Коми Республикаса Росгвардия управлениеын пресс-конференция дырйи регионса управлениеӧн, лицензия-разрешение сеталан шӧринӧн да вневедомственнӧй охрана управлениеӧн юрнуӧдысьяс висьталісны журналистъяслы асланыс удж да водзӧ кежлӧ могъяс йылысь. Аддзысьлӧмсӧ котыртлісны тшупӧда кык паскӧд йитӧдын: ведомствосӧ лӧсьӧдӧмсянь тырис 10 во да правопӧрадок видзан войскалы 215 во.
Погонаяс вӧчисны Росгвардия подразделениеясын кольӧмвося уджлы кывкӧртӧд, тӧдмӧдісны вермӧм-шедӧдӧмторъясӧн, а сідзжӧ водзӧ вылӧ урчитӧм тӧжд-могӧн. Торйӧн висьталісны вневедомственнӧй охрана, лицензия-разрешение сеталан да спецназначение полиция подразделениеясӧн збыльмӧдӧм удж йылысь. Вайӧдісны и стӧч лыдпасъяс: уна-ӧ стрӧйба видзӧны-дорйӧны, мыйта ӧружие-боеприпас мырддьӧма да сідз водзӧ.
Дӧзьӧр улын – 2.824 стрӧйба…
Сідз, Росгвардия управлениеӧн веськӧдлысь, полицияса генерал-майор Алексей Петренко висьталіс, мый нацгвардияса вневедомственнӧй охрана дӧзьӧр улын Комиын 2.824 стрӧйба-учреждение.
Погонаяс видзӧны йӧзлысь 2.790 патера-керка да эмбур, а сідзжӧ 136 транспорт, на лыдын школаса 20 автобус да тэрыб отсӧг сетан 21 машина.
Генерал-майорлӧн юӧртӧм серти, 2025 воын вневедомственнӧй охранаса сотрудникъяс 3,3 сюрсысь волӧмаӧсь тревога сигнал серти. Тадзи 82-ысь абу лэдзӧмаӧсь гусясьны.
Патрульӧн ветлӧдлігӧн пӧрадок торкалӧмысь кутӧмаӧсь 2,3 сюрс мортӧс, на пӧвстысь 365-ӧс – мыж вӧчӧмысь. Кутӧмаяссьыс комынсӧ вӧлӧм туялӧны-корсьӧны нин.
…да дас нёль кар-районын транспорт
–Вневедомственнӧй охрана дӧзьӧритӧ республикаса 14 кар-районын транспорт.
Та могысь машина-автобусӧ пуктӧны торъя оборудование, кысянь юӧрыс воӧ охрана пультӧ, да ми аддзам, кӧні транспортыс.
Сигнал сертиыс сэсся сотрудникъяс мунӧны сэтчӧ, лӧньӧдӧны кам
пужитчысьсӧ либӧ нуӧдӧны аскӧдыс, – висьталіс генерал-майор.
Алексей Петренко серти, бӧръя кадас тшӧкыда уськӧдчылӧны медицина отсӧг сетысьяс вылӧ.
Бригадаыс локтӧ вызов серти, а сэні на вылӧ ыршасьӧны шома юраяс. Ухтаын ӧти татшӧм корӧм серти воӧм медикъяс вылӧ мужичӧй усьласьӧма-шенасьӧма пуртӧн.
Боеприпас, ӧружие, дурмӧдчантор…
Полицияса спецназначение подразделениеясысь «Зырянин» ОМОН да «Заря» СОБР 2025 воын кутӧмаӧсь 344 мортӧс, кодъяс дасьтысьӧмаӧсь ӧружиеӧн вӧчны мыж.
–Миян подразделениеяс отсалӧны УФСБ-са да МВД-са сотрудникъяслы кутны мыж вӧчысьясӧс, тшӧтш и ӧружиеаясӧс, – висьталіс Росгвардия управлениеӧн веськӧдлысь, полицияса генерал-майор Алексей Петренко. – Мӧйму кутісны 344 мортӧс, та дырйи лои мырддьӧма 7 ӧружие, 7,9 сюрс боеприпас, 2,7 килограмм взрывайтчан сорас да 5,5 килограмм дурмӧдчантор.
