Нимкодь, кор хоббиыд лоӧ радейтана уджӧн; кор ас кинад вӧчӧмторйӧн ворсӧны челядьыд; кор матыссаыд да ёртъясыд корӧны тшӧтш вӧчны и налӧн быдтасъяслы козинъяс. Буретш тадзи и лоӧма Анастасия Кожевниковалӧн олӧмас.
Социальнӧй сетьын Анастасия гижӧма асьсӧ Распоповаӧн. Тадзи жӧ корис сійӧс пасйыны газетын. Специальносьт сертиыс маркетолог, а радейтана хобби-удж сертиыс – фетрофея (тадзи и шуӧ асьсӧ). Ань пукалӧ декретын, быдтысьӧ да нимкодьӧдӧ асьсӧ да орччӧн олысьяссӧ челядьлы фетрысь небыд небӧгъяс, быдсяма чача-развивайка вурӧм-вӧчӧмӧн.
– Ме спортсменка да быдлаӧ ныр сюйысь, мӧд ногӧн кӧ, активистка, – висьталіс Анастасия. – Ичӧтдырсянь институт помавтӧдз котралі лызьӧн, боксируйтчи, ворсі футболысь.
Творчествоад водз жӧ пырӧдчи. Вот аканьясӧн эг ворс-лы. Менам вӧлі кӧрт конструктор, да сыысь машина-самолёт мастеритлі. Кысьылі крючокӧн и спицыӧн, вӧчаси японеч сёйысь, хенд-мейдыд и скрапбукингыд вӧлі.
Ӧні менам олӧмын спортыд эм жӧ, волейболася, журъяла велосипедӧн да котрала лызьӧн. Но пиӧс чужтӧм бӧрын юрын мыйкӧ вежсис – окота лои лӧсьӧдны чуньясӧн ворсан театр, медым петкӧдлыны мойдъяс. «Курочка Рябасянь» и заводитчис фетрӧн тӧдмасьӧмыс.
Пилы вит арӧс нин, а нылуклы арӧсӧн-джынйӧн.
Водзті киӧн вурсьылі. Сэсся аддзи фетрысь небӧгъяс, ёна кажитчисны да, найӧс велӧдчи вурны, куті и вурсян машинаӧн тшӧтш вӧдитчыны.
Анастасия вурсьылӧма китайса фетрысь. Но сійӧ вӧлӧма вывті небыд да, абу кутӧма кажитчыны. Кад мысти видлӧма кореяса фетр-фурнитура, коді ёна бурджык вӧлӧма. Сэсся аддзӧма фетрсӧ сідз шусяна оптӧн вайысьясӧс да на пыр и кутӧма босьтны.
И сунгысьӧма тайӧ уджас! Пырӧдчӧма быдсяма мастер-классӧ, велӧдчӧма вурны фетрысь медводз лист бокъяс, сёрӧнджык небӧгъяс, быдсяма чачасӧ, петкӧдчӧма и вурсян марафонъясын.
И кытчӧ оз мунны вӧлӧм пиыскӧд, сьӧрсьыныс пыр босьтлӧмаӧсь фетрысь вӧчӧмторъяссӧ. Мичаӧсь, югыд рӧмаӧсь, небыдӧсь, оз косясьны, оз чукрасьны. Позьӧма ворсны наӧн да и быдсяма мойд-историясӧ мӧвпыштны.
Казялӧмаӧсь налысь новлӧдланторсӧ матыссаясыс, ёртъясыс. Корсюрӧ ань козьнавлӧма налы чача-небӧгтӧ. Сэсся и найӧ кутӧмаӧсь корны вурны челядьныслы тшӧтш. Со и лоӧмаӧсь медводдза заказъяс…
–Ёртъяскӧд важӧн нин восьтылім «ВКонтактеын» лист бок, – водзӧ висьталіс Анастасия. – Уджавлім макетъяслӧн дизайнӧн, гижалім аудиороликъяс, печатайтім небыд магнитъяс, быдсяма козьналан набор. Но ставыс кытчӧкӧ бырис-вошис, и колис сӧмын фетр.
Сэсся декреталан отпускӧй помасис да, коліс нин петны аслам удж вылӧ. Но фетрысь вӧчасьӧмыс менӧ некыдз эз лэдз. Вурси войяснас и шойччан лунъясӧ. Весиг пукті ас водзӧ ыджыд мог – медым тайӧ хоббиыс лоас менам медшӧр уджӧн да ваяс сьӧм.
Воысь дырджык нуӧді и 6-12 арӧса челядьлы мастер-классъяс, велӧді вурсьыны.
Сэсся Анастасия петӧма мӧд кагаӧс ваян декретӧ, и мастер-класс нуӧдӧмысь ковмӧма дугӧдчывны. Но та пуд вичмӧма кад радейтана уджӧн ноксьӧм вылӧ. Лун и вой ань вурсьӧма. Нылукыслӧн чужӧм бӧрын верӧсыс козьналӧма Анастасиялы вурсян машинка. И сылӧн шы улӧ кагукыс весиг бура узьӧма.
Пиыс сэк кежлӧ быдмыштӧма нин, да став вурӧм небӧгсӧ сыкӧд и тестируйтӧмаӧсь.
– Опытӧй эм нин, но пыр окота велӧдчыны водзӧ, мыйкӧ выльтор тӧдмавны, – висьталіс ань. – Ӧні нин вежлала небӧг-чачалысь форматсӧ, йӧзӧда реклама.
