Сыктывкарын регионса правительствоӧн веськӧдлысьӧс вежысь Галина Габушевалӧн юрнуӧдӧм улын чукӧртчылiс «Лямпиада» XVI фестивалькӧд йитӧдын вӧралан лызьӧн котралӧм-ордйысьӧм кузя Коми Республикаын национальнӧй спорт сикаслысь чемпионат да первенство дасьтан-нуӧдан оргкомитет.
Мӧд во дорвыв шуӧма котыртлыны «Лямпиадасӧ» Сыктывдiнын Ыб сиктса финн-йӧгра этнопаркын.
Март 11 лунӧ тайӧ аслыссикас гаж дырйиыс ордйысьны мӧдасны верстьӧ спортсменъяс и челядь.
Томулов котӧртасны 500 метр, нывбабаяс – ӧти, а мужичӧйяс – кык километр. Та могысь шыӧдчыны позьӧ март 10 лунӧдз электроннӧй пошта пыр: gabov.af@rambler.ru.
Фестиваль дырйиыс кодi да кыдзи кутас гажӧдны спортсменъясӧс да гӧсьтъясӧс, висьталiс финн-йӧгра этнопаркысь директор Елена Иванова.
Торйӧн кӧ, сьывны мӧдас Коми Республикаса филармонияысь артистка Вера Булышева, петкӧдчасны «Северная околица» ансамбль, казакъяслӧн «Вольница» да белорусъяслӧн национально-культурнӧй автономияса «Купалинка» хоръяс, а сiдзжӧ «Гуляночка» ансамблькӧд музыкант Владимир Трошев.
Интерактивнӧй площадкаясын позяс шыблавны шы, лыйсьыны ньӧввужйысь, пырӧдчыны коми йӧзкостса ворсӧмъясӧ да с.в. Дерт жӧ, лоас и ярманга. Бара жӧ шуӧма пудъявны Киров обласьтса «Лесная новь» санаторийӧ путёвка. <>
Гижӧдсӧ дасьтiс Александра АРТЕЕВА.
Снимокыс ӧтуввезйысь.