Сыктывкарын заводитісны нуӧдны «Социальнӧй кинолог» уджтас серти урокъяс. Кинологъяс да ветеринаръяс гӧгӧрвоӧдӧны йӧзлы, кыдзи колӧ быдтыны-дӧзьӧритны-велӧдны понйӧс. Волыны позьӧ быд окотитысьлы. Специалистъяскӧд медводдза аддзысьлӧмыс вӧлі кольӧм вӧскресенньӧӧ Комиысь добровольчество шӧринын.
Босьтін кӧ – велӧд
–Водзті миян республикаын и кинологъяс, и ветеринаръяс, и пемӧсъяслӧн приютысь волонтёръяс уджалӧны вӧлі торйӧн, а «Социальнӧй кинолог» уджтаслӧн медшӧр нырвизьыс – ӧтувтны найӧс, а сідзжӧ мед налӧн вӧлі позянлун юксьыны асланыс сям-кужӧмлунӧн йӧзыскӧд. Кодсюрӧ ӧд понписӧ босьтӧны, мусаникӧсь пӧ да, а видзны-дӧзьӧритны оз кужны. Но кутюпиыд абу плюш чача, мед сӧмын ворсыштны. Сыкӧд тӧжд-нокыс зэв уна. Но оз быдӧн тайӧс гӧгӧрво. Дышӧдас да, улич вылӧ петкӧдасны да эновтасны. И воысь-во шӧйтысь понйыс содӧ, – висьталіс Коми Госсӧветса депутат, «Социальнӧй кинолог» уджтаслӧн куратор Виктор Бетехтин.
Сійӧ тӧдчӧдіс, мый кодкӧ кӧ кӧсйӧ лӧсьӧдны пон, ӧні сылӧн эм позянлун водзвыв юасьны специалистъяслысь, кутшӧмджык пӧрӧдааӧс босьтны, кыдзи да мыйӧн вердны, кытчӧ шыӧдчыны, доймас кӧ либӧ висьмас пемӧсыс, да с.в.
«Социальнӧй кинолог» уджтаскӧд йитӧдын лоӧны и сідз шусяна практическӧй занятиеяс, кытчӧ позяс волыны понкӧд. Абу на урчитӧма, кор да кӧні кутасны чукӧртчывны та могысь. Такӧд йитӧдын ӧні сёрни мунӧ и юркарса чинаяскӧд, и карын олысьяскӧд. Бӧрынджык сэсся та йылысь став юӧрсӧ позяс тӧдмавны «ВКонтактеын» «Социальнӧй кинолог» лист бокысь.
Небыд да пушыд али тӧв ныр?
Кыдзи пасйис ветеринар, чихуахуа да сиба-ину пӧрӧдаяс рӧдмӧдысь Жанна Звигинцева, кӧсъян кӧ лӧсьӧдны нёль кока ёртӧс, медводз колӧ аслыд веськыда вочавидзны, верман-ӧ сійӧс вӧдитны-дӧзьӧритны.
–Понйыд уна сикас пӧрӧдаа эм. Колӧ тӧдмавны пемӧсыслысь этшсӧ, мед колана ногӧн дӧзьӧритны. А кодсюрӧ аддзасны снимок вылысь мича, пашкыр гӧна кеесхондӧс, француз болонкаӧс либӧ самоедӧс, вежныс петас да, босьтасны, а сэсся бӧрыннас нин гӧгӧрвоасны, мый медым понлӧн гӧныс вӧлі небыд да пушыд, колӧ грумер дорӧ ветлывны (грумер – понъяслӧн парикмахер). Тайӧ услугаыс абу донтӧм, и ветлывны колӧ тшӧкыда. Либӧ эмӧсь сэтшӧм пӧрӧдаяс, кодъяс ёна котралӧны, вильшасьӧны. Шуам, джек-расселтерьер. Тайӧ рӧдыс дурпоп кодь, весиг тӧв ныркӧд позьӧ ӧткодявны. Он кӧ кут улич вылын мудзтӧдзыс котрӧдлыны-ворсӧдны сійӧс, патератӧ пузувтас. Ачыд кӧ он радейт спорт, джек-расселтерьертӧ бурджык не босьтны, матӧ воан, – казьтыштіс Жанна Звигинцева.
Сылӧн кывъяс серти, мортыдлы понсӧ бӧрйыны колӧ сэтшӧмӧс, коді эськӧ лӧсяліс аслас оласноглы. А сідзжӧ гӧгӧрвоны, мый пемӧссӧ дӧзьӧритӧм вылӧ ковмас торйӧдны семьяыслӧн бюджетысь сьӧм. Медым пемӧс вӧлі дзоньвидза, сійӧс колӧ бура вердны, а сідзжӧ кадысь кадӧ нуӧдлыны ветеринар дорӧ. Быть колӧ пистиавны. Медводдзаысьсӧ, – кор кычиыслы кык тӧлысь, а корсюрӧ и водзджык на. Пистиавтӧдзыс колӧ юктӧдны ковйысь лекарствоӧн. Вакцинируйтӧны кык пӧрйӧ. Мӧдысьсӧ пистиалӧны и сідз шусяна бешенствоысь.
