2022 воын Помӧсдінын котыртлісны блогеръяслы медводдза школа, кӧні лои гижӧма «Войвыв ру» рок-группалӧн «Войвывса пиян» сьыланкыв вылӧ клип. Таво сьылысьяс корисны уджтас нуӧдысьясӧс дасьтыны блогеръяслы велӧдчанінсӧ Усогорскын.
Йирым тӧлысся 14-15 лунъясӧ 40 ныв-зон велӧдчисны Сыктывкарса 10 экспертлысь. Быд пырӧдчысь вермис бӧрйыны витсьыс ӧти нырвизь.
Медводдза юкӧнӧн веськӧдлісны Анна Махотина, Элина Шлопова да Полина Лобанова: велӧдісны зонпосниӧс лӧсьӧдны рилс, сториз, дженьыд видео. Сюрӧссӧ челядь бӧрйисны асьныс. Ныв-зон дасьтісны 30-60 секундаа велӧдан да серамсора 20 видео. Ӧтияслы окота вӧлі юксьыны видзӧдысьяскӧд коми кывйӧн да удораса сёрнисикасӧн, мӧдъяс бӧрйисны история, ворсӧм, важ кӧлуй темаяс.
Мый сэтшӧмыс хромакей? Сыктывкарса политехническӧй техникумын велӧдчысь Максим Изъюров восьтіс томуловлы тайӧ кыв вежӧртассӧ: хромакей – ӧти рӧма (пырджык турунвиж) дӧра, код водзын морт снимайтчӧ камера вылӧ. Сыӧн вӧдитчӧны телеведущӧйяс, медым «веськавны» коланаинӧ: ю дорӧ, офис жырйӧ либӧ гаж вылӧ. А Усогорскса ныв-зон видлісны пырӧдчыны видеоворсӧмӧ да снимайтны радейтана программа вылӧ пародия.
Коймӧд нырвизьӧн веськӧдліс фотограф, «Юрган» да «Коми гор» телеканалъясын вӧвлӧм видеограф Иван Жуков. Сійӧ велӧдіс томуловӧс колана ногӧн кутны киын фотоаппарат да «кыйны» мича ракурс.
Босьтны коми кывъя интервью челядьӧс велӧдісны «Юрган» телеканалын зільысьяс Анастасия Михайлова да Алексей Паршуков. Налы, буракӧ, вӧлі медсьӧкыд, ӧд уджсӧ аддзас став республика! Анастасия да Алексей эз сӧмын пыртны челядьӧс журналистикаӧ, но и дасьтісны видеосюжет. Вочасӧн «Миян йӧз» передачаын позяс аддзыны Удораса водзмӧстчысьясӧс да том корреспондентъясӧс.
Бӧръя площадкаын челядьлӧн вӧлі позянлун отсавны снимайтны «Невеста» клип. Мама-ныла Анна да Марьяна Бобрецоваяс, режиссёр да оператор-монтажёр, гижисны Ёлькыб грездын удораса кӧлысь йылысь ичӧт фильм. Шӧр рольясын вӧліны жӧник – Сыктывкарысь воӧм медиаволонтёр Никита Филиппов, гӧтырпу – Удораса ныв Полина Захарова, пӧрысь жӧник – Алексей Малышев.
А мыйӧ велалісны томулов да кутшӧм видеояс найӧ снимайтісны, регыд позяс донъявны ӧтуввезйын.
Коми Республикаса национальнӧй политика министерство отсӧгӧн уджтассӧ збыльмӧдіс «МИ» котыр. Веськӧдліс проектӧн Ксения Таскаева. Став видеоклипсӧ позьӧ аддзыны куар-код пыр вуджӧмӧн
Элина Шлопова.
Снимокъясыс Анна Бобрецовалӧн.