Мӧйму Комиын семьялы регионса 150 сюрс шайта капиталӧн (РСК-ӧн) вӧдитчӧмӧн оланін ньӧбӧмаӧсь 604 том бать-мам. Нӧшта 839-ӧн дзоньталӧмаӧсь керка-патеранысӧ.
Казьтыштам, «Демография» нацпроект весьтӧ республикаса бюджетысь тайӧ сьӧмыс вичмӧ дзик став семьяыслы, кӧні 2020 вося январь 1 лунсянь чужӧма медводдза кага.
Республикаса удж, занятосьт да йӧзӧс социальнӧя доръян министерствоысь юӧр серти, кольӧм во регионса капитал вылӧ сертификат босьтӧма Комиын 2.116 олысь. 1.641 семьяын вӧдитчӧмаӧсь нин тайӧ сьӧмнас. Бюджетын такӧд йитӧдын рӧскодыс артавсьӧ 178,4 миллион шайт.
–Семьялы тайӧ тӧдчана отсӧг. Ӧд регионса капитал вылас позьӧ ньӧбны либӧ дзоньтавны оланін, мынтысьны кагаӧс велӧдӧмысь да бурдӧдӧмысь, тшӧтш и спорт учреждениеясын дзоньвидзалунсӧ ёнмӧдӧмысь, – висьталӧ республикаса удж, занятосьт да йӧзӧс социальнӧя дорйӧм кузя министр Екатерина Грибкова.
Сылӧн кывъяс серти, том бать-мамлӧн эм сідзжӧ позянлун быд во босьтны семьялы регионса капитал весьтӧ 25 сюрс шайтӧдз да мынтысьны тайӧ сьӧмнас коммунальнӧй услугаясысь, вештыны вот, бурдӧдчыны санаторийын да с.в.
Регионса капитал вылӧ сертификатысла том бать-мамлы позьӧ шыӧдчыны каганысӧ вайӧм бӧрын пыр жӧ либӧ сёрӧнджык. Та могысь стӧч кадсӧ абу урчитӧма.
<> Лист боксӧ дасьтіс Александра АРТЕЕВА. Снимокыс ӧтуввезйысь.