Торъя военнӧй операцияын повтӧмлунысь Малой позывнӧя морпехӧс чолӧмаліс республикаӧн веськӧдлысь Ростислав Гольдштейн.
Малой чужӧма Кулӧмдін районын военнӧй семьяын. Батьыс служитӧма морскӧй пехотаса 61-ӧд бригадаын, и пиыс мунӧма сылӧн жӧ туйӧд. Кор сылы тырӧма дас кӧкъямыс арӧс, да воӧма армияӧ пӧвестка, ачыс кырымалӧма контракт да ыджыд вокыс моз жӧ мунӧма торъя военнӧй операция нуӧданінӧ.
Войскалӧн «Днепр» группировкаса аслас подразделениеын сійӧ вӧлӧма медся том (неважӧн на кызь арӧс тырӧма), та вӧсна и Малой позывнӧйсӧ босьтӧма.
Кӧть и том, но повтӧмлуннас да кужӧмлуннас арлыдаджык ёртъяссьыс абу торъялӧма. «Сув-тӧдісны кӧ мог – збыльмӧдам сійӧс, эз на кӧ – тренируйтчам да велӧдчам», – висьталіс фронтвывса олӧм йывсьыс том морт. Да содтіс, тадзи пӧ туйдіс миянӧс овны да тышкасьны ротаысь Пивыч позывнӧя командирным. И тайӧ жӧ пӧ отсаліс кольны ловйӧн Днепр ювывса ді вылын вӧрӧглы паныд косьын.
Буретш кось водзас, 2025 вося майын, Малой казьтыштӧма прадед-фронтӧвикыслысь висьтасьӧмсӧ, кыдзи ӧружиетӧг, кинас, тышкасьӧма вӧрӧгкӧд. А мӧд лунас нин косьын Малой ранитчӧма, ёртъясыс пӧгибнитӧмаӧсь. Сылы паныд петӧмаӧсь Украинаса куим салдат, но сійӧ абу повзьӧма ни абу шӧйӧвошӧма, кык всушниксӧ бырӧдӧма, а коймӧдсӧ босьтӧма пленӧ. Малойлӧн тшӧктӧм серти пленӧ босьтӧм украинечыс радио пыр юӧртӧма аслас командиръяслы, ставыс пӧ бур, и индӧма лыйлыны сэтчӧ, кӧні абу вӧлӧмаӧсь ни миян салдатъяс, ни техника.
Медым бӧр петны асланым позицияӧ, рация пыр ассьыс координатасӧ Малой юӧртӧма комиӧн. Украинечьясыд комитӧ оз гӧгӧрвоны, и тӧдмавны, кӧні сійӧ, абу вермӧмаӧсь. Юӧрсӧ примитысьыс коми морт жӧ вӧлӧма, да ыстӧма Малой дорӧ эвакуируйтан группа. А миян артиллерия стӧч координата серти бырӧдӧма вӧрӧгъясӧс. Кӧкъямыс час гӧгӧр кыссьӧма тайӧ операцияыс.
–Ме сӧмын, гашкӧ, вежон мысти тырвыйӧ вежӧрті, мый лоис, и мый ёртъясӧс он нин бергӧд, – висьталіс Малой. – Дум вылӧ сэки уси, мый пленӧ босьтӧм украинечыс ӧбраз на перйис да кевмысьны кутіс. Ме быд тыш водзын Ен дорӧ жӧ шыӧдчыла, ловйӧн кӧ сэтысь пета – и бур!
Бурдӧдчӧм бӧрас Малой водзӧ кӧсйӧ контракт серти служитны.
–Кутшӧм отсӧг тіянлы медся ёна колӧ фронт вылас?
–Мед эськӧ унджык «птичка» (дрон) вӧлі, ӧні натӧг некыдз. А Рӧдинасянь отсӧгыс тырмымӧн. И ёртъяс пӧвстын землякыс уна, тайӧ шонтӧ сьӧлӧмӧс и лолӧс.
Тайӧ лунъясӧ Малой воліс чужанінас дженьыд отпускӧ, и Ростислав Гольдштейн аттьӧаліс сійӧс службаысь да пасйис, мый Коми Республика гӧрдитчӧ Айму дорйысьясӧн.
–Медся сьӧкыд здукӧ Малой юӧрсӧ ыстӧма абу шифруйтӧмӧн, а чужан коми кывнас. Тайӧ петкӧдлӧ сылысь военнӧй мудерлунсӧ. Сідзкӧ, миян зонъяс абу сӧмын вир-яйнас ёнӧсь. Налӧн вынныс бать-пӧльсяньыс, чужан муыскӧд топыд йитӧдсянь. Наӧн гӧрдитчӧны и матысса рӧдвужыс, и ставнас Коми Республика. И миян мог вӧчны ставсӧ, мед спецоперацияын служитысь землякъясным тӧдісны: гортаныс найӧс радейтӧны да виччысьӧны Победаӧн, – висьталіс республикаса юралысьлысь удж вӧчысь.
<> Гижӧдсӧ дасьтіс Павел СИМПЕЛЕВ. Снимокыс ӧтуввезйысь.