Август 19 лунӧ Кӧрткерӧсын медводдзаысь на котыртлісны вужвойтыр спорт сикасъяслы сиӧм «Том лов» фестиваль. Ордйысьӧмӧ пырӧдчисны Изьва, Сыктывдін, Кӧрткерӧс, Кулӧмдін районъясысь да Сыктывкарысь командаяс.
Фестивальӧ пырӧдчысьяслы коліс петкӧдлыны тэрыб-винёвлунсӧ куим пӧвста да норт вомӧн чеччалӧмын, харейӧ няртала шыблалӧмын да «Зумыд ош» вермасьӧмын.
Кӧрткерӧс районса администрацияын спорт юкӧнӧн веськӧдлысь, ордйысьӧмса шӧр судья Александр Гилевлӧн висьталӧм серти, татшӧм фестиваль дырйиыс видзӧдысь-гӧсьтъяс пыдісяньджык тӧдмасьӧны вужвойтыр спорт сикасъясӧн, а сідзжӧ налӧн чужӧ кӧсйӧм овны дзоньвидза да весиг пырӧдчыны спортӧ.
А комиыд нэмсӧ ордйысьлӧмаӧсь аслыснога. Шуам, кӧр видзысьяс чеччавлӧмаӧсь норт вомӧн: коді унджык венас, сійӧ и вермысьыс. «Том лов» дырйи норт пыддиыс вӧлі сы пасьта-кузьта жӧ 10 трапеция.
Куимысь чеччалӧмын спортсменлы коліс йӧткасьны ӧтпырйӧ кыкнан кокнас, да мед эськӧ и кыккокйыв жӧ сувтіс. А видлы веськавны нярталанад харейӧ-кузь зібйӧ! Оз на быдӧнлӧн судзсьы сямыс.
Медводдзаысь нуӧдӧм «Том лолын» зонъяс пӧвстысь быд спорт сикасын вермысьыс торъяліс, а со нывъяс пӧвстын став медводдза местасӧ шедӧдіс-курыштіс Изьваысь тэрыб да винёв Анастасия Парамонова.
Фестиваль вылӧ воӧмаяслы вӧлі лӧсьӧдӧма и сьӧлӧм-лов бурмӧдана быдсикас аслыспӧлӧс гажӧдантор.
Шуам, Кӧрткерӧс районса музей тӧдмӧдіс вӧралан-кыйсян нэмӧвӧйся эмбур-кӧлуйӧн. Сы лыдын пищаль зарадитанӧн, кыйдӧс новлан пестерӧн, быдсикас кулӧм-тывйӧн.
Шӧр библиотека вӧзйис томуловлы да верстьӧлы вӧчасьны сола няньшомысь, мастеритны пу чача, ворсны пызанвывса ворсӧмысь да, дерт, серпасавны аквагрим.
Асланыс кипом уджъясӧн нимкодьӧдісны мастер войтыр. Сідз, Сыктывкарысь Константин Циклаури вӧзйис кӧрт дорӧмторъяс да юксис аслас уджын гусяторъясӧн.
Фестиваль дырйи бӧрйисны и Кӧрткерӧс районса «Райдаӧс», коді сэсся нимӧдас чужанінсӧ республика тшупӧдын. Та пӧрйӧ медся-медся нимсӧ шедӧдны окотитіс 5 рочакань: Шойнатыысь, Важкуръяысь, Нёбдінысь да Одыбысь. Мича нывъяс медводз висьтасисны ас йывсьыныс комиӧн, сэсся ветлӧдлісны ва тыра ведраяса карнанӧн, а медбӧрын петкӧдлісны ассьыныс творчествоын сям-кужӧмлунсӧ. Донъялысьяслӧн да видзӧдысьяслӧн кывкӧртӧд серти «Райда-2023» нимсӧ шедӧдіс Важкуръяысь Арина Турьева.
А кутшӧм нӧ гаж сьывтӧг-йӧктытӧг?! Видзӧдысьясӧс сцена вывсянь гажӧдісны Сыктывкарса да ас районса котыръяс: «Кэндис», «Капель», «Зыряночка», «Исерга», «Сипертас», «Сигудочки», «Сударушка» да мукӧд. И сигӧртіс фестивальсӧ Вӧлӧгдаысь «Балалайка MIX».
<> Гижӧдсӧ дасьтісны Елена Чекусова да Елена Плетцер.
Снимокъясыс ӧтуввезйысь.