Миян республикалы 2026 воын видз-му овмӧс сӧвмӧдӧм могысь государство вичмӧдӧма миллиардысь унджык шайт. Сьӧмсӧ видзӧмаӧсь грант, субсидия, льготаа кредит да комын сикас мукӧд отсӧг сетӧм вылӧ.
Таво тулыснас нуӧдӧмаӧсь крестьянин-фермер овмӧсъяслы грант вичмӧдан конкурс. Та вылӧ торйӧдӧмаӧсь 53 миллион шайт. Ас овмӧс котыртӧм могысь позьӧ босьтны 3-8 миллион, а уджалан нин предприятиеовмӧс сӧвмӧдны – 30 миллион шайт. Дерт, та дырйи и аслад зептысь колӧ вештыны 40 прӧчент рӧскодсӧ.
Кӧрткерӧс районса Пезмӧг сиктысь Турьев гозъя босьтчӧмаӧсь фермеравны 2019 воын.
Мӧс да кӧза йӧлысь Татьяна босьтчӧма вӧчны сыр. Унатор тӧдмалӧма ӧтуввезйысь, мыйсюрӧ ачыс думыштӧма, сэсся ачыс сырыс пӧ велӧдіс, мый сылы колӧ. Заводитӧма небыд брынзасянь да адыгеяса сырсянь, а сэсся мӧдӧма вӧчны чорыдджык сортаӧс.
2020 воын Александр верӧсыс босьтчӧма тшӧгӧдны бычӧяс. Кок йыланыс сувтны ёна отсалӧма государствосянь субсидия. Надзӧник паськӧдчӧмаӧсь, мӧдӧмаӧсь рӧдмӧдны мӧс, кӧза, индюк да кроликъяс.
А Татьяна водзӧ чӧжӧма сыр пуан сямсӧ, вӧлӧга кӧрсӧ бурмӧдӧм могысь мӧдӧма содтавны быдсикас приправа.
2024 воын регионса видз-му овмӧс министерство котыртӧма сыр пуысьясӧс велӧдан семинар.
Велӧдчӧм бӧрас Татьяна выль содтӧд тӧдӧмлунӧн мӧдӧма вӧчны голландияса сыр.
Вӧчӧмторсӧ сёйӧмаӧсь асьныс, номсӧдлӧмаӧсь матыссаяссӧ да ёртъяссӧ.
Налӧн ошкӧмыс нӧшта ёнджыка ышӧдӧма Татьянаӧс водзӧ вӧчны чӧскыд вӧлӧгасӧ.
Сійӧ жӧ вонас Татьяна кыдз самозанятӧй кырымалӧма социальнӧй контракт. Сы серти сыр вӧчан оборудование ньӧбӧм вылӧ сылы вичмӧдӧмаӧсь 350 сюрс шайт. Александр мӧдӧма веськӧдлыны крестьянин-фермер овмӧсӧн.
2025 воын гозъя кӧртымалӧмаӧсь стрӧйба, сувтӧдӧмаӧсь сэтчӧ йӧв переработайтан да вакуум тубрас гартан оборудование, а сідзжӧ холодильник.
Талун тайӧ цехас Турьевъяс пуӧны нелямын сикас сыр: голландиясасянь да кӧза йӧлысь вӧчӧмаӧдз. Став вӧлӧга вылас эм колана кабала-декларация. Вӧчӧны весиг салатӧ содтӧм могысь чӧскыд дука сыр да юмов десерт. Неважӧн Татьяна велӧдчӧма дасьтыны сырсьыс… кампет.
Чӧскыд вӧлӧгасӧ вӧчӧны ас овмӧсса йӧлысь. Видзӧны кык мӧс да кӧзаяс. Содтӧд мӧс йӧвсӧ ньӧбӧны «Северная Нива» овмӧсысь.
Казьтыштам, некымын во сайын Турьев семьяыс босьтӧма йӧв переработайтысьяслӧн республикаса конкурсын коймӧд места.
Тайӧ нӧшта на ыззьӧдӧма найӧс зільны водзӧ. Уджач гозъя кӧсйӧны вӧчны нӧк, рысь да нӧшта на выль сикас сыр.
Налӧн олӧмын тӧдчана тшупӧдӧн лоис Коми Республикаса видз-му овмӧс министерствосянь гранта конкурсӧ пырӧдчӧм.
Июньын Турьевъяслы вичмис сьӧма отсӧг. Сы вылӧ кӧсйӧны кыпӧдны модульысь цех. Став колана стройматериалсӧ ньӧбӧмаӧсь нин, таво ноябрын пӧ ваясны.
