Сӧвесьтныс эм абу 28-ӧд номера автобус шоперъяслӧн?! Ветлӧны кыдзи кӧсйӧны!
Пукси «Вермӧмсянь 65 во» автобус сувтланінын. Муна детсадйӧ кагала. Колӧ воӧдчыны «Пермскӧй» сувтланінӧдз. Но кондуктор шуӧ, мый мунӧны карӧ, а Лесозаводлань оз кӧсйыны. Пансис зык ме да кондуктор-шопер костын. Мыйын помкаыс? Ӧд сэні сувтланінъясас йӧзыс виччысьӧны жӧ 28-ӧд номера автобуссӧ…
Кондуктор посйысьӧ, мый оз удитны, «пробкаяс» да сідз водзӧ. Но автобусыс Читын сулаліс 10 (!) минут! Сэсся сӧрӧны, мый автобусыс ӧдва заведитчис, и оз вермыны мунны. Но мыйла, сідзкӧ, гаражысь петігӧн та йылысь эн мӧвпышт, автобусыд кӧ жугалӧма? Тэ ӧд йӧзӧс новлӧдлан, а он картупель мешӧк! Мыйла, сідзкӧ, петін маршрут вылӧ жугалӧм транспортӧн?!
Тайӧ вӧлі ӧтчыд. Мӧдысь бара тайӧ жӧ шоперыскӧд да кондукторыскӧд веськалі. Бара жӧ пыксьӧны, оз мунны сідз, кыдзи колӧ. Бун-бос менӧ пинялісны. Ме эськӧ эг жӧ сетчы да. Но ӧд он кӧ кӧсйы уджавны, оз кажитчы, дугды.
А коркӧ сӧлі 28-ӧд автобусӧ «Макси» дорын. Кежим Орбитаса бассейнлань да, заводитчис ордйысьӧм 17-ӧд номера автобускӧд. Первой ӧтиыс панйис, сэсся мӧдыс. И ӧтарыс кӧ сувтӧ остановкаас, мӧдыс журкнитӧ ордйӧдӧмӧн. И кыла шопер-кондукторлысь сёрнисӧ, татысь пӧ 17-ӧдыс мед босьтӧ йӧзсӧ, а ми мӧдсьыс.
Кыдзи сідз?! Гашкӧ, кодкӧ виччысьӧ 28-ӧд автобус, а кодкӧ 17-ӧдсӧ? Маршрутыс торъялӧ, быд мунысьлӧн аслас мог.
И со 28-ӧдыс сувтіс «Лондон» дорӧ, а 17-ӧдыс журкнитіс водзӧ. Кутшӧмкӧ мужичӧй эськӧ уськӧдчыліс, кинас ӧвтыштіс и, но…
Рина Карова
Серпасаліс Ирина Бенько