«Монди СЛПК»-ын кыпыда восьтісны сьӧд щёлок пактӧдан выль станция. Предприятиеас татшӧмыс витӧд нин. Но медводдзасӧ важӧн нин тупкӧмаӧсь. Выль станцияыс сетас позянлун дугӧдны уджсӧ и мӧд номераас, оборудованиеыс сэні тшӧтш важмӧма да. Сэк жӧ куимас производительносьтыс содас 25 прӧчент.
Комбинатсӧ выльмӧдӧны инвестицияяс весьтӧ «Горизонт» сідз шусяна дорожнӧй карта отсӧгӧн. Mondi котыр 2017-2021 воясӧ та могысь видзӧма 125 миллион евро, мый сетӧма позянлун 10 прӧчент содтыны «Монди СЛПК»-лысь прӧдукциясӧ.
Медся тӧдчана уджтасӧн лоӧма витӧд номера пактӧдан станция, кодӧс кыпӧдӧм вылӧ видзӧмаӧсь 65 миллион евро. Подулас медводдза сваяяссӧ тувъялӧмаӧсь 2019 вося апрельын. Пӧдрада котыръясысь тані зільӧма 600 сайӧ морт. Оборудованиесӧ вайӧмаӧсь Австрияысь, Эстонияысь, Финляндияысь, Польшаысь, Италияысь, Швецияысь да Россияысь.
Таво сентябрын помалӧмаӧсь кызвын уджсӧ. Квайт корпуса станцияӧ сьӧд щёлокыс мӧдас воны лыска пуысь целлюлоза вӧчанінысь. Быд час сэні кутасны пактӧдны сыысь 380 тонна ва.
Гӧгӧрвоана, уджтасыс бур и экология боксянь. Выль оборудованиенас вӧдитчигӧн мӧдас артмыны этшаджык лёк ру.
–Mondi котырлӧн сьӧм весьтӧ да опыта профессионалъяслӧн котыр отсӧгӧн пӧртім олӧмӧ «Горизонт» дорожнӧй картасӧ. Ӧнія выль оборудованиеыс сетас позянлун нӧшта на бурмӧдны станцияыслысь да тшӧтш и ставнас «Монди СЛПК»-лысь уджсӧ, вӧчны быд во 120 прӧчентӧн унджык прӧдукция. Меным зэв нимкодь таысь. Ыджыд аттьӧ предприятиеысь, пӧдрада котыръясысь специалистъяслы, кодъяс зілисны-водзмӧстчисны тайӧ уджтассӧ збыльмӧдӧм могысь, – висьталіс «Монди СЛПК»-са генеральнӧй директор Клаус Пеллер станциясӧ восьтігӧн.
–Миян республикалы торйӧн нин тӧдчана босьтчыны уджӧдны ӧнія татшӧм выль производственнӧй вынйӧръяссӧ. Сьӧд щёлок пактӧдан 5-ӧд номера станцияыс сетас позянлун оз сӧмын унджык прӧдукция вӧчны, но и экологиясӧ бурмӧдны, Чолӧмала ставнытӧ тайӧ ыджыдсьыс-ыджыд вермӧмнас! – висьталіс Коми Республикаса юралысь Владимир Уйба.
Регионӧн веськӧдлысьлӧн кывъяс серти, выль станцияыс бур и экология боксянь.
–Ми пыр кылам Европасянь «турунвиж пӧвестка» йылысь. Миян «турунвиж» республика быд боксянь лӧсялӧ татшӧм корӧмъясыслы. И выль сикас оборудованиеа станцияыс тайӧс бура петкӧдлӧ, – казьтыштіс Владимир Уйба.
«Горизонт» уджтасӧн веськӧдлысь Сергей Хозяинов тшӧтш аттьӧаліс проектсӧ дасьтысьясӧс, комбинатын да пӧдрада котыръясын, Ростехнадзорлӧн Печораса управлениеын зільысьясӧс. Коронавирус вылӧ ви-дзӧдтӧг пӧ сяммим кыпӧдны татшӧм тӧдчана стрӧйба.
–Станцияыс зэв ёна колӧ сьӧд щёлок регенерируйтӧм могысь. Чаг пуӧны еджыд щёлокын. Та бӧрын артмӧны целлюлоза да сьӧд щёлок, кӧні сорласьӧма сир, ва да мукӧдтор. Станцияын щёлоксьыс пактӧдӧны васӧ. Водзӧ щёлокыс мунӧ содорегенерация пӧртйӧ да бӧр веськалӧ производствоӧ. Экология боксянь тайӧ, дерт, тӧдчана. Нинӧм оз шыбитсьы, – гӧгӧрвоӧдіс Сергей Хозяинов.
«Горизонт» дорожнӧй картасӧ збыльмӧдігӧн щёлок пактӧдан станцияысь ӧтдор комбинатас выльмӧдӧмаӧсь волокно дасьтан оборудование, косьтан машина, квайт да дас сюрс кубометр целлюлоза видзан кык бак, сульфат майтӧгысь таллӧвӧй вый вӧчан установка да нюжӧдӧмаӧсь содтӧд 645 метр кӧрт туй.
* * *
Медым збыльмӧдны тайӧ уджтассӧ, предприятиеыслы кӧртымӧ содтӧд вичмӧдӧмаӧсь 300 сюрс гектар вӧр угоддьӧ. 2019 воын инвестицияа «Горизонт» картасӧ ошкӧмаӧсь Коми Республикаын, вӧр овмӧсса федеральнӧй агентствоын, Россия Федерацияса промышленносьт да вузасьӧм кузя министерствоын.
2025 воӧдз «Монди СЛПК»-ын кӧсйӧны выльмӧдны ТЭЦ. Кыпӧдасны биаруӧн ломтысян выль пӧрт, парӧвӧй турбина, трансформатор да би-шоныд юклан тэчас. Вежлаласны и сетьяс да лӧсьӧдасны энергетика оборудованиеӧн веськӧдлан ӧтувъя пульт. Тайӧ уджтас вылас урчитӧмаӧсь видзны 135 миллион евро.
Николай Размыслов.