Садикӧ кор колӧ мунны,
Сё мокасьт тай, личкӧ унмыд.
Талун сэтчӧ ме ог мун,
Асывсяньыс вошті ун.
Ӧтчыд вежоннас и сюрлӧ
Гортын дзирнясьыштны-дурны.
Шойччан луннад садьман водз –
Татшӧм здукыд овлӧ шоч.
Чеччӧм бӧрын жӧдза-лега,
Мыйкӧ жугӧда да чега.
Дуриг улӧс воштіс кок –
Батьлы лунтыр кежлӧ нок.
Мамӧй дӧзмӧмпырысь кайтӧ,
Вошӧма пӧ бара майтӧг.
Ог ме радейт курыд быг,
Таысь кыпӧдлывла зык.
Ставнымлы пӧ удж тэ вӧчан,
Паччӧр вывсянь броткӧ пӧчӧй.
Воштіс сійӧ кысян ем,
Корсьысьнысӧ ковмас мем.
Емсӧ ӧнтай гусьӧн босьті.
Джоджӧ усис, лабич костӧ.
Сэтчӧ судзӧдны ог пыр.
Ог тӧр. Абу ӧд ме шыр!
Зыньгӧ пӧчӧй, ропкӧ мамӧй,
Кор пӧ шедас тэныд сямыд.
Мекӧд олӧм шойччан лун
Налӧн вежон чӧж оз вун.
Сӧмын батьӧй олӧ чӧла –
Вильышпознад тшӧтш жӧ вӧлі.
Олан туй пӧ ачыд восьт,
Лёксӧ – шыбит, бурсӧ – босьт!
Николай ТЮРНИН.