Том коми войтырлӧн «МИ» котыр водзмӧстчӧмӧн октябрь 14-15-ӧд лунъясӧ блогеръяс школаын выль тӧдӧмлун босьтіс нелямын гӧгӧр ныв-зон: Косланса да Усогорскса школаясын, Сыктывкарса политехническӧй техникумысь Удораса филиалын велӧдчысьяс. Уджсӧ вӧлі котыртӧма вит нырвизьын.
Элина Шлопова, Никита Филиппов да Полина Лобанова тшӧтш пырӧдчисны блогеръяс школа уджӧ да вӧзйисны «Коми му» газетлы сы йылысь пасйӧдъяс.
Пуктісны пай
Анна Махотина, Элина Шлопова да Полина Лобанова нуӧдісны дженьыд видео снимайтӧм кузя мастер-класс. Кык лунӧн татшӧмсӧ кызьӧс вӧчӧмаӧсь.
Ныв-зонмӧн вӧзйӧм мӧвпъясысь чужисны печкан, «Пас» ворсан, сёрнисикасъяс, Мозын бокын паськалӧм серъяс да Коми мулӧн карта йылысь 30-60 секундаа видеояс.
Тадзи том блогеръяс пуктісны коми кыв да культура видзӧмсӧвмӧдӧмӧ ассьыныс пай.
«Нюмдышт!»
Иван Жуков 13 во нин зільӧ фотография нырвизьын. Ас кадӧ уджавлӧма «Юрган» да «Коми гор» телеканалъясын, ӧні ёртасьӧ Н.М.Дьяконов нима да Сыктывдін районса музейяскӧд.
Иван тӧдмӧдіс том йӧзӧс фотокамера позянлунъясӧн, велӧдіс найӧс «кыйны» колана ракурс, висьталіс, кутшӧм снимокъяс позьӧ шуны бура артмӧмаясӧн.
Сы дорын велӧдчысьяслӧн фотоясысь позис аддзыны Разгорт да Усогорск сиктъяс, вӧр-ва мич да, дерт жӧ, ёртъясыслысь нюмъялан чужӧмъяс.
Хромакей
Тайӧ кывнас том блогеръясӧс тӧдмӧдіс Максим Изъюров. Кӧть сылы сӧмын на 18 арӧс, но тайӧ оз сор Максимлы лоны фотографъяс пӧвстын пыдди пуктана мортӧн.
Сыктывкарса политехническӧй техникумын велӧдчысь вит во нин эз лэдзлы кисьыс камерасӧ.
Хромакей кывйыс петкӧдлӧ, мый мортсӧ снимайтӧны ӧти рӧма (тшӧкыдджыка турунвиж) дӧра водзын, а бӧрас вежӧны рӧмсӧ кутшӧмкӧ мича серпасӧн, и мортыс веськалӧ быттьӧ саридз либӧ гӧра дорӧ, вӧр шӧрӧ, дзоридз пӧвстӧ.
Максим велӧдіс тшӧтш томуловӧс вӧдитчыны хромакей вӧчан программаясӧн.
Удораса войтыр – «Юрганын»
Анастасия Михайлова да Алексей Паршуков уджалӧны «Юрган» телеканалын: Алексей операторалӧ, а Анастасия – корреспонденталӧ. Та кындзи Анастасия юрнуӧдӧ «Шуда котырӧн», кӧні карса посни челядь сёрнитӧны ас костас комиӧн.
Блогеръяс школаын найӧ эз сӧмын велӧдны томуловӧс, но и дасьтісны накӧд «Миян йӧз» передачалысь выль петасъяс.
Ныв-зон корсисны удораса водзмӧстчысь йӧзӧс, сёрнитісны да снимайтісны найӧс. Матысса кадӧ интервьюяссӧ позяс видзӧдны «Юрганын».
