Таво Комиын шуӧма котыртлыны республикаын пионер ӧтмунӧм пансьӧмсянь 100 во тырӧмлы сиӧм уна аддзысьлӧм-чукӧртчылӧм. А медшӧр гажыс вӧлі август 24 лунӧ Ыбса финн-йӧгра этнокультура паркын.
Кольӧм пекничаӧ сэні вӧлі уна йӧза: Ыбын «Галстука странаӧ» 15 кар-районысь воліс 500-ысь унджык морт. На лыдын пионер ӧтмунӧмса сёысь унджык ветеран, 300 гӧгӧр велӧдчысь-студент, а сідзжӧ бать-мам, педагогъяс, томулов политикаын, спортын да культураын водзмӧстчысьяс.
—Миянлы быть колӧ пыдди пуктыны да кутчысьны Сӧветскӧй Союз кадся томуловӧс воспитайтанногас, тшӧтш и пионер котырыслысь став бурсӧ босьтны да выль ӧтмунӧмын вужйӧдны, — пасйис гаж вылӧ воӧмаясӧс чолӧмалана кывйын «Движение первых» ӧтмунӧмса регионын юкӧнӧн веськӧдлысь Андрей Безносиков. — Зэв нимкодь, мый Коми пионериялы 100 во тырӧмсӧ ми нимӧдам-пасъям челядь да томулов котыръяскӧд ӧтув буретш финн-йӧгра этнокультура паркын. Ӧд татчӧс зільысьяс тшӧтш пуктӧны ассьыныс пай томулов политика збыльмӧдӧмӧ.
Важся традиция серти тайӧ чукӧртчылӧмыс пансис кыпыд линейкаӧн да «Движение первых» ӧтмунӧмӧ выль пырӧдчысьясӧс нимӧдӧмӧн. А та бӧрын нин «галстукаяс» разӧдчисны сёрнитны-юксьыны тӧжд-могӧн да уджын опыт-сямӧн торъя площадкаясын: «Патриотизм и историческая память», «Туризм и путешествия», «Культура и искусство». Лунбыдӧн вевъялісны тшӧтш аддзысьлыны экспертъяскӧд, Комиын нималана войтыркӧд, видлыны сям-кужанлун мастер-классын, кытшовтны этнопарксӧ экскурсияӧн, видзӧдны пионеръяслы сиӧм кино да, дерт, и бипур дорын пукыштны-сьылыштны.
Форум дырйи ӧтувъя сёрниӧ пырӧдчисны Комиын бура тӧдса войтыр: Коми наука шӧринысь Физиология институтын шӧр научнӧй сотрудник, «Марс-500» войтыркостса уджтасын водзмӧстчысь Юрий Солонин, Кыв, литература да история институтысь старшӧй научнӧй сотрудник Алексей Рассыхаев, коми том войтырлӧн «МИ» котырӧн веськӧдлысьӧс вежысь Ксения Таскаева, республикаса искусство колледжӧн веськӧдлысь Степан Кубик, профессиональнӧй инструктор, «Активный отдых Коми» компания лӧсьӧдысь да сыӧн юрнуӧдысь, путешественник Сергей Семяшкин, Комиын «ЛизаАлерт» корсьысян-мездан отрядын водзмӧстчысь Виталий Штука, регионын «Волонтёры Победы» ӧтмунӧмӧн юрнуӧдысь Екатерина Корженевская да мукӧд.
Ӧтувъя гаж вылӧ волісны тшӧтш Сыктывкарса П.Сорокин нима университетын велӧдчысь Индияса, Пакистанса да Иранса студентъяс, вермытӧм челядь.
Чукӧртчӧмаясӧс мичаа сьылӧм-ворсӧмӧн гажӧдісны Владимир Трошев, Захар Петрушин да Коми Республикаса народнӧй артистка Вера Булышева. А рытнас аслас концертӧн сигӧртіс аддзысьлӧмсӧ Стас Море.
* * *
Казьтыштам, челядьлы да томуловлы выль ӧтмунӧмсӧ вынсьӧдісны 2022 вося июль 20 лунӧ. Тайӧ лоӧмторсӧ сиисны Россияын пионерия котыртӧмсянь 100 во тырӧмлы.
«Движение первых» нимсӧ да уджаныс 12 нырвизь урчитісны да вынсьӧдісны кольӧмвося декабрын Москваын челядьлӧн да томуловлӧн ставроссияса медводдза съезд-чукӧртчылӧм дырйи.
Ӧтмунӧмас позьӧ пырӧдчыны квайт арӧссянь. Медшӧр могыс — отсавны быдмысь войтырлы збыльмӧдны ассьыныс бур дум-кӧсйӧмсӧ, бӧрйыны сьӧлӧм серти удж-профессия, а сідзжӧ котыртны налысь прӧст кадсӧ.
«Движение первых» ӧтмунӧмлысь юкӧнсӧ Комиын лӧсьӧдісны 2023 вося февральын. Сідз шу-сяна первичкаыс регионын кыксёысь унджык нин. <>
Гижӧдсӧ дасьтіс Елена Плетцер.
Снимокъясыс «Движение первых» ӧтмунӧмса Коми юкӧнысь.