Комиын мам капитал кузя уджтасӧ босьтчӧмсянь татшӧм сертификатсӧ сетӧма нин 80 сюрсысь унджык семьялы.
Медым мам-батьлы эз ковмы воштыны такӧд йитӧдын колана кабалаяс дасьтӧм вылӧ кад, Россияса Социальнӧй фонд сеталӧ сертификатсӧ налӧн шыӧдчытӧг.
Кага чужтӧм бӧрын мам капитал босьтӧм могысь сертификатсӧ ведомствоас уджалысьяс асьныс дасьтӧны да мӧдӧдӧны «Госуслуги» порталын нывбаба-мамлӧн «Личнӧй кабинетӧ».
Кыдз тыдовтчӧ, бать-мам тайӧ сьӧмсӧ видзӧны медвойдӧр оланін бурмӧдӧм да челядьнысӧ велӧдӧм могысь.
Мам капиталсӧ позьӧ вуджӧдны и нывбаба-мамлы пенсия чӧжан тшӧт вылас.
Сідзжӧ позьӧ босьтны мыйтакӧ сьӧм быд тӧлысь, шуам, кагаӧс детсадйын видзӧмысь мынтысьӧм, челядькӧд шойччыны ветлӧм да мукӧдтор вылӧ.
Казьтыштам, тавося февральсянь мам капитал содӧма 11,9 прӧчент. Медводдза кага вайӧмысь шуӧма сетны 586,9 сюрс, мӧд дзолюкӧс чужтӧмысь – 775,6 сюрс шайт. <>
Гижӧдсӧ дасьтiс Александра АРТЕЕВА.
Снимокыс ӧтуввезйысь.