Таво заводитчӧмсянь Комиын 319 семья ньӧбӧма регионса капитал весьтӧ оланін.
Татшӧм сьӧма отсӧгсӧ, 150 сюрс шайт, шуӧма сетны «Демография» нацпроект вылӧ подуласьӧмӧн
семьялы, кӧні 2020 вося январь 1 лунсянь чужтӧмаӧсь либӧ босьтӧмаӧсь быдтыны медводдза кага. Та дырйи оз босьтсьы тӧд вылӧ бать-мамлӧн нажӧткаыс да мукӧд чӧжӧсыс.
Регионса удж, занятосьт да йӧзӧс социальнӧя доръян министерствоысь юӧр серти, таво заводитчӧмсянь медводдза кага вайӧмкӧд йитӧдын семьялы регионса капитал вылӧ сертификатсӧ босьтӧма Комиын 932 морт. Республикаса бюджетысь та могысь видзӧма 98,3 миллион шайт
–Татшӧм сертификатыс вичмӧ став том гозъяыслы, кодъяс чужтӧны либӧ босьтӧны асланыс ныв-пи пыдди быдтыны медводдза кага, – висьталіс республикаса удж, занятосьт да йӧзӧс социальнӧя дорйӧм кузя министр Екатерина Грибкова. – Та дырйи тайӧ сьӧмсӧ позьӧ видзны семьяыслы медся коланатор вылӧ. Сідз, таво заводитчӧмсянь регионса капиталнас вӧдитчис нин 1.043 семья. На пиысь 319-ӧн ньӧбисны патера либӧ керка, 479-ӧн дзоньталісны оланіннысӧ. Кыдз тыдовтчӧ, регионса капиталыс – семьялы тӧдчана отсӧг.
Ведомствоӧн веськӧдлысь казьтыштіс, мый оланін ньӧбӧмысь да дзоньталӧмысь ӧтдор регионса капиталсӧ позьӧ видзны кага велӧдӧм да бурдӧдӧм, а тавося август 1 лунсянь и автомашина, снегоход да катер-пыж ньӧбӧм вылӧ. Сьӧмсӧ позьӧ видзны кыдз ставсӧ, сідз и вочасӧн этшаджыкӧн.
Семья вермас заводитны вӧдитчыны тайӧ капиталнас медводдза кага чужтан лунсяньыс во джын мысти. Но колӧ кӧ оланінысь либӧ ипотекаысь кредит мынтыны, сьӧмсӧ позьӧ видзны сертификат босьтӧм бӧрас пыр жӧ да ставсӧ. И унаӧн тадзи и вӧчӧны.
Ведомствоас сідзжӧ пасйисны, мый том гозъяяс вонас ӧтчыд вермӧны босьтны регионса капиталсьыс 25 сюрс шайт. Тайӧ сьӧмсӧ позьӧ видзны оланінысь да коммунальнӧй услугаясысь, кагаӧс детсадйын видзӧмысь, санаторий-курортын дзоньвидзалун ёнмӧдӧмысь, эмбур страхуйтӧмысь, шойччыны ветлӧмысь мынтысьӧм да вот вештӧм вылӧ. Таво заводитчӧмсянь татшӧм позянлуннас вӧдитчӧма 286 том гозъя.
* * *
Казьтыштам, семьялы регионса капитал вылӧ сертификат босьтӧм могысь колӧ шыӧдчыны «Госуслуги» портал пыр, кар-районса йӧзӧс социальнӧя доръян шӧринӧ либӧ «Мои документы» МФЦ-ӧ.
Тайӧс вӧчны позьӧ кага чужтӧм бӧрын пыр жӧ либӧ сёрӧнджык. Оланпасын та могысь торъя кад абу урчитӧма.
<> Гижӧдсӧ дасьтіс Александра Артеева.
Снимокыс ӧтуввезйысь.