«Здравоохранение» нацпроект серти Кӧрткерӧс, Чилимдін, Емдін районъясса да Ухтаса больничаясӧ локтісны уджавны бурдӧдысьяс.
Сідз, Ярегаын да Шудаягын уджӧ босьтчисны терапевтъяс, Ухтаын – врач-рентгенолог, Кӧрткерӧсын – участокса терапевт, Визябӧжын – ФАП-ӧн веськӧдлысь.
Ставсӧ артыштӧмӧн таво «Земский доктор» программа серти бурдӧдчанінъясӧ 7 фельдшерӧс да 41 врачӧс локны ышӧдӧм могысь торйӧдӧма 76 миллион шайт.
–Федеральнӧй бюджетысь регионъяслы вичмӧдӧм сьӧмнас кӧ мукӧд республика-обласьтын оз тырвыйӧ вӧдитчыны, лишалӧм сьӧмсӧ вермасны сетны миянлы, и миян лоас позянлун могмӧдны бурдӧдчанінъяссӧ нӧшта унджык специалистӧн, – висьталіс Коми Республикаса йӧзлысь дзоньви-дзалун видзан министерствоӧн веськӧдлысь Игорь Дягилев. – Та могысь ми век кыпӧдам кадръяскӧд зільысьяслысь тӧдӧмлунсӧ, медым найӧ пыртісны уджас став колана выльторсӧ.
2022 воын «Земский доктор» да «Земский фельдшер» программаяс серти Комиӧ уджавны воӧма 42 медик, на пиысь 28-ыс – сиктса районъясӧ. Ышӧдӧм могысь врачьяслы мынтӧма 2 миллион шайтӧн, фельдшеръяслы – 1 миллионӧн. <>
Гижӧдсӧ дасьтiс Александра АРТЕЕВА.
Снимокъясыс ӧтуввезйысь.