Вурсян машинка сетіс позянлун содтыны выль сикас вурысъяс. Збыльмӧда дум-кӧсйӧмӧс – вурся, сӧвмӧда «ВКонтактеын» да «Инстаграмын» ассьым котырӧс, пырӧдча выль проектъясӧ, вӧзъя вӧчӧмторйӧс вузӧс вылӧ.
Меным аслым пыр окота видлыны мыйкӧ выльтор. Но медся ёна, дерт, ышӧдӧ челядьлӧн нимкодясьӧм-радлӧмыс да мамъясыслӧн шуда висьтасьӧмыс. Ӧд ме вура ог ковтӧмтор, а экология боксянь бур да челядьлысь ловру кыпӧдан чачаяс. На отсӧгӧн дзолюкъяс тӧдмасьӧны гӧгӧртаснас, пемӧс-лэбачьясӧн да став ловъя ловнас, заводитӧны мойдны… И таысь торйӧн нин нимкодь.
Анастасия став сьӧлӧмсӧ сетӧ радейтана уджыслы. И тайӧ сьӧлӧмкылӧмыс, шоныдыс, тыдалӧ, вуджӧ чачакӧд тшӧтш и челядьлы. Быд небӧг пӧ – менам быдтас, менам кагук. Овлӧ, кутшӧм-сюрӧ чачасӧ ань вурӧ ӧтпырйӧ кыкӧс. Ӧтисӧ козьналӧ аслас челядьлы, а мӧдсӧ – ёртъясыслӧн ныв-пилы.
– Пиӧй окотапырысь ворсӧ менам киӧн вурӧм чачаясӧн, – шуӧ Анастасия. – Сійӧ вермас лунтыр «лыддьысьны» – перъялас небӧгысь детальяс, пысалас мӧдъясӧс, мӧвпыштас кутшӧмкӧ мойд либӧ вӧвлытӧмтор, петкӧдлас ставсӧ да висьталас и дзоля чойыслы. Тшӧкыда ми ворсам чуньяса театрӧн. Тадзи ми сӧвмам.
Колӧ пасйыны, мый Анастасия вурсьӧ корӧм серти. Сылысь небӧгъяссӧ ньӧбӧны Россия пасьталаын да тшӧтш и суйӧр сайын. Кольӧмвося ноябрын ыджыд пӧсылка мӧдӧдӧма Канадаӧ. Ӧні сійӧ жӧ заказчикыслы вурӧ мойдъяса планшет.
– Уна мамлы абу веськодь, мыйӧн ворсӧ кагаыс, – водзӧ сёрнитӧ ань. – Колӧ, медым чачаыс сӧвмӧдіс, нимкодьӧдіс, да сійӧс позис и мыськавны. Кореяса фетр – зэв бур дӧра. Сылӧн рӧмъясыс оз вушйыны, вурӧм чачаыс оз оръясь. Фетрысь вурӧм небӧг небыд, шоныд, куснясьтӧм. И тайӧ ёна кажитчӧ челядьлы да верстьӧлы.
Пыр на син водзын, кыдзи ветлім Турцияӧ. Миян фетрысь вурӧм магнита чери кыянінӧ матыстчыліс став зонпосниыс. А изъяс пӧвстын енгагӧн ворсӧмыс, рочӧн кӧ, произвёл фурор!
Анастасия небӧг-чачасӧ вурӧ-дасьтӧ зонпоснилысь арлыдсӧ тӧд вылӧ босьтӧмӧн. Медся ичӧтъясыслы, арӧсӧдз, дасьтӧ сьӧда-еджыд да уна рӧма карточкаяс, чунь тренажёръяс, ичӧтик небӧгъяс.
Гырысьджыкъяслы вурӧ тематическӧй планшетъяс, чачаяс, чуньяса театр, геройяса керкаяс. Тані нин мамъясыс мый корасны. Челядьлы фетрысь небӧгъяс – тайӧ талунъя гаджет. Быд лист бок торъялӧ. И сэк жӧ ӧти геройсӧ позьӧ овмӧдлыны мӧд и коймӧд лист бокас. Ворсігӧн кагукыс сӧвмӧ, велӧдчӧ тӧдмавны рӧмъяс, му-ваын олысь-лэбалысь-уялысьясӧс.
– Быдӧн тӧдӧ, мый кага сӧвмӧдӧ асьсӧ кинас вӧрӧдӧмӧн, сійӧс и тайӧс вомас видлӧмӧн, – водзӧ висьталӧ Анастасия. – Та боксянь фетрысь чача пластмассаысь вӧчӧмсьыс бурджык. Да и небӧгыд вермӧ вежны уна лыда чача, торйӧн нин кор колӧ мунны кытчӧкӧ ылӧ. Татшӧм небӧгыд – бур козин кагалы чужӧмсяньыс да нёль-вит арӧсӧдз.
* * *
Анастасия Распоповалӧн «ВКонтактеын» эм аслас котыр – www.vk.com/karaska_baby_book. Быд окотитысь вермас тӧдмасьны сылӧн уджъясӧн да нимкодясьны, а колӧкӧ, и козьнавны аслас кагукыслы татшӧмсяма чачасӧ.
Надежда Пунегова.
Снимокъясыс Анастасия Распоповалӧн гортса архивысь.