Кыдзи ми важ томдырйи выпускнӧясьлім, ӧні некод нин оз гажӧдчы. Школа сайын некод оз ю сулея помысь либӧ помада колпачокысь. Ӧні быть колӧ мунны дона ресторанӧ, вештысьны оз сӧмын ас пыддиыд да кагасьыд, но велӧдысьясысь: «Сёйӧ-юӧ – ставсьыс вештысьӧма! Гажтӧм оз босьт – медалі артистъясӧс!». Ме ӧні ачымӧс олигархӧн кыла…
Дача вылӧ велӧдысьястӧ шашлыкасьны он жӧ нуӧд. А мыйла эськӧ и не? Мыйла быть донасьыс-дона ресторанын сёйны, а дача вылас порсь яйыс оз али мый кылав? И мыйла ме учительясӧс должен вердны ас тшӧт весьтӧ ресторанын, а оз найӧ менӧ? Ме ӧд заслужиті жӧ. Мыйта деньга ме сеті тайӧ вояснас школалы! Джодж колӧ краситны, пӧтӧлӧк белитны. Пӧжалуйста, медалам евроремонт вӧчысьясӧс, сы вӧсна мый кутшӧмкӧ дядя Васялӧн либӧ тётя Люсялӧн уджыс оз шогмы. Кӧть эськӧ найӧ доз дон кындзи оз корны. Да и позис не сетны, краска дуксӧ дукалісны да, сідз лӧсьыд лои. Быд родительскӧй собрание бӧрын ми вӧлі тыртчам. Ог доз вылӧ, а «на школьные нужды». А тайӧ нуждаас вӧлі пырӧ и велӧдысьлӧн сотӧвӧй оператор услугаыс. Видите ли, сійӧ гижӧ миянлы эсэмескаяс, мый талун кӧдзыд, и кагаӧс школаӧ оз ков вайны. А ме изверг, да? Ывлаас 40 градус кӧдзыд, а ме кагалы шуа: «Марш школаӧ!».
А кымын гортса удж ме вӧчи… А дистанционкаыс! Мыйта нерв менсьым сёйис, мыйта вын сеті сэки, медым кагалы юрас сюйны школьнӧй программа. Мыйла ме ӧні должен тӧдны кутшӧмкӧ правило буравчика либӧ клостридиум титанус? Короче, мыйысь лоӧ столбняк. «Мам, мам, кор вӧлі Бородинскӧй сражение?» Ме кысь тӧда? Мыйла менсьым юасян? И вообще, пӧдлав туалет ӧдзӧссӧ, ме тай тэнсьыд ог юась пычкысигад, кыдзи колӧ пӧжавны картупеля шаньга, ыджыд мамыдлы звӧнитча…
Таӧдз ме некор эг ветлы ресторанӧ. Кӧть школа кындзи и университет помалі. Уджвывсаяскӧд корпоративасям редакцияын пуӧм картупельӧн да сола ӧгуречӧн. Гӧгӧрвоинныд, кутшӧм миян рӧскодыс? Картупельыс гӧбӧчысь, сола ӧгуреч банкаыс сэтысь жӧ. А школьнӧй выпускнӧй вылын тайӧ оз кылав. Колӧ мидии в винном соусе, раки с ремуладом из сельдерея да с.в. Ме весиг ог тӧд, кыдзи колӧ тайӧс сёйны. Ме сиктса морт. Пызан вылӧ ме пукта жаритӧм порсь яйсӧ латканас. Пачысь кыска картупеля шаньга, выйсӧ сывда кӧрт кружкаын и шаньгасӧ рачсьыс босьта, сюйла пӧсь сывдӧм выйӧ да сёя. Чунь вож костті выйыс визувтӧ, и ме нюла, мед бокӧ оз войтав. Пуртӧн ме кужа шӧравны сӧмын нянь. Вилкиӧн ме ог сёй. Менам вилкиыс – чуньяс. Ме сёя либӧ паньӧн, либӧ киӧн. А сэні лоӧ столӧвӧй прибор. Морыс тӧдӧ, кыдзи сыӧн вӧдитчынысӧ.
А кыдзи пасьтасьны, мед он кут выглядитны чмошникӧн? Бать-мамлӧн «ВКонтактеын» беседаысь гӧгӧрвои, мый найӧ ставныс «в теме»: ветлывлӧны ресторанӧ по любому поводу, пызйысьӧны дона духиӧн, туплиныс 20 сюрс шайтысь, трусикыс тшӧтш. И ме сэтчӧ локта «Московскӧй ярмаркаысь» платтьӧӧн. И коді сэні лоӧ клоуныс?
Вот кытӧн лоӧ гажа челядьлы, мед нэм чӧжыс сэсся казьтыласны. Давай нӧшта корам Николай Басковӧс, мед налы сьылас. Кӧть эськӧ сылӧн сьылӧмыс миянлыджык лӧсялӧ. Ӧнія челядьлӧн краш Даня Милохин ли Ваня Дмитриенко. Мӧдыс татчӧ воліс нин республикалӧн юбилей вылӧ. Кӧть сыысь вештысьны оз ков, аттьӧ чинаяслы. Да, ковмас на и юр жуглыны, кагаыдлӧн выпускнӧйыд ӧтчыд олӧмад овлӧ.
Екатерина Макарова
Серпасаліс Инна Попова