Миян республикаын ылі сикт-грездын олысь нӧбасьысь аньяслы шуӧма вештыны медучреждениеӧ ветлан туйысь рӧскодсӧ.
Татшӧм сьӧма отсӧгыс вичмӧ налы «Демография» нацпроект весьтӧ. И таво заводитчӧмсянь сетӧмаӧсь нин 480-ысь унджык нывбабалы.
Кыдз висьталісны удж, занятосьт да йӧзӧс социальнӧя доръян министерствоын, тайӧ кокньӧдыс зэв тӧдчана миян республикаса аньяслы, унаӧн олӧны ылі сикт-грездын да, кытчӧ сьӧкыд воӧдчынысӧ.
Водзті шуӧма вӧлі медучреждениеӧ ветлан туйысь рӧскодсӧ вештыны вит кар-районса, а кольӧм восянь регионса юралысь Владимир Уйбалӧн индӧд серти – 18 муниципалитетса нин 140 сайӧ сикт-грездын олысь аньяслы.
А сідзкӧ, ӧні ёна унджыклы нин вичмӧ татшӧм отсӧгыс, кодӧс сетӧны Коми Республикаса перинатальнӧй шӧринӧ, кардиология диспансерӧ, Ухтаса да Воркутаса роддомъясӧ, а сідзжӧ Ухта карса поликлиникаӧ ветлысьяслы.
Та дырйи абу урчитӧма, кымынысь нывбаба вермас шыӧдчывны тайӧ медучреждениеясас.
Рӧскодсӧ вештӧны автобусӧн, поездӧн либӧ вавывса транспортӧн, а рӧспута дырйи – самолётӧн эконом класса билетӧн ветлӧмысь. Позьӧ сідзжӧ вӧдитчыны та могысь ас машинаӧн либӧ медалӧм транспортӧн.
Такӧд йитӧдын сьӧма отсӧгысла нывбабалы колӧ шыӧдчыны кар-районса йӧзӧс социальнӧя доръян шӧринӧ либӧ «Мои документы» МФЦ-ӧ врачьяс дорӧ волӧм либӧ кага вайӧм йывсьыс документ босьтӧмсяньыс во чӧжӧн.
<> Гижӧдсӧ дасьтіс Александра Артеева.
Снимокъясыс ӧтуввезйысь.