Во заводитчӧмсяньыс Комиын 1.286 морт пырӧдчӧма «Демография» нацпроект серти удж кузя содтӧд тӧдӧмлун-сям да выль специальносьт босьтӧм могысь уджтасъясӧ.
На лыдысь 665-ӧн помалӧмаӧсь нин велӧдчӧмсӧ, выль специальносьт серти удж вылӧ инасьӧмаӧсь 479-ӧн.
Казьтыштам, «Демография» нацпроект вылӧ подуласьӧмӧн мынтысьтӧг профессиональнӧй тӧдӧмлун-сям босьтны вермасны матысса воясӧ арлыд сертиныс пенсия вылӧ петысьяс, ветымын арӧса да олӧмаджык йӧз, каганысӧ куим арӧс тыртӧдзыс отпуск босьтӧмӧн дӧзьӧритысь аньяс, сизим арӧсӧдз челядя уджтӧмалысь нывбабаяс, комын вит арӧсӧдз том йӧз, удж вылысь чинтӧма лыдӧ веськавны вермысьяс да занятосьт службаын гижӧдчӧм уджтӧмалысьяс.
–Выль профессия да удж кузя содтӧд тӧдӧмлун босьтны вермасны сідзжӧ спецоперацияса военнослужащӧйяс, СВО-ын пӧгибнитӧмаяслӧн бать-мам, гӧтыр-верӧс да верстьӧ ныв-пи, – висьталіс регионса удж, занятосьт да йӧзӧс социальнӧя дорйӧм кузя министр Екатерина Грибкова.
Ведомствоысь юӧр серти, талун кежлӧ спецоперацияын служитӧм бӧрын «Демография» нацпроект серти вынсьӧдӧм уджтасъясӧ пырӧдчӧма квайт морт. Медся унаӧн шыӧдчӧмаӧсь регионса занятосьт служба пыр удж вылӧ инасьны зільысьяс пӧвстысь. Татшӧмыс 488 морт. 360-ӧн – куим арӧсӧдз да детсадйӧ ветлысь челядьӧс быдтысь-дӧзьӧритысь аньяс, 319-ӧн – олӧма да 80-ӧн – 35 арӧсӧдз том йӧз.
Министерствоын тӧдчӧдісны, мый талун Комиын олысьяс вермасны пырӧдчыны 138 велӧдчан уджтасӧ да босьтны регионын колана специальносьт. Кокниа позьӧ инасьны удж вылӧ документоведлы, бухгалтерлы, маркетплейсса аналитиклы да с.в.
«Демография» нацпроект серти велӧдчӧм могысь позьӧ шыӧдчыны «Работа России» портал пыр.
<> Гижӧдсӧ дасьтіс Александра Артеева.
Снимокъясыс ӧтуввезйысь.