Мылдінын чужлӧм Евгений Растворовлӧн уджыс ньӧти абу йитчӧма кинематографкӧд, но сійӧ тшӧкыда снимайтчылӧ шоу-бизнесса нималана кодзувъяскӧд тшӧтш.
Софит улын петкӧдчынысӧ Евгенийлы лоӧма окота тшӧтш и содтӧд сьӧм нажӧвитӧм могысь. Культура юркарӧ, кӧні ӧні олӧ том морт, тшӧкыда волывлӧны съёмочнӧй котыръяс да нималана йӧз. Евгений висьталіс уна йӧза сценаясын аслас удж йывсьыс, мыйта таысь мынтӧны, да кутшӧм артистъяскӧд тӧдмасьӧма нин.
–Евгений, тэ чужин Мылдінын. Висьтышт ас йывсьыд.
–2013 воын помалі 2-ӧд номера школа. Помнита, первой классын ветлывлі театр кружокӧ, недыр котралі туристическӧйӧ. Ӧкмысӧд класс бӧрын муні Печораӧ велӧдчыны ю выв транспорт училищеын судноӧн веськӧдлысьӧ.
Уджалі Якутияын да Печора ю вылын. Ветлім Мылдінсянь Нарьян-Марӧ «Советский» теплоходӧн. Сэсся служиті армияын да овмӧдчи Санкт-Петербургын, кӧні ва вылын жӧ зіля.
–Артмӧ, карабсянь веськыда веськалін киноиндустрия бал вылӧ…
–Да ме сӧмын аддзи уна йӧза сценаясын снимайтчыны актёръясӧс корсьӧм йылысь юӧр. Ас кежысь мӧвпышті, мися, содтӧд нажӧткаысь ог ӧвтыштчы, да шуи видлыны веськавны сэтчӧ. Некымынысь шыӧдчылі, но дзик пыр эз босьтны.
–Кӧнкӧ, ичӧтдырсяньыд актёралан сямыд эм, кӧсйин лоны нималанаӧн?
–Некор эг кӧсйы. Коркӧ сэсся звӧнитісны жӧ, корисны «Тайны следствия» сериалын 20-ӧд сезонын петкӧдчыны. Коліс пукавны барын да чурскыны сур (збыльвылассӧ лимонад). Та бӧрын нин тшӧкыдджыка кутісны чукӧстлыны.
Ворслі ДПС-са сотрудникӧс, реклама-клипын ветлысь-мунысьӧс, кыкысь вӧлі блокада пыкысьӧн, нёльысь – шойӧн. «Метод Михайлова» сериалын менӧ вайисны машина багажникын да дзик пыр виисны.
Тайӧ съёмкаыс ёна ыззьӧдіс, козьналіс аслыспӧлӧс сьӧлӧмкылӧмъяс. Садьми сэки водз да площадкаӧ вои медводдзаӧн. Тӧдмаси актёръяс Кристина Корбуткӧд, Анна Мельниковакӧд да Евгений Серзинкӧд. А медым минутӧн-джынйӧн видзӧдны ачымӧс кадрын, ме виччыси быдса во!
–Кулӧм морттӧ ворсны, чайта, кокни: куйлы да эн лолав. А тэ эскан та кузя лёк приметаас?
–Снимайтысь-постановщикъясыс тадз кымын жӧ тшӧктӧны вӧчны. Дубльсӧ вӧчигӧн кӧнкӧ минут гӧгӧр он лолав, и ставыс.
А приметаад ме ог эскы. Меным шуд уси снимайтчыны «Мелодия Ленинграда» художествоа фильмын. Сэні массовкаас колісны ме кодь косіник йӧз. Ми вӧлім квайтӧнӧсь, на пӧвстын кодсюрӧ меысь на омӧлиникӧсь. Тадзи и пукалі лунтыр. Кӧть гримӧй вӧлі повзьӧдлана, шогӧ эг усь. Весиг мойвиис киноса кодзувъяс Алексей Кравченкокӧд да Игорь Ясуловичкӧд фотографируйтчыны.
–Кыдзи бӧрйысьӧны уна йӧза сценаясас?
–Сэтчӧ веськавны вермас дзик быдӧн. Ӧтуввезйын тшӧкыда йӧзӧдӧны массовкаӧ актёръясӧс корсьӧм кузя юӧрсӧ. Сэтчӧ шыӧдчигӧн индан ним-вич-овтӧ, арлыд-судта-сьӧктатӧ, оланінтӧ, телепон номертӧ да ыстан фото (портрет, став тушанад).
Тшӧкыдджыкасӧ вӧзйӧны ворсны ветлысь-мунысьӧс, висьысьӧс, быдсикас службаын уджалысьӧс да с.в. Ме Питерын ола да, кызвыннас тані снимайтӧм киноясын петкӧдча.
