Вежыд петлас…

Выльлунӧ Сыктывкарса коми культура шӧринын вӧчисны медводдза коми поэтлӧн чужӧмсянь 180 во тырӧмлы сиӧм «Миян Иван Куратов» викториналы кывкӧртӧд.

Юалӧмъяс вылас бура вочавидзӧмаӧсь юркарса 1-ӧд номера лицейын велӧдчысьяс Елизавета Кривенок, Дарья Хабарова, Алёна Пархачёва, Дарья Старцева, Александра Антонишина, 18-ӧд номера школаысь Злата Булыгина да Захар Чупров. Диплом кындзи ставныслы налы вичмис и юмов козин.

А вермысьнас жюри шуӧма Ю.Спиридонов нима искусство гимназияса 11 классын велӧдчысь Дарья Бутыреваӧс. Козинӧн сылы лоис «Коми КВН» фестиваль вылӧ билет.

Викториналы кывкӧртӧд вӧчтӧдз на искусство гимназияысь «Тӧдысьяс» да том коми войтырлӧн «МИ» котырысь «Анькытшъяс» командаяс венласисны тӧдӧмлуннас.

Дерт жӧ, конкурсса став юалӧмыс вӧлі йитчӧма Иван Алексеевич Куратовкӧд. И эз кокньыдӧн найӧ вӧвны.

Сідз, сорлалӧм строкаясысь коліс тэчны кывбур, кыдзи гижлӧма сійӧс Куратов. Некор кӧ эн лыддьыв сійӧс, эз эськӧ и артмы тайӧс вӧчны.

Нӧшта, Азияса кутшӧм кывкӧд пӧ И.Куратов ӧткодявліс коми-зыряналысь кывсӧ? Да мыйла?

Вӧлӧмкӧ, поэт шулӧма, мый коми да китай кывъясын быд морфема петкӧдлӧ торъя вежӧртас.

Но ӧнія лингвистъяс вензьӧны татшӧм видзӧдласыскӧд. Комиын пӧ морфемаыс оз век кут торъя вежӧртассӧ, сӧмын зільӧ тайӧс вӧчны.

Вензьӧм вензьӧмӧн, а век жӧ долыд, мый школаын да вузын велӧдчысьяс тӧдӧны Куратовлӧн туясьӧмъяс йылысь. Коми литературалы подув пуктысь ӧд вӧлӧма, кыдз тай шуласны, зэв образованнӧй мортӧн: сёрнитӧма дас нёль кыв вылын да гӧгӧрвоӧма комын квайтӧс.

Шемӧс весиг босьтлӧ, кыдзи дас ӧкмысӧд нэмын войвывса ылі сиктын чужлӧм морт велӧдлӧма та мында кыв! И вежыд на петлас…

«МИ» котырсаяс ни гимназистъяс эз кӧсйыны ворссьыны, эз сетчыны ӧта-мӧдыслы.

Кызь юалӧмысь сӧмын гоз-мӧд коли стӧч вочакывтӧг. Сэки налы отсӧг вылӧ волісны видзӧдысьяс. Куратовлӧн гижӧдын паныдасьлӧ сумлабич кыв. Мый пӧ тайӧ? Ворсысьяс эз кужны вочавидзны, а видзӧдысьяс висьталісны, залавка пӧ.

Ӧти синмӧн сӧмын «Анькытшъяс» вермисны «Тӧдысьясӧс». Но радлісны ставӧн ӧтмоза, ӧд петкӧдлісны, мый дӧбельки бура тӧдӧны «миян» Иван Куратовлысь олӧмсӧ да гижӧдъяссӧ.

Павел Филимонов.

Снимокъясыс ӧтуввезйысь.

Вежыд петлас…

«Коми му» газетысь, кодӧс позьӧ судзӧдны пошта пыр, позьӧ ньӧбны «Ордым» лавкаын. Медым лыддьыны электроннӧй версия, личкӧй татчӧ. Эмӧсь кӧ юалӧмӧяс, гижӧй komi-kerka@ya.ru.

Пролистать наверх