Синва кодь сӧстӧм да йиа кӧдзыд Лымва ю… Уна сикас дзоридз-туруна видзьяс да джуджыд нэмӧвӧйся пуяса мича вӧр… Шоныд да муса вӧр керка, чӧскыд дука да аминь жар сьӧд пывсян…
Матӧ кызь во чӧж нин ас котырӧн усьлӧ шуд ветлыны тайӧ мичасьыс-мича инас, коді шусьӧ зэв аслыспӧлӧса – Лесник.
Водзті, кольӧм нэмся 60-90-ӧд воясӧ, Кӧрткерӧс районысь Одыб сиктса некымын семья тані гожӧмбыд да сёр арӧдз пуктылӧмаӧсь совхозлы да асланыс овмӧсъяслы турун. Мунлӧмаӧсь сэтчӧ овны-уджавны мӧс-кукнас да став котырнас. Овлӧмаӧсь ичӧтик керкаясын, быдӧнлӧн вӧлӧма ас пывсян, жытник-кум, кӧзӧд, гид (унджыкыслӧн – мупытшса землянка). Тадзи уна-уна во чӧж став гожся страдна кадыс кольлӧма буретш Лесникын, Лымва ю бокын…
Со и менам верӧс семьялӧн ӧнӧдз на сулалӧ-зымвидзӧ сэні кыпыд керка да, ок, кутшӧм на жар сьӧд пывсян. Сӧмын тай турунтӧ пуктыны некодлы лои…
Таво со ытшким-куртім керка гӧгӧрсӧ вель паськыда (челядьлы котралӧм вылӧ) да ставсӧ гуӧ сюялім-талялім…
А водзын мыйта зорӧд тані зымвидзлӧма, олӧмыс пуӧмӧн-пуӧма, картупель-сёркни быдмылӧма, уджтӧгыд некод абу пукавлӧма. А челядьлы тані гажыс вӧлӧма!
Менам энька мам тані и чужлӧма 1961 воын, Лымва ю берегвывса сьӧд пывсянын, буретш пӧсь страдна кадӧ, июль шӧрӧ. А вит во мысти 1966 вося август тӧлысьӧ и ичӧт вокыс Лесникын жӧ чужӧма! Дерт, сэсся кыскӧмӧн-кыскӧ найӧс чужанінад!
А ӧні и ми нин ас челядькӧд быд во некымын лун кежлӧ зілям ветлыны тайӧ мичаинас, сӧдз Лымва юын пӧттӧдз купайтчыны да чери кыйны.
Майбыр, нинӧм оз ков – ни телевизор, ни интернет! Сьӧлӧмыд нимкодясьӧ-радлӧ, мый и посниулов асьныс нуӧдчӧны татчӧ, слабог, вунӧдчылӧны кӧть недыр кад кежлӧ асланыс телефон-планшет йывсьыд.
Уна во чӧж на виччысь миянӧс, Лымва-матушка, примит-овмӧд, кыпыд вӧр керка, да бура на и лы-сьӧмнымӧс веськӧд ён жарнад, дона сьӧд пывсян!
Галина МАКАРОВА.
Снимокъясыс авторлӧн.