–Снимайтчан медводдза лунтӧ казьтылан?
–Сэки урчитӧм кадӧ водз асыв локті коланаинӧ, менӧ вочааліс массовка уджӧн юрнуӧдысьыс. И лунтыр виччыси моторсӧ. Сэккості лукйыси телепонын, варовиті мукӧд ворсысьыскӧд. И со кад кольӧм мысьт горӧдісны снимайтчыны. А тайӧс вӧчам пырджык 10-15 минут.
Овлӧ, фильм-сериалсьыс да реклама клипсьыс асьтӧ весиг он удит аддзывны кадрсьыс. Уна йӧз пӧвстас тыдовтчылӧ сӧмын мышкыд, балябӧжыд, бан бокыд, и векджык кӧнкӧ ылын. Стоп-кадрын нин сэсся асьтӧ видзӧдлан. Тадзи снимайтчӧмсьыс вештӧны уна вылӧ сюрс шайт. Абу ыджыд сьӧм, но сэк жӧ позьӧ аддзысьлыны нималана актёръяскӧд, вӧчны накӧд фото. Ӧти кывйӧн, массовкаӧ вермас веськавны быдӧн.
–Дыр-ӧ нюжалӧ съёмкаыс?
–Менам медся кузь луныс вӧлі 16-сянь 23 часӧдз, а сэсся мӧд съёмкаыс квайт асылӧдз. Дыр ковмис снимайтчыны «Медиум» фильмын – дас кык час гӧгӧр. Таын нинӧм сьӧкыдыс абу, кызвыннас ӧд пукалан да виччысян ассьыд кад-чукӧстӧмтӧ. Тадзтӧ нырыд нюжавлӧ.
Казялі: снимайтчыны локтӧмсянь первойсӧ некод ӧта-мӧдыскӧд оз сёрнит, а сэсся варовмӧны – висьталӧны, коді кӧні петкӧдчис, кыдзи вердӧмаӧсь, уна-ӧ вештӧмаӧсь, кодкӧд фотографи-руйтчӧма.
Ӧти банклы реклама дасьтӧм могысь чукӧртчим водза-водз – 3 час 45 минутын. Снимайтісны эз ёна дыр – 10 часӧдз. Тайӧ кадколастас окота вӧлі сӧмын сёйыштны да узьны водны. Поводдяыс сэки вӧлі кӧдзыд. Миянлы водзвыв та йылысь юӧртісны да, сьӧрысь босьтім курткаяс, медым дубльяс костас эг гегдӧй.
–Кутшӧм картинаын, сериалын петкӧдчылін? Нималана режиссёр-актёръяс пӧвстысь кодкӧд уджавлін? Снимокъяс серти, весиг «Оскар» вылӧ номинируйтӧм Юра Борисовкӧд тӧдмасьӧмыд.
–Да, аддзысьлім сыкӧд «Капитан Велоногов бежал» фильм снимайтігӧн. Мукӧд актёрыс асьнысӧ кодзувъясӧн чайтӧны, нырсӧ лэпталӧны, да татшӧм дорас и матыстчынысӧ абу окота.
А Юра Борисов шойччан здукӧ ачыс матыстчыліс чолӧмасьны. Сэсся кытчӧкӧ ветліс да бӧр бергӧдчис. Зэв лӧсьыда варовитыштім да сёрнитчим съёмка бӧрын фотографируйтчыны. Миян пӧвстын вӧлі Комиысь нӧшта ӧти ныв, буракӧ, Усинскысь.
Съёмка бӧрын бара на сёрнитыштім сылӧн картинаяс йывсьыс, и сійӧ муніс метролань. Сэки и гӧгӧрвои, мый Юра – вежавидзысь рам морт.
Казьтыштны ставсӧ, кӧні снимайтчылі, ог нин вермы. Паметьӧ медсясӧ тшупӧмаӧсь «Тайны следствия 20», «Мелодия Ленинграда» (Алексей Кравченко, Игорь Николаевич Ясулович), «Метод Михайлова» (Александр Устюгов), «Медиум» (Павел Трубинер), «Условный мент-3» (Денис Рожков, Алексей Нилов, Егор Бакулин), «Полицейское братство» (Алексей Нилов, Юрий Ковалёв, Михаил Тарабукин), «Ледокол «Красин». Зэв нимкодь аслам опытысь. Чайта коркӧ веськавлыны на снимайтчан площадкаӧ.
Наталья Дидушко.
Евгений Растворовлӧн гортса архивысь снимокъяс вылын: Юра Борисовкӧд; «Ледокол «Красин» фильм снимайтігӧн.
<> Комиӧдіс Елена Плетцер.