Таысь кындзи мырддьӧмаӧсь 20,5 миллионысь унджык шайт дон сьӧм да мукӧдтор.
Медся уна – «Россияса поштаын»
Росгвардияса управлениеысь государственнӧй контроль юкӧнын уджалысьяс кольӧм во 115-ысь волӧмаӧсь прӧверкаӧн социальнӧй тӧдчанлуна да топливно-энергетическӧй комплексса предприятие-организацияӧ.
–Топливно-энергетическӧй комплексса 127-нан объект-стрӧйбаыс миян торъя дӧзьӧр улын, сы вӧсна мый буретш сэні вермасны вӧчны теракт либӧ лыйлыны-взорвитны пилоттӧг лэбалан аппаратӧн, – гӧгӧрвоӧдіс Алексей Петренко.
115 прӧверка дырйиыс казялӧмаӧсь 236 торкалӧм, 23-лаын абу збыльмӧдӧмаӧсь водзтіджык сетӧм предписание-тшӧктӧм.
Террорысь видзчысьӧм кузя индӧдъяс серти торкалӧмыс пӧ паныдасьлӧ быдлаын: велӧдан, спорт, дзоньвидзалун видзан юкӧнъясын, но медся уна – «Россияса пошта» стрӧйбаясын.
Повтӧм боечьяс
–Торъя военнӧй операция пансьӧмсянь Комиын Росгвардияса 153 сотрудникӧс пасйӧма государственнӧй наградаӧн, – юӧртіс журналистъяскӧд аддзысьлігӧн Алексей Петренко.
–«Зырянин» ОМОН-ысь да «Заря» СОБР-ысь боечьяс пыр сэнӧсь. Мобильнӧй огневӧй котыръяскӧд ӧтув найӧ збыльмӧдӧны пуктӧм могъяс, сайӧдӧны овмӧдчӧминъясын зэв тӧдчана стрӧйба-объект, а сідзжӧ видлалӧны блокпостъясын пропуск, – гӧгӧрвоӧдіс генерал-майор.
Таысь ӧтдор Комиысь росгвардеечьяс бырӧдӧны диверсионно-разведывательнӧй группаяс, ӧружие да взрывайтантор дзебанінъяс, а сідзжӧ отсалӧны пӧрадок видзысьяслы эрдӧдны-кутавны мыж вӧчысьясӧс.
–Росгвардияса боечьяслы наградаясыс вичмисны повтӧмлунысь. Ӧти яръюгыд пример – Купянскын мирнӧй олысьясӧс артобстрел дырйи мездӧм да эвакуируйтӧм. Миян сослуживечьяс сэки мукӧдыскӧд тшӧтш кутісны оборона да петкӧдісны йӧзсӧ би улысь, – висьталіс Росгвардия управлениеӧн веськӧдлысь.
«Зырянин» ОМОН-ысь боечьяс эвакуируйтӧмаӧсь Белгород обласьтса медучреждениеясын куйлысьясӧс, а «Заря» СОБР-са сотрудникъяс мездӧмаӧсь-петкӧдӧмаӧсь би улысь школа-интернатын велӧдчысь челядьӧс. Налӧн зільӧмӧн мирнӧй олысьяс кольӧмаӧсь ловйӧн.
Алексей Петренко казьтыштіс Комиысь боевӧй могъяс збыльмӧдігӧн пӧгибнитӧм росгвардеечьясӧс – «Зырянин» ОМОН-ысь капитан Алексей Опацкийӧс да старшӧй лейтенант Михаил Ребенокӧс. Кыкнаннысӧ пасйӧма Мужество орденӧн. <>
Елена Плетцер.
Снимокъясыс ӧтуввезйысь.