«Монди СЛПК»-лы – 50: ставыс на водзын…

Июнь 25 лун. Асывсяньыс зэрышталіс, но шонді ӧдйӧ косьтіс войтъяссӧ. Пажын бӧрын журналистъясӧн тыр автобусӧн мунім Эжваӧ. Лӧнь промышленнӧй каркодьӧ уна сикас транспортӧн воисны суйӧр сайысь да Россияса регионъясысь гӧсьтъяс, гырысь предприятиеясӧн юрнуӧдысьяс да, дерт жӧ, татчӧс ас йӧз — 200 гӧгӧр морт. Ставным воим «Монди Сыктывкарса ЛПК»-лӧн юбилей вылӧ.

Нимлунасьысь чужан лунсӧ пасйис… производственнӧй цехын, кабала тубрасъяс да кӧрӧбъяс костын. Тані жӧ лӧсьӧдӧм сцена вылын вӧл=ны сідз шусяна панельнӧй дискуссияӧ пырӧдчысьяс. Кыдз висьталісны, буретш тадз вӧчӧны Москваын да мукӧд гырысь карын. И со Комиын кутӧмаӧсь трендлысь бӧжсӧ. Пукалан татшӧм «залас» да гӧгӧрвоан компаниялысь ӧнія русӧ да паськыд туйсӧ. Залын вӧліны тшӧтш Александр Гайворонский, Любовь Доронина да Сергей Рубан. Найӧ, кодъяс «Коми му» газетлӧн кольӧм петасын шоныд кывъясӧн чолӧмалісны «Монди СЛПК»-саӧс тшупӧда пасӧн. А тайӧ ӧд и «Коми мулысь» сьӧлӧм шонтӧ: тӧдӧны да лыддьӧны, сідзкӧ.
Но, бокӧ тай кежсис, бергӧдча шӧр сёрнитанторйӧ.

Аддзысьлӧмсӧ восьтіс Россияын Австрияса посол Йоханнес Айгнер:

—Россияын кабала вӧчан медвын-йӧра предприятие — Сыктывкарса ЛПК быд во иналӧ миллионысь унджык тонна бур вузӧс. Но сылӧн уджыс тшӧтш и социальнӧй тӧдчанлуна. Сідз, «Монди СЛПК» 60 сюрс мортӧс могмӧдӧ пӧсь ваӧн, тані жӧ вӧчӧны регионын коланаысь 20 прӧчент электроэнергиясӧ. Талун ті сідзжӧ вӧр-ва видзӧмын медся водзмӧстчысьяс лыдын. И Комиын олысьяс, торйӧн нин том йӧз, окотитӧны уджавны тані, ӧд компанияӧс вылӧ донъялӧны мир пасьтала.

Панельнӧй дискуссияыс шусис «История нашего успеха. Продолжение следует». Комиӧдны позис эськӧ «рытпук» кывйӧн, но вежӧртасыс сылӧн паськыдджык. Сцена вылын пукалысь сизим сёрнитысь — «Монди Сыктывкарса ЛПК»-ысь генеральнӧй директор Клаус Пеллер, Коми Республикаса правительствоӧн веськӧдлысьӧс первой вежысь Михаил Порядин, Россияса промышленносьт да вузасьӧм кузя министерствоын департаментӧн веськӧдлысь Евгений Рыжов, Монди котырысь исполнительнӧй директор Петер Освальд, Россияса FSC котырысь исполнительнӧй директор Николай Шматков, ГОТЭК компанияяс котырысь директоръяслӧн сӧветӧн веськӧдлысь Владимир Чуйков да Россияса вӧр овмӧсын уджалысьяслӧн профсоюзса нырщик Денис Журавлёв — вочавидзисны модераторлӧн юалӧмъяс вылӧ да унаысь пасйисны «Монди СЛПК»-лысь социальнӧя кывкутӧмсӧ, производство выльмӧдӧмын водзмӧстчӧмсӧ, уджалысьяс да вӧр-ва вӧсна тӧждсӧ. Сёрнитісны уджсӧ тӧдӧмӧн да дженьыда, кӧть эськӧ тшӧкыда овлывлӧ дзик мӧд ног…
Сёрнивизьсӧ нуӧдысьӧн, ӧнія ног — модераторӧн, вӧлі «Россия 1» телеканалын «Вести» программа нуӧдысь Ирина Россиус. Ылысяньыс омӧля аддза да, медводз чайті, мый аньыс асланым, сыктывкарса. Но сюсьджыка видзӧдӧм бӧрын гӧгӧр-вои, мый тайӧ Москваысь гӧсьт.

—Тӧданныд, мыйӧн мен воӧ сьӧлӧм вылӧ Монди? — вайӧда Николай Шматковлысь кывъяссӧ. —Тайӧ компанияыс збыльмӧдӧ социальнӧй тӧдчанлуна могъяс да кывкутӧ вӧр-ва видзӧм вӧсна. Оз кадысь кадӧ, а воысь-во быд лун. «Монди Сыктывкарса ЛПК» ёртасьӧ Россияса да войтыркостса вӧр-ва видзан котыръяскӧд, шуам, «Серебряная тайгакӧд», Россияын WWF фондкӧд, отсалӧ тані олысьяслы видзны нэмӧвӧйся озырлун — вӧр-ва.

Залсянь юалӧмъяс вылӧ вочавидзӧм бӧрын сёрнисӧ сигӧртісны.

Разӧдчытӧдз нимлунасьысьяс козьналісны быдӧнлы «Юбилейнӧй» кабала пачка да предприятиелӧн 50 вося историялы сиӧм фотоальбом. Пытшкас — снимокъяс да йӧз йылысь пасйӧдъяс. На йылысь, кодъяс гижисны да гижӧны, вӧчисны да вӧчӧны на водзӧ тайӧ историясӧ. Фотоальбомлӧн медводдза лист бокын Клаус Пеллер шыӧдчӧ лыддьысьысь дорӧ:

—Ме век кӧсйи уджавны вынйӧра промышленнӧй предприятиеын, и тайӧ кӧсйӧмыс збыльмис Сыктывкарын. Лоны «Монди СЛПК»-са директорӧн — абу сӧмын кывкутана, но и почёта удж. Дерт, мирса целлюлоза-кабала вӧчан мукӧд комбинат серти миян зэв на том. Но сылӧн историяыс озыр гырысь вермӧмъясӧн, яръюгыд лоӧмторъясӧн, аслыспӧлӧс йӧзӧн. И таысь помтӧг нимкодь! 50 воӧн миян предприятиеным вужвыйӧныс вежсис. Талун «Монди Сыктывкарса ЛПК» — ӧнія кадся, ыджыд водзӧса производство, вӧр овмӧсын нырщик. И таын вермӧмыс ёрта, енбиа, сям-кужӧмлуна, ассьыс уджсӧ радейтысь ыджыд котырлӧн. Ми зумыда да повтӧг видзӧдам аскиа лунӧ! Миян ставыс на водзын!

Гӧсьтъяс колисны ассяньныс «чолӧмалана пас» — уна кыв вылын маркерӧн гижисны торъя инӧ шоныд бур сиӧмъяс. Медым ставыс артмас да збыльмас!
Инесса ОРЁЛ

«Коми му» газетысь, кодӧс позьӧ судзӧдны пошта пыр, позьӧ ньӧбны «Ордым» лавкаын. Медым лыддьыны электроннӧй версия, личкӧй татчӧ. Эмӧсь кӧ юалӧмӧяс, гижӧй komi-kerka@ya.ru.

«Монди СЛПК»-лы – 50: ставыс на водзын…
Пролистать наверх