Ёлькыбын гажа кӧлысь
Мама-ныла Анна да Марьяна Бобрецоваяс Ёлькыб грездын снимайтісны удораса кӧлысь йылысь клип. Анна режиссёраліс, Марьяна вӧлі оператор-монтажёрӧн.
Гӧтырпуӧс ворсіс Полина Ершова, а жӧникӧс – Никита Филиппов.
«Невеста» фильм снимайтісны важ коми керкаын. Кӧзяеваыс – Елена Шкалей да Алексей Малышев.
Найӧ эз сӧмын радпырысь лэдзны ас керкаас тӧдтӧм йӧзӧс, но и отсасисны уджын: кутісны би, лӧсьӧдісны аппаратура. А Алексей ворсіс на и пӧрысь жӧникӧс.
Медводз Елена Александровна тӧдмӧдіс гӧсьтъясӧс аслас керкаӧн. Ӧти вевт улын меститчӧмаӧсь гожся да тӧвся юкӧнъяс, мӧс-кук видзан шы, турун сарай, кытчӧ позьӧ пырны звӧзті. Висьталіс сійӧ и грезд йывсьыс. Мозын ю бокын пуксьӧм Ёлькыбын некымын керка и эм, а джуджыд кыр йылын пуяс пӧвстын – часовня.
Война бӧрын сійӧс разьлӧмаӧсь, а некымын во сайын кыпӧдӧмаӧсь выльӧс.
Бисӧ грездӧдз вайӧдӧмаӧсь куим во сайын, а телефоныс и ӧні абу, сӧмын таксофон.
Олан керкаыс дас вит, но грездӧ волывлӧны шойччысьяс, кыйӧны Мозын юысь чери, вотӧны еджыд нитшка сук пожӧма вӧрысь тшак да вотӧс.
Кӧлысь снимайтігӧн том нывъяс – невесталӧн нывъёртъяс – пасьтавлісны коми йӧзкостса сарапанъяс. Арын ывлаыс ыркыд нин, но ворсысьяс пыр нюмъялісны камераӧ, а сэсся ставӧн пыравлісны керкаӧ чӧскыд пӧжасӧн пым тшай юны. Зэв мича кадръяс артмисны: пемыд енэжын буситысь кымӧръяс, тэрыб ваа Мозын, югыд рӧмъяса арся вӧр. И мырпом, турипув, пув, чӧд моз бергалысь-йӧктысь нывъяс, мыла сьыланкыв.
Режиссёр да оператор эз сӧмын клип снимайтны, но и велӧдісны том войтырӧс уджавны камераӧн, бӧрйыны да монтируйтны бурджык кадръяс, босьтны интервью.
Вӧчӧма колана удж
Кык лунӧн блогеръяс школаын удайтчис вӧчны ыджыд да колана удж. Медся водзмӧстчысь томуловлы велӧдысьяс козьналісны флешка-наушник, ичӧтик колонка, шоппер-поверъяс – видео вӧчысьяслы зэв коланаторъяс.
Дерт, пӧртны ставсӧ тайӧс олӧмӧ артмис школа котыртысьяслӧн сьӧлӧмсянь зільӧмӧн.
Уна вын таӧ пуктісны «МИ» котырӧн веськӧдлысьӧс вежысь Ксения Таскаева да Удора районса администрацияысь культура да национальнӧй политика юкӧнӧн юрнуӧдысь Наталья Капёнкина.
Сыктывкарысь воӧмаяс вылӧ донъялісны удорасалысь гӧсьтъясӧс вочааланногсӧ, шаньлунсӧ, шензисны Удора мулӧн мичӧн, аслыспӧлӧслунӧн.
Чайтам, быдмысь войтыркӧд татшӧм уджтассӧ тшӧкыдджыка кутасны нуӧдны и республикаса мукӧд районын. <>
Элина Шлопова, Никита Филиппов да Полина Лобанова.
Снимокъясыс ӧтуввезйын «МИ» котырлӧн лист бокысь.