Октябрь 5 лунӧ профессиональнӧй праздникӧн чолӧмалам-нимӧдам велӧдысьясӧс.
Миян республикаын тӧлка да енбиа велӧдысьыс уна, на лыдын и Кӧрткерӧс районса Ыджыдвиддзысь Роза Александровна Ширяева.
1971 воын педучилище помалӧм бӧрын том ань локтӧма уджавны чужан сиктас. И велӧдӧма Ыджыдвидзса шӧр школаын ичӧт класса челядьӧс 38 во.
Уна вося бур уджысь Роза Александровналы сетӧма «Отличник народного просвещения» пас, «Уджвывса ветеран» да «Кӧрткерӧс районса почёта ветеран» нимъяс, уна сикас тшупӧда почёт грамота.
Пенсия вылӧ петӧм бӧрас Роза Александровналы гортас оз на пукавсьы: гожӧм-арнас ветлӧ вӧрӧ вотчыны, тӧвнас котралӧ лызьӧн, окотапырысь сьылӧ «Зыряночка» котырын. Водзмӧстчысь ань тшӧкыда волывлӧ и сиктса библиотекаӧ, ёна радейтӧ лыддьысьны да.
Чолӧмалам Роза Александровнаӧс да республикаын став велӧдысьсӧ праздникӧн! Сиам тіянлы сьӧкыд, кывкутана, йӧзлы зэв колана да тӧдчана уджын вермӧмъяс! Ставныдлы дзоньвидзалун да ыджыд терпенньӧ! <>
Вероника ГАБОВА.
Снимокыс авторлӧн.