Миян редакцияӧ звӧнитчыліс Сыктывкарысь Таисия Ивановна. Олӧма ань элясис юркарса общественнӧй автобусӧн шогмытӧма новлӧдлӧм вылӧ, быттьӧ пӧ картупель мешӧк нуӧны, а оз йӧзӧс.
—Ме эськӧ ог тшӧкыда автобусӧн ветлы, но корсюрӧ быть ковмылӧ. Тыдалӧ, шоперъяслӧн мог — ордйысьны, а абу йӧзӧс лючки новлӧдлыны. Здук кежлӧ сувтласны, ӧдва удитан пырны либӧ петны, и панласьӧмӧн тӧвзьӧны нин… Висьысь кока кӧ, ӧдзӧс костас топӧдасны либӧ салонас усьны верман. Овлӧ, и нӧбасьысь ань да кагаа мам оз слӧймыны пырны-петны, — висьталӧ Таисия Ивановна.
—Неважӧн Эжваӧ пӧдруга дорӧ ветлі, — водзӧ элясьӧ олӧма ань. — Автобус ӧдзӧсӧ пальто бӧжӧй топаліс. Содсӧ кайны ог вермы, а шопер вӧрзьӧдчис нин. Кодкӧ висьталіс да, мунігкостіыс и восьтліс ӧдзӧссӧ. Йӧзыс сойбордйӧд отсалісны кайны. А кондукторыс дивитіс на менӧ, мед пӧ мӧд автобус виччысин дай…
Шопер-кондукторлӧн вежавидзтӧг ветлӧм-сёрнитӧм вылӧ Сыктывкарын олысьяс тшӧкыда норасьӧны. Кыдзи пасйӧны ГИБДД-ын зільысьяс, во заводитчӧмсяньыс автобусын доймалӧма 26 ветлысь-мунысь. Сентябрь 16 лунӧ 80 арӧса нывбаба усьӧма 46-ӧд номера автобусын (маршруткаыс мунӧ вӧлӧм Сыктыв шоссе кузя Морозов уличалань) да дойдӧма морӧс лысӧ. Больничаӧ сійӧ лунас абу шыӧдчӧма, тыдалӧ, чайтӧма, мый бурдас. Но дойыс абу лӧньӧма да, куим лун мысти олӧма аньыд врач дорӧ век жӧ ветлӧма.
Кыдзи пасйӧны погона йӧз, автобусын кодлӧнкӧ доймӧмысь мыжа шопер. Шуам, сійӧ кӧ тэрмасьӧмӧн бергӧдчӧ, вӧрзьӧдчӧ либӧ другысьӧн личкӧ тормоз педальӧ, да сэки доймалӧ пассажир, тайӧ лоӧ туй выв правилӧ торкалӧмӧн. Ӧд шопер кывкутӧ йӧзӧс новлӧдлігӧн налӧн дзоньвидзалун вӧсна. Мунігӧн кӧ тангысин либӧ усин автобусын, колӧ юӧртны руль сайын пукалысьлы да кондукторлы. Налӧн мог — сувтны да отсавны доймӧм мортлы, корны тэрыб отсӧг сетысьясӧс да ГИБДД-ын уджалысьӧс.
Шопер кӧ эз сувтӧд автобуссӧ ни эз отсав, колӧ аслыд корны тэрыб отсӧг либӧ шыӧдчыны больничаӧ, медым врач пасъяс, кыдзи да кӧні, ёна-ӧ доймин. Колӧ быть пасйыштны кабалаӧ маршруткалысь номерсӧ, медым сэсся кыскыны кывкутӧмӧ шоперсӧ. Пасъям, идӧртӧма ветлысьлысь ДТП места эновтӧмысь вермасны правосӧ мырддьыны.
Эн шыбитӧй и автобус билетсӧ, коді вермас ковмыны ассьыд право дорйигӧн. Бурдӧдчанторъяс ньӧбӧм вылӧ чекъяс быть жӧ колӧ чукӧртны да ёрд пыр перйыны шоперлысь сьӧм. Медым кокньыдджык вӧлі водзсасьны, юасьӧй тшӧтш телефон номеръяссӧ свидетельяслысь. Дерт, верман кӧ быттьӧ. Овлӧ, «лихач»-шопер соссьӧ мыж-сьыс, а кондукторыс уджъёртсӧ, дерт, дорйӧ. Сэки и отсаласны лоӧмторсӧ аддзылысьясыс.
Позьӧ гижны и перевозчикыслы элясяна кабала, кытчӧ стӧча пасйыны лоӧмтор да медицина отсӧгла шыӧдчӧм йылысь, ыстыны тшӧтш квитанция-чек копияяс. Сідз шусяна оригиналсӧ быть ордад кольӧй, мед оз воштыны. Ӧд ёрдын уджалӧны оригинал вылӧ подуласьӧмӧн.
Юристъяс пасйӧны, мый шоперӧс, мыжа кӧ сійӧ автобусын пассажирлӧн доймӧмысь, вермасны кыскыны кывкутӧмӧ удж вылас, а сідзжӧ административнӧй либӧ уголовнӧй делӧ кузя — ёрдын.
Екатерина МАКАРОВА.