тайӧ жӧ лунӧ студентъяслы да школаын велӧдчысьяслы висьталісны СССР-са народнӧй учительлӧн олӧм йылысь, тӧдмӧдісны, кутшӧм пай сійӧ пуктіс велӧданног сӧвмӧдӧмӧ. Сыктывкарса университетын видлалісны агроклассъяс, школаса музейяс паськӧдан туйвизьяс. Том йӧз шӧринӧ «Ступени успешной жизни» слёт вылӧ чукӧртчылісны детдомъясын быдмысь ныв-зон да налӧн верстьӧджык ёртъясыс, кодъяслӧн челядьдырыс бать-мамтӧг жӧ колины.
Октябрь 14 лунӧ гуманитарно-педагогическӧй колледжын нуӧдісны велӧдысьяслысь фестиваль, Национальнӧй библиотекаын педагогъяс юксисны асланыс уджын шедӧдӧмторъясӧн, велӧданног сӧвмӧдан институтын опека тэчасын уджалысьяс котыртлісны семинар-практикум. Помасис тайӧ луныс республикаса юралысь бердын искусство гимназияын Александр Католиковлы сиӧм концертӧн.
А талун Национальнӧй библиотекаын чукӧртчыласны Александр Александрович Католиковлӧн матыссаясыс, уджъёртъясыс, казьтыштасны нималана велӧдысьӧс, тӧдмасясны архивысь снимокъясӧн, педагоглӧн туясян уджъясӧн.
Чужан луннас вӧлі Александр Католиковлӧн памятник дорын митинг. Пасыс сулалӧ школа-интернат водзын, кӧні сійӧ кызьысь унджык во вӧлі веськӧдлысьӧн. Ӧні сылӧн нима интернатын олӧ 112 ныв да зон. Таво гожӧм найӧ ветлӧмаӧсь Межадорӧ.
–Ми водзӧ мунам Александр Католиковӧн бӧрйӧм туйвизьӧд, кӧсъям вӧчны челядьлысь олӧмсӧ бурджыкӧн. Александр Александрович зілис, мед ичӧт морт тӧдіс, мый сійӧ аслас олӧмас ыджыдыс, – висьталіс интернатӧн веськӧдлысь Мария Брусиловская.
Католиковлӧн Виктор пиыс шуис, мый батьыс став олӧмсӧ сиис челядь быдтӧмлы.
–Енмыс унатор вӧлі сетӧма сылы, сійӧ тӧждысис быдӧн вӧсна. Батьӧй абу нин миянкӧд, но велӧдысьлӧн олӧмыс век тыдовтчӧ быдтасъясыс олӧмын, – висьталіс Виктор Александрович.
Сергей Евстигнеев петӧма школа-интернатсьыс паськыд олӧмӧ 1991 воӧ да шуӧ Александр Александровичӧс мӧд батьӧн. Сійӧ казьтыштіс Католиковлысь кывъяс: «Медым мортысь вӧчны мортӧс, колӧ сӧмын велӧдны сійӧс радейтны удж, радейтны семьясӧ да радейтны Рӧдинасӧ». И ме пӧ ассьым нин челядьӧс тадзи жӧ быдта.
Митинг дырйи торъя дозйӧ пуктісны гижӧд, восьтасны сійӧс дас вит во мысти 2041 вося октябрь 13 лунӧ, кор Александр Александрович Католиковлӧн чужӧмсянь тырас сё во.
–Уна во мысти дозсӧ восьтысьяс мед тӧдісны: Католиковлӧн школа-интернатын биыс некор оз кус. Тайӧ ичӧт мортлы эскан би, и ӧзтіс сійӧс Александр Александрович. Видзӧй миянлысь ӧтувъя керканымӧс, пыдди пуктӧй ӧта-мӧднытӧ да эн вунӧдӧй: кытчӧдз олӧ сы йылысь паметьыс, сійӧ век ловъя, – висьталісны школа-интернатса быдтасъяс, гижӧдсӧ лӧсьӧдысьяс. <>
Гижӧдсӧ дасьтіс Павел Симпелев.
Снимокъясыс ӧтуввезйысь.