Владимир Васильевич Тимин нима Гожся университетын таво гожӧм велӧдчисны Кӧрткерӧс районса Одыб, Ыджыдвидз да Нёбдін сиктъясса челядь. Художествоа гижӧд юкӧнын налӧн наставникъясӧн вӧліны Елена Афанасьева да Алёна Шомысова, драматургияӧн томуловӧс тӧдмӧдіс Алексей Попов, а том журналистъяскӧд уджаліс Павел Симпелев.
Быд сиктын сэтчӧс библиотекаясӧ чукӧртчылісны писькӧс вежӧра, коми кыв радейтысь ныв-зон, висьтасисны-гижисны, мый вайӧ налы сьӧлӧм гажсӧ. Ӧтияслы тайӧ – вӧрын вотчӧм, мӧдъяслы – техникаӧн ноксьӧм, коймӧдъяслы – спортӧ сибӧдчӧм, нёльӧдъяслы – саридз дорӧ ветлӧм. И ставыс тайӧ вӧчӧ налысь олӧмсӧ чӧскыдӧн.
Том гижысья слысь ӧткымын пасйӧд йӧзӧдам «Йӧлӧгаын».
Казьтыштас гожся лунсӧ
Ӧтчыд ми мамкӧд шуим ветлыны вӧрӧ – чӧд вотны!
Сійӧ лунас мамӧ чуксалiс менӧ зэв водз. Ме зiля пасьтаси, выя няньӧн ырсниті чай, кватиті ноп, и ми мӧдiм. Вуджим пыжӧн ю, сэсся мунiм видз кузя, кӧнi быдмисны быдсяма мича дзоридзыс да туруныс.
Коркӧ и вӧрӧ воим. Сэні зэв гажа да кыпыд! Лэбач сьылӧмыс эз и куслы, меным ёна кажитчис найӧс кывзыны. Сӧстӧм сынӧдыс мавтыштӧ быттьӧ горштӧ, сэтшӧм кокниа лолавсьӧ. Дерт, ёна дӧзмӧдчисны номъяс да гебъяс, но кыдз нӧ вӧрын да натӧг?
Чӧдсӧ чукӧртны аминь сьӧкыд, но ӧд кутшӧм сійӧ чӧскыд! Вом дорӧй ставнас лӧзӧдліс, сэтшӧм горша апалi юмов вотӧссӧ да. Кор ачыд вотан, сiйӧ нӧшта чӧскыдӧн чайтсьӧ. Кӧрзинаяс тырисны да, вӧрсӧ аттьӧалӧм бӧрын ми мӧдiм гортлань.
Пуим чӧскыдсьыс-чӧскыд компот, и сiйӧ тӧвбыд кутас казьтывны меным тайӧ гожся лунсӧ!
Вунӧдны позьтӧм здукъяс
Лыжиӧн котравны ме куті мӧдӧд классын велӧдчигӧн на. Первойя вояснас вӧлі зэв сьӧкыд, а кутшӧмкӧ кад мысти кутіс нин неуна артмыны, мӧді ветлывлыны ордйысьӧм вылӧ. А сэсся пыр бурджыка и бурджыка кутіс артмыны.
Медводдза медаль – 3-ӧд местаысь – босьті 2018 воын Пӧдтыбокын, сійӧ жӧ воас мӧд местаысь эзысь медаль шедӧдім Висерын эстафета котӧртігӧн.
А 1 местасӧ медводдзаысь шедӧді Одыбын 2019 воын.
Республикаса ордйысьӧм вылӧ медводдзаысь ветлі 2020 воӧ Ухтаӧ. Сэні эстафетаын жӧ шедӧдім 1 места.
Ухтаас ордйысьны куим во дорвыв лэччывлім, и пыр вӧлім вермысьяс лыдын. Тайӧ здукъясыс, кор тэ верман, некор оз вунны.
Менам гожӧм
Гожӧмыс заводитчис омӧль поводдяӧн да, ме ёнджыка пукалі гортын, ветлывлі чери кыйны, картупель пукті. Июль тӧлысьнас видзьяс куртім, купайтчим.
Сэки жӧ, гожӧм шӧрнас, дядькӧд ми кык лун кежлӧ кайлім Лымва грездӧ. Войколалім сэні ыджыд мам керкаын. Чери кыйим. Сэні жӧ сьӧд пывсянын пывси да ызнитчывлі Лымва юас.
А августнас куті ветлӧдлыны спортлагерӧ. Тшӧтшъяяскӧд ми котралам, ворсам-упражняйтчам.
Со тадзи кольӧ менам гожся кадыс.
Ас киӧн чукӧрта
Дзолядырсянь ме радейтлі петавлыны гаражӧ батьӧ дорӧ, вӧлі машинаын пукалышта, ключ, кор батьӧ корас, мычча.
А нёльӧд классын велӧдчигӧн батьӧ тшӧктіс меным мотоцикл мотор разьны.
Кык во сайын ме чукӧрті батьлысь важ, уджавтӧм нин «Минск». И кор сійӧ заведитчис, меным зэв рад лоис.
Кольӧм во жӧ меным ньӧбисны выль мопед. Но меным окота аслым ноксьыны техниканас да, ачым ньӧби жугалӧм чиклет. И ӧні вочасӧн, ньӧжйӧник дзоньтала-чукӧрта сійӧс.
Абхазияын лӧсьыд, но гортад бурджык
Сыктывкарын велӧдча да, экзаменъяс вӧсна гожӧмыс меным заводитчис июнь помын. Июльнас гортын шойччи да град йӧрын уджалі.
А августнас мамкӧд да чойкӧд ветлім Абхазияӧ, Гагра карӧ. Абхазияыс – зэв мича республика, а гаграсаяс висьталісны миянлы, мый вонас сэні куимсё лун шондіа. Зэв пӧ гежӧда зэрлӧ, орчча гӧраясыс кутӧны кымӧръяссӧ да.
Ӧти субӧтаӧ неыджыд автобусӧн мӧдӧдчим ресторанӧ «Абхазскӧй застолье» вылӧ. Татшӧм гаж вылас 1 сюрс морт чукӧр-мывлӧ. Миянӧс кӧзяиныс пӧся вочааліс да корис пызан сайӧ. Пызаныс вӧлі тыр быдсикас абхаз сёян-юанӧн: мамалыга рок, чипан да ыж яя шашлык…
Гажсӧ нуӧдіс ачыс кӧзяиныс, висьталіс асланыс обычай-традицияяс йылысь, корис зонъясӧс да мича нывъясӧс сцена вылӧ йӧктыны лезгинка, «сабляяса танец».
Меным зэв ёна кажитчисны Абхазияса гӧраясыс, вӧр-ваыс. Найӧ сьӧлӧмтӧ вӧрзьӧдӧны-гажӧдӧны. Ӧти ю весьтті нюжӧдӧмаӧсь стеклӧ пос, а мӧдлапӧлас сулалісны туристъяслы не-ыджыд керкаяс.
Тайӧ ветлігас ме уна выльтор тӧдмалі, видлі чӧскыд сёян, пӧт-тӧдз купайтчи саридзын да гожйӧдчи.
Но шуа: Абхазияад эськӧ лӧсьыд, но гортын бурджык. <>
Павел Симпелев.
Снимокъясыс авторлӧн да геройяслӧн гортса архивысь.