Таво гожӧмнас шойччан лагерӧ путёвкаӧн шуӧма могмӧдны Комиысь 55 сюрсысь унджык челядьӧс. Та йылысь республикаса правительствоын чукӧртчылӧм дырйи юӧртіс велӧдан да наука кузя министрлысь удж вӧчысь Олег Холопов.
Регионын лоӧ восьтӧма лунся 287, а сідзжӧ уджалан да шойччан 161 лагер. «Гренадаын» да «Мечтаын» дзоньвидзалунсӧ ёнмӧдас 1.540 томулов. Сюрс сайӧ ныв-зон колляласны каникулсӧ «Орлёнокын». Водзӧ кутас уджавны республикаын дзик ӧти муниципальнӧй лагер-стационар – Кулӧмдін районын «Морошка».
1,6 сюрсысь унджык ныв-зон шойччасны да дзоньвидзалунсӧ ёнмӧдасны лунвывса шоныд саридз дорын «Черноморская зорька» лагерын. Сэтчӧ путёвкаяссӧ медвойдӧр сетасны спецоперацияын служитысьяслӧн быдтасъяслы, Арктика зонаса кар-районысь томуловлы, вермытӧм да бать-мам дӧзьӧртӧг кольӧм челядьлы.
Во заводитчӧмсяньыс енбиа ныв-зонлӧн – уна сикас олимпиада-ордйысьӧмын вермысьяслӧн – вӧлі нин позянлун шойччыны «Артек», «Смена», «Орлёнок», «Океан» да «Алые паруса» федеральнӧй шӧринъясын.
Республикаса челядьлы мамъясныскӧд бурдӧдчыны шуӧма вичмӧдны санаторий-курортӧ 3.927 путёвка, сы лыдын 1.101-сӧ – гожӧм кежлӧ. Дзоньвидзалунсӧ ёнмӧдны кутасны регионса «Лӧзымын» да «Кедрын», а сідзжӧ Крымын «Северное сияние» санаторийын.
Комиын Соцфонд юкӧнсянь вичмӧдӧма вермытӧм челядьлы Россияса санаторийясӧ 160 путёвка.
<> Гижӧдсӧ дасьтіс Александра Артеева.
Снимокыс ӧтуввезйысь.