Быд во юркарса администрацияысь культура юкӧн да Сыктывкарса коми культура шӧрин ӧтув котыртлӧны «Чучело Масленицы» конкурс.
Со и таво сійӧс нуӧдісны. Конкурсӧ пырӧдчис карса кызь куим учреждение-организация. Найӧ вӧзйисны йӧзлы видзӧдны-донъявны 32 полӧкалӧ. Медся уна масленичаӧс вӧчӧмаӧсь карса детсадъясын уджалысьяс.
Март 6 лунӧ юркарса Степан изэрд вылын ёна и «вежнясисны» полӧкалӧясыд: «чужӧма» масленичаяс нюмъялісны быд воысьлы, кодсюрӧ кинас ӧвтӧмӧн корисны матыстчывны, гӧститӧдісны и кӧ-лачӧн.
Кӧдзыд да чизыр тӧла поводдя вылӧ видзӧдтӧг найӧс окотапырысь донъялісны ветлысь-мунысьяс, тшӧтш и фотографируйтчисны.
Жюри тані жӧ вӧлі, быд полӧкалӧ дорӧ матыстчыліс, шензис мичлуннас, донъяліс да корсис тшӧтш тырмытӧмторъяс.
Тавося конкурсын вӧлі вит нимпас. Медся «Гажа Йӧввылӧн» («Масленица-веселушка») шуисны челядьлӧн да том йӧзлӧн творчество дворечсалысь полӧкалӧсӧ. Сылӧн мича паськӧмыс шензьӧдіс-нимкодьӧдіс ставнысӧ.
«Йӧзкостса Йӧввыв» («Этно-масленица») ним шедӧдісны кыкӧн – искусство школасалӧн да юркарса 43-ӧд номера детсадлӧн масленицаяс. Экология боксянь «Медбур Йӧввыв» («Эко-масленица») полӧкалӧӧн лоис «Волна» культура керкасалӧн вӧчӧмторйыс. Сійӧс пасьтӧдӧмаӧсь-мичмӧдӧмаӧсь ас кыӧм джодждӧраясӧн. «Масленича-чемпионкаӧн» шуисны юркарысь 87-ӧд номера детсадсалысь уджсӧ. «Басюк Йӧввыв» («Фэшн-масленица») нимпасын вермысьыс таво эз ло.
Видзӧдысьяслӧн онлайн-гӧлӧсуйтӧм серти медбурнас шуисны «Волна» культура керкасалысь полӧ-калӧсӧ. Конкурсӧ пырӧдчысьяслы вичмасны дипломъяс, а вермысьяслы – и сьӧма сертификатъяс.
Надежда Пунегова. Снимокъясыс авторлӧн.