Тавося июль медводдза лунъясӧ «Россияса корсьысян ӧтмунӧмлӧн» Коми Республикаса юкӧнӧ шыӧдчис Севастопольын олысь Владимир Косенко, коді патера ньӧбиг-вузалігас аддзӧма Коми АССР-ын чужлӧм Алексей Гурьевич Игушевлы сетлӧм «За боевые заслуги» медаль. Сійӧ корис отсавны корсьны война вылӧ ветлӧм Алексей Гурьевичлысь рӧдвужсӧ, медым сетны наградасӧ налы.
Тайӧ юӧрсӧ вӧлі йӧзӧдӧма Комиын корсьысян отрядъяслӧн «ВКонтактеын» лист бокъясын. И шензьӧдана – «С миру по нитке» АНО-ӧ час мысти нин чукӧстчис Алексей Игушевлӧн Мылдін районын олысь Валерия Николаевна Васильева внучкаыс. Пӧльсӧ корсьӧм йылысь юӧрнас сыкӧд юксьӧма Ксения Юдина нывъёртыс, гашкӧ пӧ, тайӧ тэныд инмӧ да.
Валериялӧн «С миру по нитке» АНО-кӧд йитчылӧм бӧрын пансис рӧдвужсӧ туялан удж. Ань юӧртіс, мый оз тӧд, кыдзи да мыйла воши медальыс, гашкӧ пӧ, дядьӧй да тьӧтӧй – Алексей Игушевлӧн челядьыс – мыйкӧ вермасны гӧгӧрвоӧдны.
Боечлӧн нёль ныв-письыс куимыс Белгородын олӧны да, вӧлі шуӧма ыстыны наградасӧ буретш налы. А кыдзи тайӧс вӧчнысӧ? Медальсӧ аддзысьыс, Владимир Косенко, эз вермы ветлыны Белгородӧдзыс, но зэв ёна кӧсйис, медым сійӧ веськаліс буретш Алексей Игушевлӧн челядь киӧ. Ми Севастопольсянь зэв ылынӧсь жӧ да, шыӧдчим отсӧгла уджъёртъяс дорӧ. Москваысь «Вымпел» войтыркостса котырын водзмӧстчысь Пётр Григорьев да Севастопольысь Татьяна да Александр Макеевъяслӧн семья отсӧгӧн ӧдйӧ и артмис ставыс.
Айму вӧсна Ыджыд тышса ветеран Алексей Игушевлӧн вӧлӧма сы ыджда семья, сы пасьта рӧд! Июль помын нин Белгород обласьтын олысь челядьыс, внукъясыс да правнукъясыс чукӧртчылісны ӧтув тӧдмасьны-нимӧдны фронтӧвиклысь подвигсӧ. Тшӧтш и Валерия Васильева семьяысӧд шоныда казьтыштісны Алексей Гурьевичӧс.
Алексей Игушевлӧн Светлана Алексеевна да Владимир Алексеевич челядьыслӧн казьтылӧмысь: «Алексей Гурьевич батьным чужис 1925 вося март 28 лунӧ Коми АССР-ысь Кӧрткерӧс районса Ыджыдвидз сиктсӧветув Джиян грездын. Джиянын помаліс 6 класс, сэсся война мунан 1941-1942 воясӧ нин велӧдчис Щельяюрса училищеын коймӧд разряда судоплӧтникӧ.
1943 вося январь 15 лунӧ Кожваса райвоенкомат босьтіс сійӧс Сӧветскӧй армияӧ. Батьным воюйтіс фашистлы паныд 1944 вося июньсянь 1945 вося апрельӧдз гвардияса 99-ӧд стрелкӧвӧй дивизияысь 297-ӧд лыйсян полкын. Снаряд торйӧн черлыас ранитчӧм-контузитчӧм бӧрын 1945 вося июнь 1 лунӧ лэдзисны гортас.
Воюйтігӧн пасйӧма «За боевые заслуги» кык, «За победу над Германией в Великой Отечественной войне 1941-1945 гг.» медальясӧн, Отечественнӧй войнаса II степеня орденӧн.