Воддза цехас кӧ суткинас позис переработайтны 80 литр йӧв, выляс 500 литр нин. Сэсся йӧла вӧлӧга вӧчан производство улӧ стрӧйбасӧ ӧні кӧртымалӧны Адзорӧмын. Сэтчӧдз мунӧм-локтӧм вылӧ кад жӧ колӧ. А выльсӧ гозъя кӧсйӧны кыпӧдны локтан воын Пезмӧгын, олан керкаыскӧд орччӧн.
Турьевъяслысь чӧскыд вӧлӧгасӧ позьӧ ньӧбны юркарын шойччан лунся ярманга дырйи. Та кежлӧ найӧ дасьтысьӧны вежон. Ӧд колӧ вӧчны чӧскыд сёян-юансӧ, мичаа ставсӧ тубравны да гижавны-пасъявны. Вузасянінас зільӧны куимӧн. Александр да Татьяна ёрта-ёртсӧ вежлалӧмӧн иналӧны вӧлӧгасӧ, а Андрей пиныс мыччалӧ тӧварсӧ, тэчӧ да торйӧдлӧ-сортируйтӧ.
Крестьянин уджысь ӧтдор Турьевъяс оз вунӧдны и шойччӧм-гаж йылысь. Прӧстджык кадӧ бур поводдя дырйи ёртъясыскӧд ветлӧны вадорӧ, мукӧдысьсӧ и войколӧн. И, дерт, сьӧрсьыныс пыр босьтӧны ассьыныс сыр.
Александр Андрейкӧд радейтӧны вуграсьны. «Сырысь ӧтдор пызан вылын век эм чери вӧлӧга», – нюмсорӧн висьталӧ Татьяна.
Тайӧ семьяыс нӧшта ӧтчыд петкӧдлӧ, мый весиг сиктын позьӧ вӧчны чӧскыд да колана прӧдукция. Сӧмын эн дышӧдчы…
* * *
Гранта конкурсын 12,6 миллион шайт вичмис и Кулӧмдін районса Руч сиктысь Надежда Погодиналы. Велӧдчылӧма сійӧ ветеринарӧ, а сэсся босьтчӧма фермеравны, мӧдӧма видзны скӧт.
Государствосянь сьӧма отсӧг вылӧ кӧсйӧ кыпӧдны 50 мӧслы выль карта. Тайӧ пӧ сетас позянлун лысьтыны унджык йӧв да тшӧгӧдны яй вылӧ содтӧд скӧт.
Талун карса олысьяс пиысь унаӧн кӧсйӧны видлыны сиктса чӧскыд да химия сорастӧм вӧлӧга да сэк жӧ видзӧдлыны, а позьӧ кӧ, и ас киӧн вӧчны сёянторсӧ. Тадзи надзӧник сӧвмӧ сиктса туризм.
Андрей Лызлов Сыктывдін районса Гаръяын босьтчис быдтыны клубника.
А орчча Паджга сиктса школаын мӧйму сентябрын восьтісны агротехкласс. Ӧні ныв-зон практика дырйи вермасны велӧдчыны быдтыны вотӧс-ягӧд да тшӧтш отсавны фермерлы чукӧртны урожай.
Мӧйму регионса видз-му овмӧс министерствоысь специалистъяс кыкысь бизнес-миссияӧн ветлісны Россияса регионъясӧ да видзӧдлісны, кыдзи сэні вӧдитӧны вотӧс-ягӧд. Таысь пӧ во-дзӧсыс вермас лоны зэв ыджыд, сэсся и агротуризм позьӧ сӧвмӧдны.
Комиын кык фермер босьтчисны нин рӧдмӧдны-быдтыны ыжман, клубника да оз Сыктывдін районса Ыбын.
Нӧшта ӧти кӧсйӧ вӧдитны татшӧм культурасӧ тайӧ жӧ районса Ёлятыын.
Луздор районса Ношуль сиктын босьтчӧмаӧсь быдтыны сэтӧр.
Кӧрткерӧс районса Адзорӧмын некымын во нин чукӧртӧны да переработайтӧны вӧрса вотӧс-тшак.
Татшӧмъясыслы регионса минсельхоз отсалӧ дасьтыны гранта конкурсӧ пырӧдчан шыӧдчӧм. А босьтчан кӧ фермеравны, ведомствоыс отсалас и сьӧмӧн.
<> Николай Размслов. Снимокъясыс авторлӧн да ӧтуввезйысь.