Гӧрд али турунвиж, дженьыд али кузь, быгльӧс али квадрат формаа – маникюртӧ вӧч, кутшӧмӧс кӧсъян.
Нывъяс тӧдчӧдӧны: гель-лактӧ пӧ новлыны кивыв, ӧтчыд мавтан – пӧшти тӧлысь гыжйыд мича. Краситчан-баситчан нырвизьыс ӧнія кадӧ ёна сӧвмӧ-паськалӧ: мастеръяс пыр велӧдчӧны, думыштӧны выль технология, восьтӧны ассьыныс студия. Вӧчӧны ставсӧ, медым тӧдчӧдны нывъяслысь мичлунсӧ да петкӧдлыны аслыспӧлӧслунсӧ.
Но мукӧдыслы окота вӧвлытӧмсӧ – чуймӧдны, шай-пайвайӧдны уна рӧма юрсиӧн, синмӧ шыбитчана макияжӧн, зэв кузь гыжйӧн. И шензьӧдана нырвизьясысь ӧти – crazy (йӧй кодь) маникюр. Нывъяс ляскӧны гыжйӧ чача, косьтӧм быдмӧг, писькӧдӧны да пысалӧны сэтчӧ кольча-кулон… Мый ышӧдӧ найӧс таӧ? Ёна-ӧ сьӧкыд вӧчны татшӧмсяма гыжсӧ? Вочавидзис маникюр мастер Яна Котова
Выльтор
Краситчан-баситчан нырвизьӧ Яна пырӧдчӧма водз – школаын велӧдчигӧн на, 2017 воын прӧйдитӧма гыж вӧчысьлы курс. Медводз матыссаяс вылас видлӧма ассьыс сямсӧ петкӧдлыны, а сэсся велалӧма да босьтчӧма уджавны тайӧ туйвизяс. Пара во мысти ӧтуввезйысь Яна тӧдмалӧма выль сикас – crazy – маникюр йылысь да окотитӧма видлыны асьсӧ.
– Сэки миян карын тайӧ вӧлі выльторйӧн, вӧвлытӧмторйӧн, – юксьӧ Яна. – Аслыспӧлӧса гыж вӧчӧм модаыс сӧмын-сӧмын на воис миянӧ суйӧр сайысь. И нывъяс медводз, дерт, выльсӧ видлыны эз кӧсйыны, гашкӧ, полыштісны. Но вочасӧн татшӧм маникюр йылысь юӧрыс паськаліс, тшӧкыдджыка кутісны шыӧдчывны ме дорӧ. Аслым таысь нимкодь – зэв ёна кажитчӧ выльторсӧ видлыны!
И серпас, и кольча
Унаӧн чайтӧны, мый crazy маникюр – тайӧ сӧмын чача гыжйӧ ляскӧм. Но абу. Тайӧ и яръюгыд дизайн вӧчӧм, стемпинг – серпас печаталӧм, стразӧн мичмӧдчӧм, кольча пысалӧм…
– Гыж чегӧмысь эн полӧй. Бур мастерыд колана ногӧн ставсӧ вӧчас. Дерт, унатор и тіян сайын: тасьті-пань да джодж мыськигӧн перчаткиасьӧй, гель-лактӧ эн йирӧй, тшӧкыдджыка мыськалӧй да мавтӧй кинытӧ кремӧн, – велӧдӧ маникюр вӧчысь. – Пирсинг-кольча пысалӧмысь повны оз жӧ ков. Медым эз чеглась-потлась, розьӧдӧны сійӧс гыж рӧчсяньыс некымын миллиметр кежӧмӧн торъя инструмент «штопорӧн» либӧ вӧсньыд фрезаӧн.
Crazy маникюртӧ вӧчӧны гель-лак моз жӧ: медводз мавтӧны база, сэсся рӧма гель, а вывтіыс зумыдмӧдӧны топӧн. Мастер водзвыв донъялӧ, кыдзи бурджык: позьӧ кӧ – чача-стразтӧ ляскас медбӧрын, а гӧгӧрвоӧ кӧ, мый оз кут кутчысьны – содтӧд топӧдас-мавтас.
Быд вӧчысьлӧн ас уджаланног: ӧтияс вӧдитчӧны сӧмын гельӧн, мӧдъяс – полигельӧн, коймӧдъяс – чорыд базаӧн. Яна гыж выв чачасӧ топӧдӧ гель да акрил лойӧмӧн. Мед лӧсьыда кутчысяс-а!
Татшӧм маникюрыд, дерт, донаджык: и содтӧд материал колӧ, и гыж вӧчӧм могысь кадыс унджык мунӧ. Мастерыдлы колӧ удж донсӧ тӧдны.
Аслыспӧлӧс творчество
Маникюр – тайӧ аслыспӧлӧс творчество: колӧ кужны йитны некымын рӧм, думыштны серпас, гыжлы бӧрйыны чунь серти лӧсялана форма.
– Оз овлы, мый ныв сӧмын чача-кольчаа гыж вӧчӧдӧ. Шуам, тайӧ тӧлысьӧ кельыд рӧм бӧрйӧ, а мӧдысь корӧ вӧчны синтӧ ёрана маникюр, мыйкӧ сэтчӧ ляскыны, – нюммуніс Яна. – Та пыр аньяс, нывъяс петкӧдлӧны асьнысӧ, ловрусӧ.
Кор медводдзаысь аддзан кодӧскӧ кузьсьыс-кузь гыжйӧн, дзик пыр мӧвпыштан, абу-ӧ сьӧкыд сылы быдлунъя олӧмас? Яна дорын тшӧкыда вӧчӧдӧны 5 сантиметрысь кузьджык гыж. И эмӧсь нывъяс, кодъяс век сӧмын сэтшӧмӧс новлӧны: первойсӧ пӧ абу кивыв, а сэсся велалан. Мед сӧмын аслыныс кажитчис-а!
Анастасия Попова
Снимокъясыс Яна Котовалӧн