Ноябрь 23 лунӧ опера да балет театрын лоӧ Россияса заслуженнӧй, Коми Республикаса народнӧй артистка Альфия Коротаевалӧн бенефис.
Нималана сьылысь 40 во гажӧдӧ искусство радейтысьясӧс сьылӧмӧн. Творчествоын тшупӧда пас кежлӧ «Войвыв колипкай», тадзи поклонникъяс ыдждӧдлӧны артисткаӧс, бӧрйӧма Евгений Птичкинлысь «Бабий бунт» оперетта.
Бенефис водзын Альфия Коротаева аддзысьліс «Коми му» газетса корреспонденткӧд.
–Мыйла бӧрйинныд буретш тайӧ опереттасӧ?
–Сійӧ некымын во нин миян театр репертуарын. Спектакльыс бур, зэв гажа да кыпыд. Петкӧдчӧ сэні ставнас труппаыс. «Бабий бунт» сьӧлӧм вылас воӧ и видзӧдысьлы, и миянлы, артистъяслы. Чайта, зэв бура лӧсялӧ юбилей пасйигӧн.
Кор сӧмын на пуктісны тайӧ опереттасӧ миян театрын, ме сэні ворсі Настяӧс, ӧні арлыда-джыкӧс нин – Семёновнаӧс.
Сьывнытӧ ставӧн кужам…
Альфия Коротаева чужӧма Челябинскын, кыдзи ачыс висьталӧ, рабочӧй семьяын: бать-мамыс уджалӧмаӧсь металлургия заводын. Батьыс мастера гудӧкасьӧма, а мамыс мичаа сьылӧма. Ичӧт Альфия кӧсйӧма лоны сьылысьӧн. И кор мамыслы та йылысь висьталӧма, сійӧ шуӧма: «Сьывнытӧ ми ставӧн кужам. А кодӧн кӧсъян уджавны?».
Семьяыс олӧма гӧля. Гортас весиг телевизорыс абу вӧлӧма. И Альфия тшӧкыда котралӧма пӧдруга дорас, кӧні кывзӧмаӧсь пластинкаяс. Альфия, кыдзи висьталӧ, ӧдйӧ велалӧма ливкйӧдлыны пластинкаысь сьыланкывъяссӧ.
Чеччыштӧма Марсель вылӧ
Мӧд муслун – фигурнӧя исласьӧм. Ичӧтдырйисӧ Альфия радейтӧма спорт. И весиг мӧвпалӧма школа бӧрас пырны водзӧ велӧдчыны Ленинградса физкультура институтӧ. Колӧ шуны, спорткӧд ёртасьӧмыс абу весьшӧрӧ кольӧма. Сьылысь и ӧні бобув моз жбыръялӧ спектакльясын. Сійӧ вермӧ кокньыда чеччыштны партнёр вылас. Шуам, кыдзи Джакомо Пуччинилӧн «Богема» операын.
–Репетиция дырйи Михаил Журков (ворсіс Марсельӧс) висьталіс, мый ӧтуввезйысь аддзы-лӧма, кыдзи Мюзетта (а ме ворсі сійӧс) чеччыштӧ Марсель вылӧ. Ми юалім режиссёрлысь, позяс-ӧ тадзи? Позяс пӧ. И ми вӧчим тайӧс! И коркӧ ӧтчыд спектакль дырйи, кор ме бара чеччышті сулалысь Марсель вылӧ, залсянь кодкӧ горӧдіс: «Браво!». Спектакль помын Валентина Судакова, сэки сійӧ директораліс, висьталіс, тайӧ пӧ вӧлі генерал Мануйло. Генерал-майор Олег Мануйло веськӧдліс Комиын МЧС управлениеӧн. Бӧрти унаысь петкӧдчылі налӧн профессиональнӧй гаж дырйи.
Ачыс аслыс модельер
Колӧ пасйыны и, мый енбиа сьылысь Альфия Коротаева вылыс паськӧм вурысь витӧд разряда мастер. Школа бӧрас сійӧ ветлӧма велӧдчыны Ивановоӧ, но пӧдругаясыс да мамыс корӧмаӧсь бӧр локны Челябинскӧ, кӧні тшӧтш вӧлӧма вурсьыны велӧдан училище. И специальносьтсӧ босьтӧма сэні. Сценавывса паськӧмсӧ прима мичмӧдӧ-вурӧ ачыс. Шуам, бӧръя уджыс сылӧн «Мёртвые души» мюзикл кежлӧ. Альфия Коротаева вӧчӧма сьыліас баситчантор.
–Костюм серпасалысь, режиссёр абу паныдӧсь?
