Ковмас кӧ повтӧг уськӧдчыны биӧ…

Повтӧмӧн лоны, ёртлы отсӧг вылӧ воны, вын-эбӧстӧ жалиттӧг кусӧдчыны…
Пӧжарнӧйлы  тайӧ быдлунъя уджас торйӧн нин тӧдчана.
Быд здук колӧ лоны дасьӧн уськӧдчыны биӧ да мездыны неминучаӧ веськалӧм мортӧс. Та понда и бӧрйӧны тайӧ уджсӧ повтӧм да ыджыд сьӧлӧма йӧз. Буретш татшӧм жӧ и Кулӧмдін районса  Дон сиктысь Геннадий Тимушев.
Сикт-грездысь унаӧн мунӧны-пышйӧны карӧ. Помкаыс, дерт, гӧгӧрвоана – уджтӧ сьӧлӧм сертиыд сьӧкыдджык аддзыны, да и позянлуныс карад унджык. Но и сиктад водзмӧстчысь йӧзыдлы эм кытчӧ инасьны. Шуам, уналаын на талун оз тырмы кусӧдчысьыс. Геннадий Тимушев дыр мӧвпавтӧг кольччӧма чужан сиктас да уджалӧ буретш кусӧдчысьӧн.
–Геннадий, висьтышт ас йывсьыд.
–Чужи-быдми Дон сиктын. Помалі сэні ӧкмыс класс да муні водзӧ велӧдчыны Сыктывкарса автомеханическӧй техникумӧ вӧр дасьтан технология специальносьтӧ. Сы бӧрын ветлі армияӧ, во служиті Военно-морскӧй флотын.
Армияысь воӧм бӧрын заводиті мӧвпавны, кутшӧм удж бӧрйыны. Аслам специальносьт  серти эг вермы инасьны, стаж пӧ колӧ да. Со и шуи пӧжарнӧйӧн видлыны уджавны. Кыдз тыдовтчис, оз вӧлӧм тырмы кусӧдчысьыс. А мый, вын-эбӧс эм, юрӧй места вылын, спортӧ нырчча и. Ысті резюме да виччыси, кор корасны удж вылӧ.
–Дыр-ӧ ковмис виччысьны?
–Во кымын виччыси. Воис сійӧ здукыс, кор менӧ босьтісны удж вылӧ. Коймӧд во зіля Коми Республикаын Россияса МЧС-лӧн биысь видзчысян службаса первой отрядын. Пӧжарнӧй часьт-ным Кулӧмдін сиктын.
–Кымын морт тіян котырын?
–Миян караулын кӧкъямыс кусӧдчысь да нӧшта диспетчер. Арлыд серти кӧ, унджыкыс меысь верстьӧджыкӧсь. Артмӧ, ме – медся томыс. Ӧта-мӧдкӧд бура ладмам, ёртасям, ёрта-ёртлы мыйӧнкӧ да пыр отсасям. Аслам наставникӧн, чайта да, ставнысӧ позьӧ шуны. Быдӧн мыйӧкӧ велӧдӧ, юксьӧ кусӧдчан уджын тӧдӧмлун-сямӧн.
–Ӧдйӧ пырӧдчин уджад? Мый медся сьӧкыд тэныд?
–Медводз мыйсюрӧ ог вӧлі гӧгӧрво. Кор  сӧмын на локті уджавны, ставыс мен вӧлі выльтор. Шуам, мый сэтшӧмыс пӧжарнӧй рукав да кыдзи сійӧс колана ногӧн йитны. Пӧжарнӧй стволыс уна сикас да, медводз сьӧкыд вӧлі гӧгӧрвоны, кутшӧмӧн мый колӧ кусӧдны. А сэсся вочасӧн пырӧдчи уджас да, ӧні ставыс нин гӧгӧрвоана.
Кусӧдчысьлӧн уджыс интереснӧй, но абу кокни да и ӧпаснӧй. Та понда колӧ ставсӧ вӧчны колана ног да быд лун сӧвмӧдны тӧдӧмлун-сямтӧ.
Ми ветлам кусӧдчыны Кулӧмдінӧ да матігӧ-гӧрса матысса сикт-грездӧ. Медся сьӧкыд тӧвся кӧдзыд лунъясӧ – кусӧдчигӧн пӧсявлан, кӧтасьлан, кынман. Тулыснас миянӧс тшӧкыда корлӧны, кор йӧзыс лӧп-ёг сотӧны, да турунас биыс кутчысьӧ, сотчыны заводитӧ.
–Кор некутшӧм вызов абу, кыдзи уджалан луныд кольӧ?
–Быд лун миян урчитӧма, кор мый вӧчны. Занятиеяс дырйи содтӧд тӧдӧмлун босьтам, нормативъяс сдайтам – татӧг миян уджын некыдз. Быд лун – выль норматив, и тадзи пыр.
–Кусӧдчысьлы кутшӧмӧн колӧ лоны?
–Кыдз шуласны, героявны оз ков. Колӧ думайтӧмӧн ставсӧ вӧчны, быд воськов водзвыв артыштны. И, дерт жӧ, караулса начальник-веськӧдлысьлысь индӧдъяссӧ тӧд вылад босьтны. Сійӧ – миян юрным, колана ног тшӧктас-висьталас, мый вӧчны.
–Уджысь прӧст кадӧ мый радейтан вӧчны?
–Радейта кыйсьыны Дон ты вылын. Тыыс  ыджыд, матӧ дас вит километр. Вӧр-ваыс сэні зэв мича. А нӧшта радейта мини-футбол, волейбол, тшӧтш и самбо. Самбоысь таво кыкысь шедӧдлі мӧд места районса турнирын да ӧтчыд республикаса  ордйысьӧмын.
–Унаӧн сиктысь карӧ мунӧны. Татшӧм мӧвпыс юрад оз волы?
–Карад ме нёль во олі да, ӧні весиг оз кыскы сэтчӧ, мудза сэні. Сиктад лов вылад кокни да кыпыд, вӧр-ваыд орччӧн и. Сэсся кодлыкӧ ӧд колӧ жӧ сикт-грездад кольччыны, мед олӧмыс тані оз кус. Да и уджыс меным сьӧлӧм вылӧ воӧ. А сэсся кыдзи да мый, водзӧ тыдовтчас.
*  *  *
Коми Республикаын Россияса МЧС-лӧн главнӧй управлениеысь пресс-служба юӧр серти, Кулӧмдінса кусӧдчан гарнизонын суткинас дежуритӧ 15 техника да 28 пӧжарнӧй. Профессионалъяслы отсасьӧны 240 сайӧ пӧжарнӧй-доброволеч. Асланыс уджын найӧ вӧдитчӧны автоцистернаӧн да мотопомпаӧн.
2023 воын Кулӧмдінса подразделениеяс мездісны биысь 6 мортӧс да кусӧдісны 47 пӧжар. Туй выв неминуча бырӧдны ветлісны 38-ысь  да мездісны 6 мортӧс. <>
Екатерина МИКУШЕВА.