Июнь 1 лунӧ ми пасъям Челядьӧс доръян войтыркостса лун. А ичӧтдырся казьтылӧмъясыд век медся шоныдӧсь да мусаӧсь. Со кыдзи аддзӧ-помнитӧ тайӧ ылӧ бӧрӧ кольӧм кадсӧ «Коми му» газетса бур ёрт, Изьваысь Игорь Колесов.
Челядьдырся казьтылӧмыд медся шоныд
Казьтылӧмъясӧ вӧйтчывлігӧн стеклӧблок пыр моз выльысь и выльысь видзӧдала здукъяссӧ. Сюся видзӧдала быд чужӧм, гӧгӧртассӧ да весиг рӧмъяссӧ. Серпасъясыс дженьыдикӧсь — 10 секундасянь минут джынйӧдз. И медшӧр геройыс сэні — куим-вит арӧса зонка. Тайӧ зонкаыс — ме ачым. Стеклӧблоксӧ кӧ пасьнитны-жугӧдны, пытшкас нинӧм оз коль, та вӧсна видзӧдала руа-гудыркодь серпасъяссӧ…
«Катшасина» кад
Челядьлы «Ромашка» садйыс вӧлі дзик Изьва сикт шӧрын. Яслиысь миянӧс вуджӧдісны сэтчӧ нёльӧд арӧс тыртігӧн, хрущёвдырся «оттепель» помасигӧн нин, 1968 воын. «Ромашка» кадся менам ни ӧти снимок абу. Важӧн нин абу и садикыс. Сы местаын ӧні «Ростелекомлӧн» йӧр. Но садйӧ ветлӧм йывсьыс юрӧ кольӧма быдса нёль казьтылӧм-серпас.
Педаля вӧвъяс
«Ромашка» стрӧйбаыс вӧлі васӧд нюраинын да, гуляйтім ми ӧта-мӧдыскӧд пу москиӧн йитӧм некымын площадкаын. Медся ыджыд бердас вӧлі вевта веранда, коді чуксалӧмӧн чуксаліс миянӧс — сэні видзисны педаля вӧвъяс. Чибӧясыс вӧліны еджыдӧсь, а сийӧс-заводыс да кӧзла-пуклӧсыс — пемыдлӧзӧсь. Кӧрт поводъяснас рулитӧмӧн позьӧ вӧлі чожакодь «тӧвзьыны» моски чукыльясӧдыс.
Вӧлыс вӧлі этша, а ми унаӧнӧсь. И быд пӧрйӧ ӧчеред воигӧн либӧ медводдзаяс лыдын вӧв вылӧ пуксигӧн быдӧн вӧлі помтӧг шуда.
Шондіа, буракӧ, майся лун. Площадкаыс кос да пӧшти гурантӧм. Бергӧдла педальсӧ, веськӧдла вӧлӧн, а ылькйӧн петан нимкодьлуныс тшупӧ вежӧрӧ нэм кежлӧ…
(Тӧд вылӧ: педаля вӧвъяссӧ 1950-1980-ӧд воясӧ СССР-ын вӧчлісны оборона комплексса некымын заводын, шуам, Москваса «Салютын» да Омскса «Полёт» авиация заводын. 1970-1980-ӧд воясӧ тайӧ чачаыс вӧлі 21,5 шайта (а шӧркодь удждоныс — 80-120 шайт). Педаля вӧвсӧ ньӧбны вермисны лыдаӧн, но сы пыдди паркын татшӧмсӧ да педаля машинасӧ вӧзйылісны прокатӧ, и весиг детсадъяс могмӧдлісны. Сэк жӧ прокатӧ вӧзъян агрегатъясыс тшӧкыда вӧліны жугаланвыйынӧсь да дзуртісны, веськӧдлынысӧ наӧн сьӧкыд вӧлі и. Та вӧсна, тыдалӧ, йӧз костын чужис «педаля вӧв» нимтысьӧм — тадзи шулісны бӧбоват мортӧс. Кыдз помнита, вӧвнас веськӧдлынысӧ вӧлі сьӧкыдджык, но сы пыдди чибӧлӧн кокыс вӧрис, быттьӧ збыльысь котӧртӧ, а таысь вӧлі сэтшӧм нимкодь!)
