Газетын кольӧм петасас на гижим-юӧртім ытшкысь-куртысьяслы Кӧрткерӧс районса Одыбын «Звени, коса!» гаж-ордйысьӧм йылысь.
А кольӧм шойччан лунъясӧ нин Мылдін районса Гришестав грездсаӧс шызьӧдіс вӧр-ва видзӧмлы сиӧм «Сено» арт-фестиваль.
Сойва ю берегын ӧтув гажӧдчыны да ассьыныс сям-кужӧмлунсӧ петкӧдлыны чукӧртчылісны мастер киа войтыр, дизайнеръяс, серпасалысьяс, сьылысь-йӧктысьяс да творчество, вӧрын-вадорын шойччыны радейтысьяс. Кык луныс лэбовтіс ӧти здук моз, ӧд вӧлі котыртӧма быдсикас площадка, мастер-класс, ворсӧм да ордйысьӧм.
Арт-фестивальсӧ Гришеставын котыртлӧны 2015 восянь. 2019-ӧдын сійӧ ӧтувтіс республика пасьталаысь мастеръясӧс, кодъяс водзсасисны куим нимпасын – вӧчалісны быдсикас мыгӧр да арт-объект.
Талун «Сено» – Комиын медся нималана 10 фестиваль лыдын, а сэтчӧ волыны окотитысьыс воысь-во содӧ. Сойва берегын чукӧрмывлӧ кык сюрс мортӧдз, на лыдын и Санкт-Петербургысь, Ярославльысь, Екатеринбургысь, Москва да Архангельск обласьтъясысь гӧсьтъяс.
Та пӧрйӧ петкӧдчысь-пырӧдчысьыс да видзӧдысьыс уна жӧ вӧлі. Кодкӧ вӧзйис ярманга вылын ки помысь вӧчӧмтор-чача, мӧд чӧсмӧдліс коми сёян-юанӧн, коймӧд ворсӧдіс зонпосниӧс и верстьӧӧс. Тані жӧ туристъяслы вӧлі лӧсьӧдӧма Печора-Ылыдзса заповедниклысь площадка, вӧзйисны и байдарка-рафтӧн ва кузя шлывъялыштны.
Мужичӧйяс ошйысисны-ордйысисны косаӧн ытшкан сямӧн. «Виртуозы пилы» конкурсӧ пырӧдчысьяс дзужгисны-пилитісны пу мыгӧръяс, «Арт-формасаяс» вӧчасисны кос турунысь. А сэккості сцена вылын сьылісны-йӧктісны ас районса да мукӧдлаысь воӧм котыръяс.
* * *
Йӧзыс грездын гыис сёр рытӧдз: том и олӧма пӧттӧдз гажӧдчисны, нимкодясисны аслыспӧлӧс уджъясӧн да мича вӧр-ваӧн, чӧсмасисны, печласисны кокнас, снимайтчисны…
Ӧти кывйӧн, сьӧлӧм-лов бурмытӧдзыс шойччисны. А гажсӧ сигӧртӧм бӧрын кӧсйысисны и водзӧ вылӧ волывлыны Мылдінса тайӧ ичӧтик грездас паськыд да кыпыд гаж вылас. <>
Елена Плетцер.
Снимокъясыс «ВКонтактеын» «Арт-фестиваль «Сено»
да «паРаДКультуры Троицко-Печорский район» котыръясысь.