Таво республикаса школаясын «Земский учитель» уджтас серти уджӧ босьтчис вит велӧдысь. На лыдын Любовь Константиновна Боярская, коді воис Санкт-Петербургысь Кӧрткерӧсӧ челядьӧс англия кывйӧ велӧдны.
Ыджыд карысь сиктӧ
–Любовь Константиновна, позьӧ шуны, ті ыджыд Петыркарысь вуджинныд грездӧ. Мыйла?
–Сідзи тай артмис. Гоз-мӧд во сайын та йылысь весиг и мӧвпыштны эг куж. Да и во сайын на дзик мӧд планъяс менам юрын гартчисны, но со тай олӧмыс вайӧдіс Комиӧ.
Веськыда кӧ шуны, менам тані, Сыктывкарын, олӧ мам. И колӧ вӧлі сы дорӧ матӧджык веськавны. Но уджтасӧ пырӧдчигӧн ме шыӧдчӧмӧс ысті и мукӧд регионӧ. Бӧрйи войвывладорсӧ: Карелия, Свердловск обласьт, Алтай, Перым край, Ылі Асыввыв. И быдлаӧ вӧлі позянлун мунны. Но бӧрйи коми сикт и, чайта, эг ворссьы. Тані меным и оланін вичмӧдісны, кӧть программа серти тайӧс абу урчитӧма. Таысь тшӧтш нимкодь. Сэсся вӧр-ваыс мича, синтӧ гажӧдӧ, быттьӧ роч Финляндияын. Кажитчӧ и коми кывйыс: мича да мыла. Весиг думайта велӧдны сійӧс.
–Семьяыд лэдзис, али тшӧтш воинныд?
–Позьӧ шуны, лэдзис. Верӧскӧд ми торйӧдчылім, а нылӧй ыджыд нин, ас кежас олӧ.
Любовь Константиновналӧн кывъяс серти, Кӧрткерӧсса школаын котырыс бура вочаалӧма. А веськӧдлысьыс, Эмма Николаевна Нестерова, менам олӧмын пӧ, пӧжалуй, медбур директор.
«Земский учитель» уджтас серти быть колӧ сетны челядьлы тӧдӧмлун вит во, но код тӧдас пӧ, гашкӧ, татчӧ и вужъяся.
Кыв да театр
Любовь Константиновналӧн челядьдырыс кольӧма Сыктывкарын. Школаын велӧдчигас сылы кажитчӧма англия кыв. Но велӧдысьыс тӧдӧмлунсӧ сетӧма омӧля да и гажтӧма.
Кодкӧ пӧ, гашкӧ, и мустӧмтны заводитіс кывсӧ, а Любалы, мӧдарӧ, окота лоӧма бурджыка велӧдны да и аслыс лоны велӧдысьӧн.
Но школа помалӧм бӧрын том нывлӧн дум-кӧсйӧмыс вежсьӧма. Кык во уджалӧма пӧжасьысь-кондитерӧн Выльгортса ӧти кафеын.
Нёль час асывсянь пӧ вӧлі муна удж вылӧ Сыктывкарса Орбитасянь, мед няньшом кӧтны. Кутшӧмкӧ кад уджыштӧма и «Националь» ресторанын. А сэсся гӧгӧрвоӧма, мый колӧ водзӧ ве-лӧдчыны.
–Во джын дасьтыси репетиторкӧд, англия кывйысь школаса программасӧ ставнас велӧді. Тыдалӧ, меын и кывъяс велӧдны сямыс эм, и, дерт, окотаыс. Но медводдза диплом серти ме роч кыв да литература велӧдысь, – водзӧ висьталӧ Любовь Константиновна.
Сыктывкарса университет помалӧм бӧрын том специалист мунӧма Санкт-Петербургӧ. Велӧдӧма и вузын, и сэтчӧс школаясын. Босьтӧма содтӧд тӧдӧмлун и англия кывйысь да театр нырвизьын. Любовь Константиновна нӧшта и театральнӧй критик.
–Ме ог вермы бӧрйыны, мый меным медъёна кажитчӧ: кыв али театр. Вузын велӧдчигӧн ачым ворслі студентъяслӧн театр студияын. Артистӧн эг ло, но спектакльяс вылӧ ветлыны радейта. Татчӧс театръясса афишасӧ видзӧдала, кута ветлывлыны, – висьталӧ сійӧ.
