Пыр тшӧкыдджыка кывлан, мый томуловлы восьса став ӧдзӧсыс? Мый лунысь-лун содӧ позянлун петкӧдлыны кужӧм-сямтӧ, велӧдчыны онлайн кӧть офлайн, пырӧдчыны форумӧ, гижны да дорйыны проект, шедӧдны сійӧс збыльмӧдӧм могысь сьӧм? Но мыйлакӧ быдтор йылысь тӧдмалан медбӧрын… Кор сідз шусяна поездыс шутёвтӧма нин ылӧ-ылӧ?
Буретш тэныд «Йӧлӧга» чукӧртіс тайӧ лист бокас онлайн-платформаяс, медым водзӧ вылӧ дзик став пӧсь юӧрсӧ тӧдмалін медводдзаӧн
Росмолодёжлӧн сайт
fadm.gov.ru
И сідз, Россияын томулов вӧсна кывкутӧ торъя федеральнӧй агентство – Росмолодёжь. Сэтчӧс уджалысьяслы пуктӧма ыджыд мог: лӧсьӧдны том йӧзлысь гӧгӧртассӧ сідз, медым быдӧн вермис сӧвмыны да збыльмӧдны ассьыс кӧсйӧмсӧ. Та могысь агентствоса нуӧдӧны уна уджтас, а став колана да пӧсь юӧрсӧ медводз йӧзӧдӧны буретш fadm.gov.ru сайтын да асланыс соцсетьясын.
Сайтын быть колӧ пыравны Росмолодёжь.События лист бокӧ – татчӧ чукӧртӧма став тӧдчана лоӧмторсӧ. Пырав и Росмолодёжь.Гранты юкӧнӧ – юӧръяс кындзи татысь позьӧ лыддьыны на йылысь, кодъяс шедӧдісны грант да збыльмӧдісны ассьыныс проектъяссӧ. Том йӧз юксьӧны опытӧн, мытшӧдъясӧн да вермӧмъясӧн. Унатор позьӧ сюркнявны пель саяд.
Окота тӧдмавны нӧшта унджык? Росмолодёжлӧн тэчас йылысь кольӧмвося 12-ӧд номерын паськыда висьталіс агентствоӧн веськӧдлысь Ксения Разуваева.
«Молодёжь России» портал
myrosmol.ru
Тайӧ порталыс тшӧтш жӧ Росмолодёжлӧн, буретш тані тэ верман аддзыны став локтан мероприятиесӧ. Быд форумлӧн, аддзысьлӧмлӧн, семинарлӧн эм торъя карточка, кытысь тӧдмалан колана юӧрсӧ – кор лоас форум-гажыс, кыдзи сэтчӧ веськавны, нуӧдӧны-ӧ та могысь конкурс, кутшӧм арлыда войтырӧс виччысьӧны да сідз водзӧ.
Медым тырвыйӧ уджавны, порталас колӧ пасйысьны да тадзикӧн лӧсьӧдны ассьыд «кабинет».
Росмолодёжь.Гранты
academy.myrosmol.ru
Медым шедӧдны гранта сьӧм, медводз колӧ гижны проект. А кыдзи тайӧс вӧчны? Вочакывйыс Росмолодёжь.Гранты порталын. Тані уджалӧ онлайн-академия. Водзмӧстчысь том мортлы гӧгӧрвоӧдасны, мый сэтшӧмыс социальнӧй проектыс да кыдзи сыӧн веськӧдлыны. Тан жӧ йӧзӧдӧма тӧдӧмлунтӧ донъялан тестъяс, а велӧдчӧм бӧрын ки вылад лоӧ нин проектыдлӧн быдса презентация, кодӧс и позяс дорйыны. Нӧшта ӧти буртор – порталса экспертъяс отсаласны и заявка дасьтӧмын.
«Навигатор возможностей» сервис
Кольӧмвося арын Россияса минцифры да Росмолодёжь лӧсьӧдісны «Навигатор возможностей» сервис, уджалӧ сійӧ «Госуслуги» порталын.
Навигаторысь позьӧ тӧдмавны, кутшӧм уджтас заводитчас матысса кадӧ аслад регионын. Веськалӧны навигаторӧ сӧмын сэтшӧм проектъяс, кытӧн пырӧдчысьлы оз ков мынтысьны. Шуам, быдсикас лекция да тренинг, форум да конференция, гырысь компанияын стажировка, туристъяслы экскурсия да экспедиция, волонтёръяслы уджтас да акция.
«Россия – страна возможностей» портал
rsv.ru
Тайӧ восьса порталыс тшӧтш сетӧ позянлун том йӧзлы пырӧдчыны ставроссияса уджтасъясӧ да тадзикӧн сӧвмӧдны кужанлун-сямсӧ. Лист бокын чукӧртӧма уна нырвизь серти велӧдан программаяс. Регистрация дырйи позьӧ бӧрйыны кажитчана нырвизьяс, а системаыс кутас вӧзйыны сэтшӧм юӧр, коді тэныд быть кажитчас.
Сайтын йӧзӧдӧма уна онлайн-лекция, но на кындзи позьӧ веськавны и «ловъя» форматӧ. «Россия – страна возможностей» нималӧ ыджыд проектъясӧн: «Лидеры России», «ТопБлог», «Большая перемена», «Твой ход» да уна мукӧд.
А гӧгӧрвоны, мыйджык воас сьӧлӧм вылад буретш тэныд, позьӧ «Блог» юкӧнысь гижӧдъясӧн тӧдмасьӧм бӧрын
Дасьтіс Мария Игушева
Снимокыс порталъясысь