Воркуталы 80 во тыригкежлӧ Войвыв кытшсайса карын восьтісны нӧшта ӧти модельнӧй библиотека.
11-ӧд номера библиотека-филиал выльмӧдӧм вылӧ республикаса да карса бюджетъясысь вӧлі вичмӧдӧма 5 миллион шайт. Небӧг видзанінын вӧчисны дзоньтасян удж, ньӧбисны компьютеръяс, пызан-улӧс, кыксё сайӧ выль книга, судзӧдісны газет-журнал. Ӧні сэні позьӧ и лыддьысьны, и шойччыны, и прӧст кад коллявны.
Кызьысь унджык во нин библиотекаыс уджалӧ омӧля аддзысь йӧзкӧд. Сэні вӧчӧны «сёрнитан» небӧгъяс – лыддьӧны найӧс да гижӧны флеш-картаӧ. Флешкасӧ позьӧ босьтны да кывзыны гортын.
–Библиотекаыс дасьтысьӧ пасйыны восьтӧмсяньыс 45 вося юбилей, и выльмӧдӧмыс лоис ыджыд козинӧн, – висьталіс Коми Республикаын культураса министрлысь удж вӧчысь Мария Балмастова. – «Культура» нацпроект серти Воркутаын став библиотекасӧ вӧчӧма модельнӧйӧн. Эска, карын олысьяс кутасны волыны небӧг видзанінъясӧ босьтны выль тӧдӧмлун, сӧвмӧдны творчествосӧ.
Во помӧдз республикаын лоӧ восьтӧма нӧшта кык модельнӧй библиотека. <>
Гижӧдсӧ дасьтiс Павел Симпелев.
Снимокъясыс ӧтуввезйысь.