–Ті – Боярская. Театральнӧй кытшын тайӧ – нималана ов.
–Вузын велӧдігӧн унаысь менӧ сорсьӧмӧн Лизаӧн шулісны. Мися, ме Люба…
И казьтыштны кӧ Санкт-Петербургсӧ, сійӧ меным унатор мый сетіс. Буретш сэні ме лои сыӧн, коді ӧні эм. Весиг гажтӧмтча да вӧтала карсӧ. Но Коми му мичлуныс, татчӧс культура олӧмыс сьӧлӧм серти жӧ. Окота тӧдмасьны пыдісяньджык коми культураӧн, вужвойтыр оласногӧн.
Чужӧма велӧдысьӧн
–Ыджыд карса да сиктса челядь торъялӧны?
–И да, и оз. Быд кага ӧд торъялӧ ӧта-мӧдсьыс. И сэні, и тані эмӧсь челядь, кодъяслы суйӧрсайса кывйыс сетчӧджык, а кодлыкӧ сьӧкыдджыка юрас пырӧ. Но ме зіля ставнысӧ бура велӧдны. Торъя нин нимкодь, кор нывка либӧ зонка сӧвмӧ тэнад син водзын. Шуам, вӧлі «куим» вылӧ велӧдчӧ, а тэ ноксин, да бур «хорошист» лои.
–Велӧдысьяс пӧвстысь унаӧн репетиторалӧны. А ті со, мӧдарӧ, школаӧ локтінныд.
–Менам и сэні, и тані эм опыт. И тӧда уджаланногсӧ и велӧдысьлысь, и репетиторлысь. Школаӧ ме пыри уджавны Санкт-Петербургын. И медводдза кык воыс вӧлі, збыльысь кӧ, сьӧкыд. Весиг майшаси: мися, верма водзӧ уджавны али колӧ мӧд туйвизь бӧрйыны? Челядь дорӧ муслуныс эм. И висьталі нин, мый меным кажитчӧ налысь сӧвмӧмсӧ аддзыны. И веськыда кӧ шуны, ме классическӧй велӧдчӧм дор: класс да велӧдысь.
Репетиторалігӧн колӧ аслыд корсьны велӧдчысьяссӧ, ассьыд услуга ӧтилы-мӧдлы вӧзйыны. А школаын уджаланногсӧ котыртӧма нин, позьӧ шуны, тэтӧг. Сӧмын лок да уджав. Сэсся и велӧд-чысьӧс корсигӧн тшӧтш овлӧ, коркӧ найӧ унаӧн, а коркӧ и этшаӧн.
Кӧрткерӧсса школаын Любовь Константиновна велӧдӧ 2-ӧдсянь 9-ӧд классӧдз. Тайӧ пӧ тшӧтш медводдза опыт. Водзті разнӧй арлыда классъясын урок абу нуӧдлӧма. Кажитчӧджык пӧ гырысьяскӧд уджавны, но посни челядьысь тшӧтш водзӧсыс эм, меліӧсь да.
Водзӧ вылӧ, гашкӧ пӧ, и кута дасьтыны томуловӧс экзамен кежлӧ. Санкт-Петербургын дасьтылӧма нин. И колӧ шуны, ставныс бура сдайтӧмаӧсь английскӧйысь экзаменсӧ.
Любовь Константиновна ыджыд опыта педагог, та боксянь Кӧрткерӧсса челядьлы ёна мойвиис. Сылӧн весиг эм Кембридж университетысь сертификат, а сідзкӧ, вермас и суйӧр сайын уджавны. Тӧдӧ и француз кыв, вермас жӧ учителявны.
–Пӧжасьысь-кондитерыс тіянын олӧ на?
–Оз. Ме ог радейт пӧжасьны-пусьыны. Кӧть и кужа. Век жӧ менам, буракӧ, велӧдысьӧн чужсьылӧма. Тайӧ уджыс меным сьӧлӧм серти.
<> Екатерина МАКАРОВА.
Снимокъясыс Любовь БоярскаялӦн гортса архивысь да ӧтуввезйысь.