Уна во чӧжнас «Коми велӧдысь» конкурс ёна нин мусмис и велӧдысьяслы, и кагульничаяслы, ӧд найӧ оз сӧмын сям-кужӧмнас венласьны, но и ёртъясыслӧн шедӧдӧмторъясӧн тӧдмасьӧны да пыртӧны тайӧ «гусяторъяссӧ» асланыс уджӧ.
Тавося конкурсыс муніс апрель 6-10 лунъясӧ. Коми кыв да литература велӧдысьяс пӧвстын вермысьнас лоис Изьва районысь Бакурса школаысь Снежана Ануфриева, воспитательяс пӧвстысь медбурӧн шуисны Сыктывдін районысь Выльгортса 1-ӧд номера детсадйысь кагульнича Зинаида Русановаӧс.
Кольӧм вежонӧ Сыктывкарын велӧдысьяс да воспитательяс венласисны асланыс сям-кужӧмӧн сизим, на лыдын тшӧтш и «Коми велӧдысь», конкурсын.
–Республикаса уна кар-районысь ордйысьны воис 86 морт, – висьталіс педагогъяслысь аслыссяма марафон восьтігӧн йӧзӧс велӧдан министерствоӧн веськӧдлысьлысь удж вӧчысь Олег Холопов. – Татшӧм конкурсъясыс ӧтувтӧны велӧдысьясӧс да ышӧдӧны найӧс сӧвмӧдны сямсӧ, а ордйысигӧн босьтӧм опытыс отсалас налы уджын.
«Коми велӧдысь» конкурсӧ пырӧдчисны Сыктывкарысь, Усинск, Печора, Кулӧмдін, Изьва, Сыктывдін да Койгорт районъясысь сизим велӧдысь да вит воспитатель. Кагульничаяс петкӧд-лісны, кыдзи котыртӧны уджсӧ и посни челядькӧд, и налӧн бать-мамкӧд.
А коми кыв да литература велӧдысьяс восьса урокъяс нуӧдісны Сыктыв районысь Первомай-скӧйса школаын ичӧт да шӧр классъясын.
Челядь сюся кывзісны найӧс, ӧд педагогъяс сяммисны аддзыны накӧд ӧти кыв да петкӧдлісны джуджыд тӧдӧмлун, юксисны сыӧн велӧдчысьяскӧд.
Челядь аддзысьлісны и Эльвира Ивановна Поляковакӧд да Валентина Михайловна Грабежовакӧд – буретш наӧн дасьтӧм учебникъяс серти найӧ и велӧдчӧны.
«Коми велӧдысь» конкурслӧн тайӧ вӧлі воддза юкӧн. Сы бӧрын медбуръясыслы – Изьва районысь Бакур сиктса А.П.Филиппов нима школаысь Снежана Александровна Ануфриевалы, Изьва сиктса школаысь Ольга Николаевна Каневалы, Кулӧмдін районысь Кебанъёльса школаысь Людмила Николаевна Мартюшевалы, Койгортса 2-ӧд номера детсадйысь Вера Юрьевна Гуляевалы, Сыктывкарысь 81-ӧд номера прогимназияысь Анна Петровна Ивановалы, Выльгортса 1-ӧд номера детсадйысь Зинаида Васильевна Русановалы да тайӧ жӧ сиктсьыс В.П.Налимов нима 2-ӧд номера детсадйысь Елена Николаевна Семенчиналы, Сыктывкарса 112-ӧд номера детсадйысь Александра Анатольевна Ширяевалы – конкурслӧн мӧд тшупӧдын ковмис ордйысьны вермысь ним вӧсна.
Ордйысьӧмыс муніс «Ме тӧда, кыдзи колӧ вӧчны, и велӧда тэнӧ!» девиз улын, и тайӧ кывъясыс стӧча петкӧдлісны конкурс сюрӧссӧ – тӧдмӧдны уджъёртъяссӧ асланыс велӧданногӧн.
