Выль велӧдчан воын «Профессионалитет» федеральнӧй уджтас серти бюджет весьтӧ зумыд тӧдӧмлун-сям босьтӧны Комиысь 818 ныв-зон.
Программа сертиыс артыштӧма дасьтыны республикаса экономикалӧн кык зэв тӧдчана юкӧнын – вӧр овмӧсын да транспортын – уджалысьясӧс. Та могысь вӧр промышленносьт шӧрин восьтӧма Сыктывкарса лесопромышленнӧй техникум бердын. Мӧд кластерсӧ – «Транспорт юкӧн» – Сыктывкарса автомеханическӧй техникум подув вылын.
Студентъяслы тӧдӧмлун-сям сетӧны тшӧтш Сыктывкарса да Усинскса политехническӧй, Сосногорскса технологическӧй, Коми республикаса агропромышленнӧй техникумъясын да Воркутаысь арктикаса горно-политехническӧй колледжын велӧдысьяс.
Том йӧз босьтӧны регионса предприятие-организацияясын зэв колана специальносьтъяс. Сідз, юркарса лесопромышленнӧй техникумын велӧдӧны сварщикӧ, электромонтёрӧ, вӧр заптан да трелюйтан техникаса машинистӧ, слесар-наладчикӧ, вӧр обработайтан оборудованиеса оператор-станочникӧ.
Автомеханическӧй техникумын позьӧ велӧдчыны слесарӧ, туй вӧчан да стрӧитчан техникаса машинистӧ, босьтны транспортӧн груз нуӧм-вайӧм, транспортса электрооборудованиеӧн вӧдитчӧм, автотранспорт дзоньталӧм кузя тӧдӧмлун-сям.
Велӧдӧны том йӧзӧс предприятие-организацияӧн, торйӧн кӧ, Сыктывкарса ЛПК-ӧн, «Лузалес» ООО-ӧн, «Комиавтотранс» да «Коми туй компания» акционер котыръясӧн веськӧдлысьяскӧд топыд йитӧд кутӧмӧн тшӧтш и налӧн цех-мастерскӧйясын. Содтӧд на, и сэтысь ыджыд опыта уджалысьяс сетӧны аскиа специалистъяслы ассьыныс бур тӧдӧмлун-сям.
<> Гижӧдсӧ дасьтіс Александра Артеева. Снимокыс ӧтуввезйысь.