Комиын биысь видзчысян служба да войтырӧс доръян управление быд во котыртлӧ-нуӧдӧ «Лучший по профессии» республикаса ордйысьӧм, кӧнi кусӧдчысьяс петкӧдлӧны ассьыныс сям-кужӧмлунсӧ. Таво татшӧмыс мунiс Ухта бердса Ярега посёлокын 191-ӧд номера кусӧдчан часьтын июнь 30-ӧдсянь июль 5 лунӧдз. Та пӧрйӧ конкурсын петкӧдчисны республикаса став кар-районысь кусӧдчан службаын матӧ 130 уджалысь.
Кодi медся-медсяыс?
Дерт, татшӧмсяма ордйысьӧмыс – аслыспӧлӧс велӧдчӧм. Кусӧдчысьяс петкӧдлӧны оз сӧмын ассьыныс сямсӧ, но и велӧдчӧны асланыс уджъёртъяслысь, босьтӧны налысь став выльсӧ да бурсӧ. Вежон чӧжӧн сям-кужӧмлунсӧ ордйысьысьяс петкӧдлiсны эз сӧмын практика боксянь, но и теорияысь тшӧтш. И со воис кад бӧрйыны на пӧвстысь вит нимпасын медся-медсяясӧс. Донъялысьяс серти, вермысьясӧн лоисны: «Туй выв неминучаын доймалӧмаясӧс мездӧмын медбур котыр» нимпасын – 19-ӧд отрядын зільысьяс (Ярега посёлок); «Газодымозащитнӧй службаса медбур звено» – 14-ӧд отрядын уджалысьяс (Кулӧмдiн район).
Кусӧдчан машинаса медбур шоперӧн шуисны Мылдін районса Улыс Омраысь Виктор Бажуковӧс, подразделениеӧн медбур веськӧдлысьӧн – Кулӧмдін районса Помӧсдінысь Алексей Третьяковӧс. Медбур кусӧдчысьлысь ним шедӧдіс Сыктыв районса Межадорысь Владимир Лекомцев.
Вӧлӧгдаса гӧсьтъяс
Таво ордйысьӧмӧ пырӧдчисны тшӧтш и Вӧлӧгдаысь кусӧдчысьяс. Вит морта команда воис Комиӧ торъя корӧм серти, медым видзӧдлыны, кыдзи котыртӧма ордйысьӧмсӧ, тӧдмасьны республикаын кусӧдчан службалӧн уджӧн да такӧд тшӧтш песыштны ассьыныс вын-эбӧс. Комиысь пӧжарнӧйяскӧд тшӧтш найӧ видлісны выннысӧ пожарно-прикладнӧй спорт сикасъясын: нёль судтаа велӧдчан башняӧ пос кузя кайӧмын, эстафетаын, 100 метра мытшӧдъяса туй кузя котӧртӧмын, кусӧдчан сос пыр ва сетӧмын.
Пожарно-прикладнӧй ордйысьӧмын медбуръясӧн шуисны юркарбердса Гӧрд Затон посёлокысь Роберт Тренинӧс, Сыктыв районса Межадорысь Павел Турышевӧс да Кӧрткерӧс районса Мордiнысь Иван Можаевӧс.
–Ордйысьӧм-конкурсӧ пырӧдчысьыс воысь-во содӧ. И тайӧ зэв бур. Ӧд тані аддзылӧм-видлӧм-тӧдмалӧмторйыс ставыс быть колана уджас. И кымын ёнджыкӧсь да сямаджыкӧсь миян кусӧдчысьяс, сымын лӧньджык да кокниджык Комиын войтырлӧн сьӧлӧм выланыс, кор тӧдӧны, мый орччӧн эмӧсь йӧз, кодъяс быд здукӧ вермасны мездыны, – кывкӧрталiс ордйысьӧмсӧ сигӧртігӧн учреждениеӧн веськӧдлысь Александр Сыскин.
Елена Лодыгина.
«Коми му» газетысь, кодӧс позьӧ судзӧдны пошта пыр, позьӧ ньӧбны «Ордым» лавкаын. Медым лыддьыны электроннӧй версия, личкӧй татчӧ. Эмӧсь кӧ юалӧмӧяс, гижӧй komi-kerka@ya.ru.