Уджын гусяторъяс йылысь сёрни вӧлі и урокъяс бӧрын. Коми кыв да литература велӧдысьяскӧд аддзысьлыны волісны Госсӧветысь социальнӧй политика комитетӧн юрнуӧдысь, «Коми войтыр» ӧтмунӧмӧн веськӧдлысьӧс вежысь Анастасия Михайлова да Коми йӧзӧдчан керкаса директор Галина Макарова.
Анастасия Александровна тӧдчӧдіс, мый татшӧм конкурсъясыс отсалӧны видзны да сӧвмӧдны чужан кыв, да быд велӧдысьлы козьналіс дзоридзьяс. Галина Валерьяновна козьналіс налы козинъяс да коми газет-журнал.
Педагогъяс сідзжӧ юксисны конкурс кузя мӧвпъяснас: кыдзи дасьтысьӧмаӧсь сы кежлӧ, мый выльсӧ тӧдмалӧмаӧсь, а налысь петкӧдчӧмсӧ донъялысьяс пасйисны, тіян пиысь пӧ быдӧн ыджыд сяма да тӧлка велӧдысь.
Роч челядькӧд уджалысь воспитательяс тӧдмӧдісны, кыдзи велӧдӧны нывкаясӧс да детинкаясӧс ёртасьны ӧта-мӧдыскӧд, кутшӧм йитӧд лӧсьӧдӧны налӧн бать-мамкӧд.
«Учитель года России» конкурсӧ пырӧдчысьяс велӧданног сӧвмӧдан институтын нуӧдісны мастер-классъяс.
Емдін районысь Зӧвсьӧртса 3-ӧд номера школаын англия кыв велӧдысь Екатерина Ветошкина петкӧдліс, кыдзи ышӧдӧ быдтасъяссӧ суйӧрсайса кывъяс вежӧрас видзны.
Велӧдчӧмын пӧ ӧд могыс – медым вермин мӧд кывъя морткӧд сёрнитны, а вӧчны тайӧс позяс, кор унджык кыв тӧдан.
Педагогъяслӧн вежонлы кывкӧртӧд вӧчисны вужвойтырлӧн шылада-драмаа театрын. Сизим конкурсын лои вермысьясӧс бӧрйӧма.
«Учитель года России» конкурсын медводдза места шедӧдіс Сыктывкарса О.Кошевой нима 12-ӧд номера школаысь Ксения Чукилева, «Воспитатель года России» – Печораса 18-ӧд номера детсадйысь Наталья Павлова.
«Коми велӧдысь» конкурсса посни челядьлысь комиӧн сёрнитны кужӧмсӧ сӧвмӧдан нимпасын вермис Сыктывдін районысь Выльгортса 1-ӧд номера детсадйысь Зинаида Русанова, а коми кыв да литература медбура велӧдысьӧн шуисны Изьва районысь Бакурса школаысь Снежана Ануф- риеваӧс.
«Учитель-дефектолог» конкурсын вермис Сыктывкарса 8-ӧд номера детсадйысь Елена Олешкова, «Логопед годаын» – Сыктывкарса 40-ӧд номера коррекционнӧй школаысь Алла Гандзюк, висьысь да вермытӧм челядькӧд уджалысь медбур педагогӧн лоис Сыктывкарысь 61-ӧд номера детсадйысь кагульнича Татьяна Чувьюрова.
«Педагог-психолог» конкурсын вермис Сыктывдін районысь Выльгортса 8-ӧд номера детсадйысь Екатерина Костина, «Социальный педагог» нимпасын медводдза места шедӧдіс Сыктывкарысь О.Кошевой нима 12-ӧд номера школаысь Надежда Миннемулина.
Сыктывкарса политехническӧй техникумлӧн Удораса филиалын велӧдысь Александр Роноевӧс шуисны «Мастер года» конкурсын вермысьӧн, а Усинскса политехническӧй техникумысь Юлия Олиферӧс пасйисны урокъяс бура нуӧдӧмысь.
«Россияса школаясын медбур директор» конкурсын медводдза места шедӧдіс Усинск районысь Усвавом сиктса школаӧн юрнуӧдысь Мария Святохо.
Республикаса ордйысьӧмын вермысьяс арнас петкӧдчасны Россияса конкурсын.
<> Павел Анохин. Снимокъясыс ӧтуввезйысь.