Дас кык патераа керка йӧр тыр челядь. Дасысь унджык зонпосни пӧвстын сӧмын кык нывка. И Дариналы нывъёртыскӧд ковмӧ ворсны зонкаяскӧд «войнушкаысь» да «царь горыысь», кутасьӧмысь, лыммачасьны да котравны.
Но налӧн эм и асланыс лов бурмӧдантор – сиктса клубын йӧктан кружок. Веськӧдлысь-наставникыс сэн ӧнӧдз Галина Фёдоровна Рочева. Дарина и талун ветлӧ сы дорӧ: хореографияыс – сылӧн медрадейтана шойччӧг да аслыссикас спорт. А нэмӧвӧйся Мокчой – тайӧ вӧр-ва мичлун да уна вося история.
Сиктса школаын олӧмыс аслыспӧлӧс. Велӧдчысьяс тӧдӧны ёрта-ёртсӧ дзолядырсяньыс. Сӧмын ӧта-мӧд дорӧ гортас пыдди волысьӧны «мӧдас» да нӧшта на и урок вылын пукалӧны. Но со и урокъясыс помасисны, сдайтӧма ЕГЭ, и Дарина Леуш мунӧ водзӧ содтыны тӧдӧмлунсӧ Сыктывкарса университетын начальнӧй классъяс факультетын.
2021 вося июль 1 лунӧ дипломсӧ босьтӧм бӧрын Дарина воӧ стажируйтчыны Изьва районса велӧдан управлениеӧ. Ичӧт класса педагогыс оз ков Заречьеын ни Изьваын да, том специалистлы вӧзйӧны зільны школаӧдзса да общӧй образование отделын. Дарина кывкутӧ челядьӧс гожӧмнас шойччӧдӧм да ПМПК (психолог да медик педагогическӧй комиссия) удж вӧсна.
Уджас пырӧдчӧ ӧдйӧ, да и нокыс сьӧлӧм сертиыс, но вӧзйӧны Бакурса школаын педагог-организаторӧн лоны да, дзик пыр кӧсйысьӧ.
–Ог тӧд мыйла, но быттьӧ важӧн нин виччыси татшӧм вӧзйӧмсӧ. Тыдалӧ, юр-вежӧрын дась нин вӧлі крута вежны удж-олӧмӧс, и педагог-организатор должносьтыс вичмис ас кадӧ, – шуӧ Дарина Леуш.
Бакурса школаын сійӧ зільӧ тавося январь 30 лунсянь. Дарина Васильевна кывкутысь да ӧдйӧ ыззьысь морт, та вӧсна сёысь унджык сылысь быдтассӧ гажтӧм оз босьт.
А урокбӧрся олӧм-нокыс ныв-зонлы медся на ёна йиджӧ паметяс. И Дарина вӧчӧ ставсӧ, медым тайӧ кадколастсӧ томулов коллялісны ыджыд водзӧсӧн. Татшӧм нин сылӧн профессия-уджыс. А школаӧ регыд мунас тшӧтш и Женя пиыс, кодлы таво тырӧ сизим арӧс. <>
Игорь Колесов.
Комиӧдіс Елена Плетцер.
Снимокыс Алёна Тушиналӧн гортса архивъясысь.