–Мукӧд висьӧмысь позьӧ бурдӧдны, а бешенствоысь – оз, – эскӧдіс Жанна Звигинцева. – Тайӧ висьӧмыс вермас вуджны пемӧссянь и мортлы. И сы помысь, овлӧ, кувсьӧ-ны. Та йылысь быть колӧ тӧдны да водзвыв видзчысьны.
Ветеринар висьталіс, мый пемӧсъяслы оз став вузасянінас инавны колана витамин либӧ сёян. Эмӧсь и ылӧгаяс. Колӧ ньӧбасьны сідз шусяна специализируйтӧм лавкаын, сэні и вузӧсыс бур, и отсаласны бӧрйыны сійӧ либӧ мӧд пӧрӧдалы колана сёянсӧ да витаминсӧ. Шуам, ӧткымынлаын вузалӧны пемӧсъясӧс клещысь видзан ошейникъяс, но на вылӧ надеяыс абу. Жанна Звигинцева вӧзйӧ ньӧбны клещысь видзчысьӧм могысь понлӧн шошаас войтӧдан препарат. Ошейникыд пӧ вермас орны, таблеткатӧ понйыд вермас сьӧлыштны, и видзӧгыс оз ло.
Кага бӧрся моз – син да син
Занятие вылӧ воӧмаяс юасисны, кутшӧм сёянӧн бурджык вердны понйӧс. Та вылӧ ветеринар вочавидзис, позьӧ пӧ вӧдитчыны дась кӧрымӧн либӧ торйӧн пуны. Но ӧлӧдіс, мый пемӧсӧс оз позь вердны сійӧн, мый ачыд сёян.
Сылӧн кывъяс серти, понйыдлӧн весиг шыдӧс вылӧ аллергия овлӧ. Медбур пӧ вердны гречаӧн да рисӧн. Быть колӧ чӧсмӧдлыны фруктыӧн, рысьӧн, капуста-морковӧн, саридзса чериӧн (юын уялысьнас пӧ вермас ковйӧссьыны), уль кук яйӧн, мед вильӧдӧ лы (но оз позь сетны чипан лы). Сэсся колӧ витаминӧн вердны, понйыдлы быть колӧ кальций, а сідзжӧ чери вый. Мед гӧныс мича вӧлі, торъя нин бур лосось вый.
Понйӧс колӧ гуляйтӧдны сэні, кӧні оз вермы доймавны. Сійӧ пӧ кага кодь жӧ, код бӧрся колӧ син да син. Патераад тшӧтш колӧ сы бӧрся видзӧдны. Дивантӧ либӧ выль туплитӧ кӧ йирас, таысь кӧзяеваыслы, дерт, абу нимкодь, а би провод кӧ – ускӧттьӧ вермас суны.
–Кодлӧн ас керка, найӧ поннысӧ йӧрас вольерын видзӧны, но и патераын олысьяслы вӧзъя ньӧбны торъя бокс либӧ клетка. Кодсюрӧ шуӧны, тайӧ пӧ тешитчӧм, жаль пӧ пемӧсыс. А абу жаль, сійӧс кӧ токӧн вартас? – водзӧ висьталіс Жанна Звигинцева.
Нӧшта ветеринар пасйис, мый кутшӧм кӧть понйӧс он босьт, бур пӧрӧдааӧс али сідз шусяна помесь, колӧ нуӧдлыны ветеринар дорӧ, кӧні сылы вӧчасны паспорт (сэні и кӧзяин, и пемӧс йылысь лоас юӧрыс). А сідзжӧ клиникаын позьӧ понлы шоша гӧнас сюйны рис тусь ыджда микрочип, кытысь сканерӧн позяс лыддьыны пемӧс йылысь став юӧрсӧ.
Вежӧртӧм понйыд – мортлӧн мыж
Коми МВД-ысь кинолог Олеся Калимьянова воліс тайӧ аддзысьлӧм вылас аслас нёль кока ёртыскӧд. Немеч рӧдысь овчаркасӧ шуӧны Крайда.
–Ставӧн чайтӧны, мый овчаркаыд – медся сюсь пӧрӧдаа пон. Но збыльвылас колӧ сыкӧд ёна уджавны. Тӧлысся кычиыд оз кут вӧзйысьны ывлаӧ, а, кора прӧща, какалас джодж шӧрад. Колӧ кад да терпенньӧ, мед сійӧс быдторйӧ велӧдны. Быдсикас пӧрӧдаа понйӧс позьӧ велӧдны сійӧ либӧ мӧд команда серти коланасӧ вӧчны. А вежӧртӧмӧн сійӧ быдмас, оз кӧ кутны бурас туйдны, – висьталіс Олеся Калимьянова. –Карын уна патераа керкаын олысьяслы колӧ тӧд выланыс кутны и, мый суседъясыс вермасны лоны паныд. Оз быд пемӧс чӧла ов. Кодсюрӧ вурзалӧны, а сідзжӧ гораа увтчӧны (торйӧн нин лайкаяс), но бара жӧ позьӧ найӧс велӧдны лӧньджыка овны.
