Сентябрын Изьва районса челядьлы шӧринысь ыджыд опыта педагог Михаил Городиловлы сетісны «Россия Федерацияса велӧдан юкӧнын почёта уджалысь» ним. Ми сёрнитім Михаил Владимировичкӧд творчество, быдтасъяс да матысса кад кежлӧ могъяс йывсьыс.
–Михаил Владимирович, кутшӧм сикас шылад ті радейтанныд? Мый кывзанныд шойччигад либӧ туйын?
–Томдырсянь нин, школаын велӧдчан кадсянь на зэв ёна радейта рок. Но рок-шыладтӧ кывзыны колӧ аслыспӧлӧс ловруӧн, та понда нималана да радейтана группаяссӧ ог тшӧкыда чуткыв. Шойччыны, быдлунъя тӧжд-нокысь вунӧдчывны да сьӧлӧм-лов бурмӧдны отсалӧ итальянеч эстрада. Налӧн ачыс кывйыс нин юргӧ сьылана-мичаа.
–Мый тіянӧс ышӧдӧ творчествоӧ, выльтор гижӧмӧ? Казьтыштӧй кутшӧмӧскӧ.
–Гижнысӧ век ышӧдӧ кутшӧмкӧ лоӧмтор. Ловру вежан, творчествоӧ босьтчыны ыззьӧдан лоӧмтор. Шуам, коркӧ мам гу дорын вӧйтчылі челядьдырся казьтылӧмъясӧ. Сэки шойнаас кыкӧн сӧмын вӧлім. Нӧшта ӧти мужичӧй вӧлі локтӧма неважӧн кувсьӧм гӧтырсӧ казьтыштны. Гӧрбыльтчӧм мышка, кынмӧм морт вылӧ видзӧдігӧн и кывъясыс юрӧ воисны, да гижи «Одиночество» сьыланкыв. «Помянем, брат» чужис, кор Изьва районӧ воис Афганистанын тыш-косьын усьӧм медводдза салдат йылысь юӧр.
И мӧдарӧ, шмонитны кужӧмӧй век отсавліс венны быдсикас гӧрӧд-сьӧкыдлун, да та вӧсна и сьыланкывъясыс артмылісны кокньыдикӧсь, йӧктанаӧсь. Буретш татшӧмъяс лыдын «Ижма», коді вужвыйӧныс торъялӧ ичӧт чужанін йылысь таӧдз гижлӧм мича лирика сьыланъясысь. «Чудаки» – гитараӧн ворсысь да гудӧкасьысь костын венлы сиӧма: кыкнанныс эскӧдӧны, мый сылӧн шылада ворсанторйыс йӧзыслӧн медся радейтана. А со «Художник» сьыланкывйӧс ме эськӧ шуи автобиографическӧйӧн.
–Тіян видзӧдлас серти, творчествоын мый медся тӧдчанаыс, гашкӧ, и сьӧкыдыс на?
–Медся коланаыс – казявны тыдаланасӧ, быдӧнлы тӧдсасӧ, матыссасӧ. Мед сійӧ вӧлі гӧгӧрвоана ставныслы. Медым кывзысьыс тӧдіс сьыланас мыйкӧ ассьыс, мусаӧс да донаӧс.
А нӧшта тӧдчана, медым тэнад вӧлі аслад кывзысь, видзӧдысь, сӧвет сеталысь. Морт, кодлы помтӧг, аслыд моз эскан да дӧверяйтан. Меным та серти мойвиис: уна во нин татшӧм кывзысь-чуйдысьыс, донъялысь-сӧветуйтысьыс да тшӧтш и соавторыс мекӧд орччӧн – Ирина гӧтырӧй.
–Та кузя ме тіянкӧд дзик сӧглас. Челядь-томуловкӧд сы дыра уджалігӧн мыйта быдмысь войтыр мунісны тіян ки пыр? Кымын котыр петкӧдчис-водзмӧстчис проектъясын? Казьтыштӧй лыддьысьысьлы группаястӧ да уджтасъястӧ.
–Ог сорсьы, шуа кӧ, мый некымын сё ныв-зон. А котыръяссӧ кӧ казьтыштны, тайӧ «Спектр», «Константа», «Steps», «Live sound-1», «Live sound-2», «Respect» да медся ыджыд проект – «Изьваса кодзувъяс».
–Тіян медся нималана быдтас-выпускникъясыд?
–Коми Республикаса драма театрын ворсысь, сьыланкыв гижысь Владимир Рочев, вокал кузя педагог, тшӧтш сьыланкыв тэчысь Елизавета Леуш, Изьваса школаын педагог-организатор Светлана Шалабудова, вӧвлӧм телеведущӧй, а ӧні ассьыс медиапроектъяс збыльмӧдысь нималана Инесса Орёл.