–Абу. Ме ӧд вӧча, мед лӧсяліс и рӧм, и стиль сертиыс. Ме ичӧтсянь бура вурси. Висьтала тай, олім гӧля, а мичаа пасьтасьны окота вӧлі. Важсьыс выльсӧ уна лӧсьӧдлі. А училищеын нин велӧдісны вурсьыны бура.
«Ньӧбисны» ярманга вылысь
Комиӧ Альфия Коротаева локтӧма 1985 воын. Кыдзи висьталӧ, «ньӧбӧмаӧсь» консерватория помалысьяслӧн ярманга вылысь.
–Водзтісӧ театрса режиссёръяс, веськӧдлысьяс локтӧны вӧлі консерваторияӧ и бӧръя концерт дырйиыс бӧрйӧны аслыныс «тӧварсӧ». Менӧ кӧсйисны «ньӧбны» унаӧн, – нюмсорӧн казьтылӧ Альфия Коротаева. – Сэки Сыктывкарын опера да балет театрса режиссёрӧн вӧлі Михаил Гусев. Сійӧ меным и вӧзйис тані удж.
Первойсяньыс Альфия, дерт, абу шӧр партияяс сьылӧма. Но регыд артисткалӧн енбиыс яръюгыд кодзув моз дзирдыштӧма. Ӧні артисткаӧс радейтӧны да бура тӧдӧны Комиын, Россияын, тшӧтш и суйӧр сайын олысьяс.
–Ті асьнытӧ кыланныд шудаӧн? Вӧвлі-ӧ мӧвп, мый сорсинныд карнас, театрнас? Гашкӧ, вӧлі дум мунны татысь?
–Дерт, унатор вӧзйылісны. Сыктывкарӧ вотӧдз на Омскӧ думайті мунны. Но татчӧ локтӧм бӧрын, пӧжалуй, некор эг каитчыв. Тані менам ставыс артмис. Видзӧдысь менӧ радейтӧ, удж вылын пыдди пуктӧны. И мыйла мунны, кыськӧ бокысь творчество шуд корсьны?
–Ті петкӧдчанныд опереттаын, операын, мойдын. Концертъяс – меломанъяслы яръюгыд козин. Матысса кадӧ кутшӧм выль постановкаысь вермам аддзывны тіянӧс?
–Дерт, менам кызвын рольыс – лирическӧй дама. Но ме ворслі и Ёмаӧс, и фальшивомонетчицаӧс, и весиг эм мужичӧй роль – ме мойдын Черепаха вок. Ӧнӧдз некор эг ворслыв арлыдаясӧс. И мый ӧні «Бабий бунтын» ме арлыда ань – Семёновна – вӧлі стресс. Ковмис ёна уджавны рольыс вылын. Видзӧдалі и кино, и арлыда йӧз бӧрся. Но Семёновналӧн рольыс меным зэв ёна воӧ сьӧлӧм вылӧ.
Выль во кежлӧ театр дасьтӧ челядьлы Россияса композитор Ефрем Подгайцлысь «Дюймовочка» опера-мойд. Ханс Кристиан Андерсенлӧн мойдыс лоас бур козинӧн и челядьлы, и бать-мамлы. Ме сэні ворса землеройка-шырӧс. Тайӧ куас менӧ некор на некод эз аддзыв.
Радейта пусьыны
–А мый тіянлы олӧмас медшӧрыс?
–Театр да семья. Ме зэв ёна радейта пусьыны-пӧжасьны. Дасьта мыйкӧ, шуам, пирӧг, шаньга, печенньӧ, да чӧсмӧдла рӧдвужӧс, ёртъясӧс. Ӧтуввезйысь кӧ аддзыла кутшӧмкӧ аслыспӧлӧс блюдо, быть лоӧ окота аслым вӧчны. Тӧв кежлӧ заптыся: косьті петшӧр (петшӧра шыд радейта), лежнӧг, воййыв турун, пуи колля варенньӧ.
–Альфия, а кыдзи видзны гӧлӧс, мед сійӧ бура юргис? Гашкӧ, тіян эм гуся рецепт?
–Ме чайта, быд сьылысьлӧн аслас уна тӧдӧмлун эм та могысь да, весиг монография вермас гижны. Медшӧрыс, дерт, диета, режим, гӧлӧслы упражнение-зарядка. Витаминъяс позьӧ юыштны, йӧзкостса рецепт серти да. Шуам, ме дасьта микстура: анис тусь, ма да дзоля пань коньяк. Колӧ сійӧс панявны десерт паньӧн. А медшӧрыс, дерт, видзӧдысьлӧн муслун. Ӧта-мӧдкӧд юксям энер-гияӧн да, та вӧсна и томӧсь.
Екатерина МАКАРОВА. Снимокъясыс Коми Республикаса опера да балет театр архивысь.