Понйыд оз вермы чӧла лунтыр пукавны патераын, сійӧс ковмас гуляйтӧдны. И та вылӧ колӧ кад.
–Верстьӧ понлы этша вылӧ колӧ котравны-гуляйтны луннас куим час. Понпилы нӧшта унджык, – водзӧ висьталіс Олеся Калимьянова. – Сэсся отпускӧ мӧдӧдчигӧн бара жӧ лоӧ мытшӧд – кодлы кольны понсӧ? Овлӧ, тӧдсаясыд кӧсйысясны, но кутшӧмкӧ помка вӧсна оз вермыны колана мында кад вичмӧдны. Дерт, эмӧсь пемӧсъяслы гостиницаяс. Бурджык сэтчӧ сетны. Либӧ сьӧрсьыд босьт-ны. Шуам, ме Крайдаӧс пыр аскӧд новлӧдла. И корся сэтшӧм оланін, кытчӧ лэдзӧны тшӧтш понйӧс.
Олеся Калимьянова Жанна Звигинцева моз жӧ тӧдчӧдіс, мый понтӧ бӧрйигӧн колӧ бура тӧдны сылысь сідз шусяна темпераментсӧ и гӧгӧрвоны, верман-ӧ туйдны-велӧдны сійӧс.
–Менам тӧдса вӧлі босьтӧма бельгийскӧй овчаркалысь кычан, – казьтыштіс кинолог. – Зэв ӧд нимкодь видзӧдны видеотӧ, кыдзи тайӧ понйыс «чеччалӧ-лэбалӧ». Но мый тэ шуан сэк, кор сійӧс вайӧдан патераад?! Менам тӧдсалысь куим тӧлысся кутюыс оланінсӧ пузувтіс, став эмбурсӧ йирис. Тӧдсаӧй локтіс ме дорӧ да юасьӧ, мый пӧ вӧчны? Мися, клеткаӧ эн видлы йӧршитны?
Бетехтинӧс «пурис»
Занятие вылӧ воӧмаяслы, йӧзыс корисны да, кинолог висьтыштіс Крайда йылысь. Сылы куим арӧс, МВД-ын служба вылын, туялӧ-корсьӧ вӧрын вошӧмаясӧс, кулӧмаяслысь шойсӧ. Шуам, таво Крайда аддзӧма Ухтаысь январын вошӧм аньлысь коляссӧ.
–Квайт час асылын Крайда котралӧ Выльгортса видзьяс вылын, сэсся нуръясьыштӧ да мунӧ служба вылӧ. Быдлунъя занятиеяс вылын корсьӧ сідз шусяна закладка-имитаторъяс (морт шой, сісьмӧм лы да с.в.). Ныриссӧ пыр бурмӧдам. Комиын татшӧм удж вылас куим пон. Ставныс найӧ зільӧны «СПАС-Комилӧн» Сыктывкарса отрядын. Луннас Крайда вермӧ мунны 25 километр. Гожся жарысь мед оз ло лёк, ньӧби ыркӧдчан попона (жилет сяма). Купайтчыны эськӧ радейтӧ, но ог тшӧкыда мыськы, сӧмын зэв кӧ нин ёна няйтчӧма. Понлӧн эм сідз шусяна жирӧвӧй прослойка. Кор малалан, ки улад гӧныс быттьӧ выя. Тшӧкыда кӧ кутан понтӧ мыськыны, тайӧ слӧйыс бырӧ, и сэсся тӧвнас пемӧсыд мӧдас кынмыны, – тӧдмӧдіс кинолог чукӧртчӧмаясӧс аслас нёль кока ёртыскӧд.
Крайда петкӧдліс и ассьыс сямсӧ. Вӧчис командаяс серти коланасӧ, корсис мач, кодӧс кинолог шыбитіс йӧз пӧвстӧ. Первой исасис, йӧз кок улӧд ветлӧдліс, а мыйӧн аддзис, кутіс увтны. И кор сӧмын Олеся Калимьянова тшӧктіс, вӧлисти босьтіс мачсӧ вомас. Дерт, и «мыж вӧчысь» вылӧ уськӧдчис. Та пӧрйӧ татшӧмнас вӧлі Виктор Бетехтин. Крайда пиньянас шашаритчис сылы сояс да босьтчис «пурны» депутаттӧ.
Екатерина МАКАРОВА.
Снимокъясыс авторлӧн.