Сыктывкарын петкӧдлісны «Мамино письмо» художественно-документальнӧй фильм.
Москваса да став Русьса патриарх Кириллӧн бласлӧвитӧмӧн да «Материнское счастье» фонд отсӧгӧн вӧчӧмаӧсь сійӧс «Спас» телеканал да «Амальгама Студия» кинокомпания.
–Аттьӧала телеканалса генеральнӧй директор Борис Вячеславович Корчевниковӧс, мый миян лоис позянлун медводдзаяс лыдын видзӧдны фильмсӧ, – висьталіс Коми Республикаса юралысь Владимир Уйба. – Сэні кыпӧдӧма семьялысь традицияяс видзӧм, мамлӧн да батьлӧн кывкутана могъяс йылысь сёрни. Миян странаын вонас вӧчӧны 500 сюрссянь 1 миллион абортӧдз, сідзкӧ, оз чуж витсё сюрс сайӧ кага. И налысь олӧмсӧ видзӧмыс лоис нин государстволӧн тӧждӧн, ӧд оз нин позь ыстысьны «виччысьыштам на» да «мӧвпыштам на» вылӧ. Некор нин виччысьнысӧ, некор мӧвпавнысӧ. Колӧ унджык кагаӧс чужтыны. И «Мамино письмо» фильмыс, гашкӧ, ӧлӧдас кодсюрӧӧс лёксӧ вӧчӧмысь да видзас ичӧт мортлысь олӧмсӧ, видзас ставнас странанымӧс.
Республикаса филармонияын петкӧдлігӧн фильм йывсьыс висьтасис нималана журналист, Православнӧй телевидение фондса вице-президент, «Спас» телеканалса генеральнӧй директор Борис Корчевников.
–Нӧбасьӧм орӧдӧм йылысь некод оз сёрнит, фильмъяс, нӧшта и художественнӧйӧс, некод оз снимайт. Веськыда кӧ шуны, киноын уна йӧз водзын петкӧдлыны сійӧс абу лӧсьыд, – висьталіс сійӧ. – Владимир Викторович Уйба стӧча шуис, мый та йылысь сёрнисӧ «тӧрыт» нин коліс кыпӧдны. Комиын регыдъя кадӧн куим пӧв чинтісны аборт лыд – и тайӧ менӧ шензьӧдіс. Медым шедӧдны тайӧс, колӧ збыльысь тӧждысьны йӧз вӧсна. И фильмыс кӧ отсалас видзны кагаяслысь олӧм, мед сійӧс унаӧн видзӧдасны.
Фильмас висьтавсьӧ мам да ныв йылысь, кодъяслы колӧ бӧрйыны – чужтыны кагасӧ либӧ орӧдны нӧбасьӧмсӧ. Рӧдвужыс, ёртъясыс, врачьяс быдсикас сӧвет налы сетӧны, а бӧръя кывсӧ век жӧ мама-нылалы аслыныс лоӧ шуны.
Кинолӧн художествоа юкӧнын петкӧдлӧма аньлысь олӧмсӧ, а документальнӧй кадръясын психологъяс, адвокатъяс, врач-гинекологъяс, священникъяс висьталӧны, кыдзи найӧ сёрнитӧны на дорӧ шыӧдчысь аборт вӧчны кӧсйысьяскӧд.
Фильмсӧ видзӧдӧм бӧрын асланыс мӧвпъясӧн юксисны уна челядя мамъяс, психологъяс, врачьяс, общественнӧй олӧмын водзмӧстчысьяс.
Быдӧн на пиысь пасйис, мый колӧ видзны кагалысь олӧм, ёнмӧдны семьялысь традицияяс.
Владимир Уйба тӧдчӧдіс, мый семьялы отсӧгыс сетіс позянлун содтыны республикаын чужысь кага лыдсӧ, но абу на пӧ ставыс сьӧм сайын.
–Миянлы ставнымлы ӧти мӧвпӧн колӧ овны. Ми кӧ кутам чуксавны-ышӧдны видзны кагалысь олӧм, а нӧбасьысь нывбабалӧн рӧдвужыс мӧдасны тойлыны сійӧс аборт вӧчӧмлань, демография программаясысь тӧлкыс оз ло, – шуис сійӧ.
Борис Корчевников казьтыштіс, мый ӧні фронт вылын война мунӧ. А тайӧ дзик мӧд война – сійӧ мунӧ тылын. И тайӧ тышыс пӧ лёкджык на.
–Тайӧ войнаас кулӧмаыс зэв уна. Мыйта – ог весиг тӧдӧй. И кулӧны найӧ, кодъяс оз вермыны дорйыны асьнысӧ, кӧть эськӧ и горӧдны быттьӧ кӧсйӧны: «Эн вӧч тайӧс!». Но ми горӧдӧмсӧ ог кылӧй, – висьталіс Борис Вячеславович. – Кага виӧмыс виӧ и сылӧн мам-батьыслысь ловсӧ, сьӧлӧмсӧ. Нэм чӧжыс сэсся найӧ видӧны таысь асьсӧ. Медым петкӧдлыны, мый лоас аборт вӧчӧм бӧрын, ми и снимайтім фильмсӧ.
<> Гижӧдсӧ дасьтіс Павел СИМПЕЛЕВ. Снимокъясыс ӧтуввезйысь.