Пузьӧдӧм йӧлӧн пытайтӧм
Медся ёна ме радейті лепитчыны. Юрӧ кольӧма керка вӧчан занятие. Ме эг кут мукӧдыс моз жӧ лепитны кубик, а мӧвпышті вӧчны ставсӧ ас ног. Быгльӧдлі ичӧтик калбасъяс, тэчи ӧта-мӧд вылас да вевтти нёль пельӧса плавкӧс вевтӧн. Керкаыс артмис эз сӧмын группаын медся ыджыд, но и мукӧдсьыс дзик торъялана. Сыысь менӧ ошкисны, вайӧдісны пример пыдди да пуктісны вӧчӧмторйӧс медся тыдалаинӧ.
Менам ныр улын пузьӧдӧм йӧв кружка. Дуксьыс нин вукӧдӧ, а виж кеньсьыс и дзик восӧдас. Мукӧд челядьыс важӧн нин лепитчӧны, а ме пукала. Найӧ кӧ, шуам, сьылісны-ворсісны ли котралісны, ме эськӧ верми лунтыр пукавны, но лепитчӧны да! Коді тадз пытайтнысӧ думыштӧма, ог нин помнит. Дзик на неважӧн «Старые фото Ижма» котырысь аддзи «Ромашкаын» зільысь-яслысь снимок да видзӧдлі «мучитысьяслы» синмас. Да, на пӧвстын вӧлі тшӧтш «тётя Савета», кыдзи ми сійӧс нимтім. Ок, шань сьӧлӧма морт. Сад пӧдлалӧм бӧрын сійӧ инасис пелькӧдчысьӧн «выль» школаӧ. Сэки уборщицалы коліс нӧшта и дежуритны да стӧрӧжавны, а таысь вичмӧдлісны школаын олан жыр. Тётя Савета тшӧкыда корліс миянӧс Марина Чупровакӧд ас ордас да чӧсмӧдліс рача* тшайӧн. Велӧдысь бать-мамным босьтлісны миянӧс аскӧдныс школаӧ субӧтаӧ ли вежалунӧ удж кузяыс кутшӧмкӧ чукӧртчылӧм вылӧ.
Ӧти кывйӧн, стӧкансӧ пӧрӧді здукӧн. Камӧбті-пукті кружкасӧ пызан вылӧ. Йӧлыс дзик пыр вӧзйысис петны ортсӧ. Син чашкӧдӧмӧн ме ланьті да тшӧкті сылы кольччыны пытшкын. Воспитатель, нянечка да пӧвар синмын тӧдчис шемӧсмӧм да ошкӧм. А ме кылі ачымӧс геройӧн, но сэк жӧ вӧлі забеднӧ, мый сетчи.
Дзик ӧтнам
Ог помнит, тулысын али арын тайӧ вӧлі, но стӧча эз тӧвнас. Мамӧ колльӧдіс менӧ туй чукыльӧдз да вӧзйис водзӧ мунны ӧтнамлы. Садйӧдз колис моски кузя метр витсё. Ӧтнамӧн сэтчӧдз воӧдчи медводдзаысь на да, ёнакодь майшаси-полі. Сёрӧнджык нин, гырысь классъясын велӧдчигӧн, мамӧ висьталіс, мый кузяла гусьӧн мунӧма ме бӧрся.
«Страшнегруппникысь» пышйӧм
Пышъя старшегруппникысь. Сійӧ меысь ыджыд да скӧр. Збыль «страшнегруппник»! Сійӧ корис менсьым чачаӧс, а ме эг сет. И со котӧрта верандасянь педаля вӧвъяса площадкалань моски кузя. Гӧнита мый вынысь. И кыла ачымӧс сабля пиня тигрысь пышйысь кроманьонецӧн…
_______
*Рача — кӧвдум, рача нянь.
Игорь Колесов. Комиӧдіс Елена Плетцер.
Снимокъяс вылын: «Ромашка» детсад 1970-ӧд воясӧ; «Ромашкаын» зільысьяс 1960-ӧд воясӧ; педаля вӧвъясӧн ветлысьяс.
<> Снимокъясыс авторлӧн да Владимир ФилипповлӦн.