Ыджыд тыш кусӧм бӧрын Алексей Гурьевич вочаасис миян Алефтина Васильевна Трошева мамнымкӧд, да регыд мысти ӧтлаасисны. Чужис 7 челядь: 4 ныв да 3 пи.
Том кадас мам-бать уджалісны вӧрын: бать пӧрӧдчис, мам увйысис. Бур уджсьыс пасйылісны уна сикас грамотаӧн.
1966 воӧ ас керка вузалӧм бӧрын семьяным Судострой посёлокысь вуджис Печора карын баракӧ. Уна челядь вӧсна оланінным вӧлі дзескыд да, батьным ӧтторъя мыйкӧ стрӧитіс-содталіс: то веранда, то гожся пусянін, то чулан-сарай. Мастер вӧлі да, бокиысь некодӧс эз кор-медавлы.
Гожӧмнас став семьяӧн пуктылім картупель, вотім тшак-тусь, барак ломтыны заптылім пес. Батьным радейтіс пӧрадок да велӧдіс таӧ и миянӧс. Ёна кыйсис-вӧраліс. Видзим тшӧтш и порсь. Ставыс тайӧ отсаліс ыджыд семьянымлы кутчысьны-овны судзсяна.
Став челядь быдмим да велӧдчим, босьтім сьӧлӧм серти специальносьт. Сідз, Николай помаліс Печораын профучилище да уджаліс ва вылын, ветліс Печора ю кузя. Быдтіс ныла-пиа.
Иван велӧдчис Горькийын автодорожнӧй техникумын, уджаліс Усинскын автомеханикӧн. Сылӧн кык ныв.
Галина босьтіс тӧдӧмлун Ленинградса технологическӧй техникумын, уджаліс профмастерӧн Гатчинаын. Олӧ Санкт-Петербургын.
Нинаӧс Ленинградса технологическӧй техникум помалӧм бӧрын ыстісны уджавны Калининградӧ. Сэні и тӧдмасис верӧсыскӧд, кодӧс распределенньӧ серти мӧдӧдісны Магадан обласьтса Омсучкан карӧ. Ныла-пиаыс талун олӧны Москваын.
Светлана помаліс Ухтаса горно-нефтянӧй техникум, пенсияӧдзыс уджаліс Усинскын. Быдтіс пи. Антонида тшӧтш велӧдчис Ухтаса горно-нефтянӧй техникумын. Помалӧм бӧрас распределенньӧ серти муніс Нефтеюганскӧ. Быдтіс пи.
Владимир босьтіс тӧдӧмлун Печораса 10-ӧд номера ГПТУ-ын. Оліс Печораын, а уджаліс вахтаӧн Усинскын. Гозъя быдтісны ӧти ныв».
Алексей Гурьевич Игушевлӧн Светлана, Антонида да Владимир челядьыс ӧні пенсия вылынӧсь нин, олӧны Белгородын, а Галина – Санкт-Петербургын.
Николай Алексеевич Игушевлӧн нылыс, войнаса ветеран Алексей Игушевлӧн внучкаыс Валерия Николаевна Васильева казьтылӧ пӧльсӧ тадзи: «Ичӧтдырйи ветлывлім пӧль-пӧч дорӧ Печораӧ. Олісны ювывса училищелы паныда. Дедным вӧлі сьӧкыд пеля да, ковмыліс гораа сёрнитны. Юрӧ медъёна кольӧмаӧсь каньясыс. Луннас некысь эг аддзылӧй, а узьны водім да, войнас садьмим керка сырмӧмысь. Кодкӧ вывті котраліс на дай. Вӧлӧмкӧ, каньяс котралӧны. Пӧльным зэв ёна радейтіс кысукъястӧ».
Корсьысьысь-водзмӧстчысьяс отсӧгӧн со тадзи уна во мысти челядьыс, внукъяс да правнукъяс дорӧ бергӧдчис фронтӧвик Алексей Гурьевич Игушевлӧн «За боевые заслуги» медальыс! <>
Юлия ОСТАШОВА,
«Россияса корсьысян ӧтмунӧмлӧн» Коми Республикаса юкӧнын водзмӧстчысь, «С миру по нитке» АНО-ӧн юрнуӧдысь.
Комиӧдіс Елена ПЛЕТЦЕР.