–Кутшӧм могъяс пуктанныд творчествоад матысса кад кежлӧ?
–Дасьтам нин выль программа. Ог ошйысь, но артмис челядьлӧн зэв вына-сяма, яръюгыд да мича котыр. Сэні водзмӧстчӧны Изьваса искусствояс школа помалысьяс: гитараӧн ворсысьяс Аня Тропина да Катя Гичева, ассьыс уджсӧ помтӧг радейтысь енбиа барабанщик Вова Родионов, Игорь Артеев, а сідзжӧ Василиса Витязева да Тимофей Незеев. Выль уджтаснас медводдзаысь петкӧдчим октябрь 4 лунӧ юрсиктса «Чайка» кафеын велӧдысьяслы «Не повторяется такое никогда» рытпук дырйи. Стӧча тӧда, миян ставыс артмис. А сёрӧнджык сэсся кытшовтам районса став культура керкасӧ, волам тшӧтш медся ылі сикт-грездӧ.
–Мый мэтр вермас вӧзйыны налы, кодъяс кӧсйӧны видлыны ассьыныс вынсӧ да петкӧдчыны творчествоын, но мыйлакӧ вежавидзӧны-полӧны? Мыйӧн татшӧмыслы позьӧ ыззьыны, вӧчны медводдза воськовъяссӧ?
–Уськӧдӧй тӧд выланыд ичӧтдыртӧ! Тіянлы ӧд юраныд эз волы, мый серпасыд, пластилинысь лепитӧмторйыд либӧ киӧн мукӧд вӧчӧмторйыд оз во матысса-тӧдсаыдлы сьӧлӧм выланыс? Дерт, эз! Ті котӧрӧн уськӧдчывлінныд мам-батьыд да пӧль-пӧч дораныд ошйысьны кипом уджнад, нимкодьӧдны найӧс. И сійӧ кагаыс век пытшканыд, олӧ нэмсӧ! Ладмӧдчӧй сыкӧд, кывзысьӧй да видлӧй мыйкӧ выльтор, петкӧдлӧй, мукӧдыскӧд тшӧтш донъялӧй-видлалӧй, сӧвмӧй-быдмӧй, велӧдчӧй, чӧжӧй опыт да сям. А кывзысь, видзӧдысь, лыддьысьысь отсалас тіянлы таын!
–Михаил Владимирович, аттьӧ тіянлы сёрнисьыныд да выль вермӧмъяс водзӧ вылӧ!
* * *
Михаил Владимирович Городилов чужӧма 1965 вося март 6 лунӧ Архангельск обласьтса Амдерма посёлокын. 1970 воын семьянас локтӧмаӧсь овны мам чужанінас, Изьваӧ. Ичӧтдырсяньыс водзмӧстчӧма быдсикас концерт-петкӧдчӧмын. Школаас котыртӧма да ворсӧма-сьылӧма «Ровесник» ВИА-ын.
1982 воын Изьваса школа помалӧм бӧрын пырӧма босьтны тӧдӧмлун Воркутаса училищеын йӧзкостса инструментъяс юкӧнӧ. 1983-1985 воясӧ служитӧма армияын, а ас сиктӧ бергӧдчӧм мысьт вӧзйӧмаӧсь комсомол райкомын трудӧвӧй воспитание кузя инструкторавны. Тайӧ жӧ кадас райком бердын котыртӧма томуловлы коммерческӧй шойччан шӧрин. Прӧст кадас сьылӧма-ворсӧма районса культура керкаын вокально-инструментальнӧй ансамбльын.
Изьва районса культура керкаын зілигӧн нин 1992 воӧ помалӧма Перымса культура да искусство институт, босьтӧма шойччан кад котыртысь методист-организатор специальносьт. 1999-ӧдӧ районса челядьлы шӧрин бердын лӧсьӧдӧма томуловлы «Спектр» ВИА, кодлы кызвын сьыланкывсӧ ачыс и гижӧма. Татшӧм ногӧн ансамбльлӧн вӧлӧма кызьысь унджык авторскӧй сьыланкыв, гижӧмаӧсь 2 альбом да республикаса телевидениеын видеороликъяс.
2005 восянь Михаил Владимирович збыльмӧдӧ «Изьваса кодзувъяс» проект. Тайӧ кадӧн вежсьӧма нин некымын состав, ансамбльыс унаысь вермыліс республикаса да ставроссияса конкурсъясын.
Игорь Колесов.
<> Комиӧдіс Елена Плетцер. Снимокъясыс Михаил Городиловлӧн гортса архивысь.