Россияса стрӧитчан да жилищно-коммунальнӧй
овмӧс министерствоӧн веськӧдлысь Ирек Файзуллинкӧд аддзысьлігӧн Коми Республикаса юралысь Владимир Уйба кыпӧдліс регионын стрӧитчан юкӧнлӧн удж, нацпроектъяс збыльмӧдӧм да коммунальнӧй овмӧсын инфраструктура выльмӧдӧм йылысь юалӧмъяс.
Аддзысьлігӧн вӧлі пасйӧма, мый 2023 вося медводдза кварталын Комиын кыпӧдӧма 57,7 сюрс квадрата метр оланін. Ирек Файзуллин тӧдчӧдіс, олан керкаяссӧ пӧ кыпӧдӧны школа-детсад да мукӧд социальнӧй стрӧйбакӧд орччӧн.
–Комиын эм 5,4 гектар му, кӧні позяс кыпӧдны 40 сюрс квадрата метр оланін, и тайӧ тшӧтш отсалас збыльмӧдны нацпроектъяс, – висьталіс Россияса министр.
Сідзжӧ вӧлі пасйӧма, мый «Сӧстӧм ва» уджтас серти Ухтаын урчитӧм кадысь ӧдйӧджык стрӧитӧны ва весалан станция. Сійӧ сетас позянлун могмӧдны йӧзӧс сӧстӧм юан ваӧн.
Киссянвыйӧдз воӧм керкаясын олысьясӧс выль патераясӧ вуджӧдӧм йылысь сёрнитігӧн казьтыштісны, мый 2019 восянь Комиын выль керкаясӧ овмӧдӧма 5,13 сюрс мортӧс. А 2025 воӧдз коммунальнӧй овмӧсын инфраструктура выльмӧдігӧн лоӧ вежӧма ва да шоныд сетан 25 километр труба.
–Россияса правительство да минстрой отсӧгӧн Комиын збыльмӧдам йӧзлысь олӧмсӧ бурмӧдӧм, кар-сиктлысь чужӧмбансӧ мичмӧдӧм кузя уджтасъяс да программаяс. Нимкодь, мый тайӧ уджас пырӧдчӧны, зільӧны-водзмӧстчӧны и кар-районын олысьяс. Ме аттьӧала быдӧнӧс, коді эз кольччы бокӧ да пуктіс регион сӧвмӧдӧмӧ ассьыс пай, – висьталіс Владимир Уйба. <>
Гижӧдсӧ дасьтiс Павел СИМПЕЛЕВ.
Снимокъясыс ӧтуввезйысь.